قۇدايعا شۇكىر، بۇكىل ەلدى دۇرلىكتىرگەن مىنا كورونوۆيرۋس دەگەن ىندەتتىڭ بەتى بەرى قاراعان سەكىلدى. قولعا الىنعان قاتاڭ شارالاردىڭ ارقاسىندا وسى دۇيسەنبىدەن باستاپ حالىقتىڭ ءومىرى سالدە بولسا جەڭىلدەپ قالاتىن ءتۇرى بار.

ءبارى دۇرىس-اۋ، الايدا وسىناۋ سوعىس جاعدايىنداي بولعان الاپات قاتەردەن جەرگىلىكتى بيلىك دۇرىس قورىتىندى جاساي الدى ما؟ ونىڭ قاسىرەتىن تولىق باعالاپ، لايىقتى ساباق الدى ما؟ بۇل سۇراقتارعا ناقتى جاۋاپ بەرە الماس ەدىك. ويتكەنى ولاردىڭ وسى ىندەت كەزىندەگى ارەكەتىنەن ەشبىر جاڭاشا كوزقاراستى نەمەسە قاراپايىم حالىقتىڭ قامىن ويلاۋداعى شىنايى نيەتىن بايقاي المادىق. قايتا كەرىسىنشە، باسقارۋدىڭ سول باياعى ەسكىرگەن ۇردىستەن ارىلا الماي، وزدەرىنىڭ حالىقتان تىم الشاق ەكەندىگىن تاعى دا انىق تانىتتى. وزگەلەردى بىلمەيمىن، ال ءبىزدىڭ وبلىستىڭ اكىمى ارحيمەد مۇقانبەتوۆ وسى ىندەت كەزىندە «ءاپ-بەرەكەلدى» دەيتىندەي ەرەكشە قۇلشىنىس تانىتا المادى. قايتا كەرىسىنشە، ءوزىنىڭ قالىپتاسقان باسقارۋ جۇيەسىنەن ءبىر تابان دا ارىلماي، ءوزى ءبىر بولەك، جەرگىلىكتى حالىق ءبىر بولەك ەكەندىگىن تاعى دا بايقاتىپ قالدى. ەندى بۇل ويىمىزدى ناقتى دەرەكتەرمەن تۇيىندەي كەتەلىك.

وزگە وڭىرلەردەگى سەكىلدى، ءبىزدىڭ ارحيمەد بەگجانۇلىنىڭ دا الەۋمەتتىك جەلىدە ءوز اككاۋنتى بار. الايدا ول ەل پرەزيدەنتى قاسىم-جومارت توقاەۆتىڭ بەرگەن تاپسىرماسىنا سايكەس قالىڭ جۇرتتىڭ كوكەيىندەگى ساۋالدارعا جاۋاپ بەرىپ، ءوزىن سول حالىقپەن ەتەنە جاقىن بولۋدىڭ ورنىنا، ءبىزدىڭ اكىم ءوز ينستاگرامىن تەك ءوزىن جارنامالۋعا پايدالانادى. قاي جەرگە باردى، كىمدەرمەن كەزدەستى، ولارعا قانداي تاپسىرما بەردى، مىنە وسى جايتتار عانا اڭگىمە بولادى. ال وبلىس حالقى قازىرگى تاڭدا قانداي ماسەلەلەر تولعاندىرىپ وتىر، قانداي وزەكتى دۇنيەلەر قامتىلماي قالدى دەگەن ساۋالدارعا مۇلدەم جاۋاپ بولمايدى. ول كىسى مۇنداي دۇنيەدەن ءوزىن مۇلدەم الىس ۇستايدى. ءتىپتى مىنا كورونوۆيرۋس كەزىندە دە وسى داعدىدان اينىعان ەمەس.

وكەندە وسى ىندەت بارىسىندا ارحيمەدىمىز الەۋمەتتىك جەلىدە ونلاين-كونفەرەنتسيا وتكىزگەنى بار. اڭگىمە سول باياعى، ءوزىنىڭ اتقارعان «اسا اۋقىمدى» جۇمىستارى مەن كەرەمەت جەتىستەرى جايلى. سوسىن وسى ىندەت كەزىندە ءىرى بيزنەس وكىلدەرىنىڭ ءدارى-دارمەك پەن قاجەتتى مەديتسينالىق جابدىقتار الىپ بەرىپ جاتقاندىعىن قۋانا حابارلاۋ. ءدال وسى تۇستا وبلىسىمىزداعى قيقارلاۋ باسىلىمنىڭ ءتىلشىسىنىڭ: «كوروۆيرۋسقا قارسى ءدارى-دارمەك الۋ ءۇشىن وزگەگە قول جايعانشا، وعان نەگە بيۋدجەت قارجىسى جۇمسالمايدى؟» دەگەن ساۋالى مۇلدەم ەسكەرۋسىز قالدى. ول ءتىلشى دە ءوز گازەتى سەكىلدى «قىرسىقتاۋ» ەكەن، كەيىن وسى سۇراعىن اكىمنىڭ جەكە اككاۋنتىنا دا جىبەردى. ءبىر قىزىعى، بۇل سۇراق سالدەن كەيىن ول اككاۋنتتان ءبىرجولاتا ءوشىرىلىپ تاستالدى. ءتىلشى ەندى اكىمنىڭ تىكەلەي وزىنە شىقتى. اكىم سوندا عانا بۇل باسىلىممەن ويناۋعا بولمايتىندىعىن، ەندى ءۇنسىز قالسا، ماسەلەنىڭ مۇلەم ۋشىعىپ، بۇكىل ەلىمىزگە تاراپ كەتەتىندىگىن سەزدى مە (الدە قاسىنداعى جاندايشاپتارى سىبىرلادى ما، كىم ءبىلسىن) كوپ ۇزاماي ءوز اكاۋنتىندا الگى ساۋالدىڭ تەحنيكالىق سەبەپتەرمەن ءوشىرىلىپ قالعاندىعىن، سول ءۇشىن تىلشىدەن كەشىرىم سۇرايتىندىعىن، ال بيۋدجەت ەسەبىنەن ءدارى-دارمەك ساتىپ الۋ ءۇشىن ارنايى تەندەر وتكىزۋ قاجەتتىگى، ال كوپ ۋاقىت الاتىندىعىن تاپتىشتەپ ءتۇسىندىرىپ جاتتى. 

ال ءبىز بولساق، اكىمىمىزدىڭ ومىرىندە ءبىرىنشى رەت قاراپايىم تىلشىدەن كەشىرىم سۇراعان «اسقان باتىلدىعىنا» ەرەكشە ريزا بولىپ، اكىمىز ءۇشىن ەڭسەمىز ءبىر كوتەرىلىپ قالدى. قاي اكىم وسىنداي «ەرلىككە» بارىپ جاتىر. ال ەندى ءار ساۋالعا ۋاقىتىندا جاۋاپ بەرمەگىندىگىنە كەلەر بولساق، بۇكىل ايماقتى باسقارىپ وتىرعان ادامنىڭ مۇنداي «ۇساق-تۇيەككە» قولى تيە بەرمەيتىن شىعار. بارىنە كىنالى، ارينە، اناۋ قاراماعىنداعىلار. ولار دەر كەزىندە ەسكەرتىپ وتىرسا، قايداعى ءبىر گازەتسىماقتىڭ قاتارداعى جاي عانا تىلشىسىنەن كەشىرىم سۇراپ، ابىرويى ايرانداي توگىلە جازداعانى جانعا باتا ما؟ ارينە، باتادى. الايدا بۇل ماسەلە كەيىن وبلىس شەڭبەرىنەن اسىپ، رەسپۋبليكاعا جايىلىپ كەتسە، كۇلكىمىزدى تيا الماسىمىز انىق. سوندا وسى وبلىستاعى قاپتاعان جاندايشاپتاردىڭ: «مۇنداي اكىم بىزدە بولعان جوق. ول كەتسە مۇلدەم سورلاپ قالامىز» دەپ كۇندىز-ءتۇنى تىلەۋىن تىلەپ وتىرعان «اسىل جاننان» ايىرىلىپ قالمايمىز با؟ ال ەندى مىنا اۋمالى-توكپەلى زاماندا بيۋدجەت ەسەبىنەن ءدارى-دارمەك الۋدىڭ قيىندىعىنا كەلەر بولساق، بۇل دا اكىمنىڭ كىناسى ەمەس. بۇل جاعدايدى قانداي دا ءتىلشىنىڭ «ارانداتقان» سۇراعىن كۇتىپ وتىرماي، الدىن-الا حالىققا ءتۇسىندىرۋ جۇمىسىن جۇرگىزبەگەن قاراماعىنداعىلار جاۋاپتى.

ال ەندى شىندىعىنا كوشەر بولساق، اكىمىزدىڭ اككاۋنتىنداعى سۇراقتارعا ەش ۋاقىتتا جاۋاپ بەرمەيتىنىنە، جاۋاپ بەرسە دە ونى قايداعى بىرەۋلەرگە يتەرە سالاتىنىنا وسى جولداردىڭ اۆتورىنىڭ دا كوزى جەتكەن. كارانتين باستالار الدىنا مەن اكىمنىڭ ينستاگرامىنا قالالىق ەمحانانىڭ ءوز شاتاتىندا ترامۆاتولوگ، گاستروەنتورولوگ سەكىلدى دارىگەرلەردىڭ مۇلدەم جوقتىعىن، سونىڭ كەسىرىنەن سىرقات جاندار بۇلاردى ايلاپ كۇتەتىندىگى جايلى جازىپ جىبەرگەنىم بار. كوپ ۇزاماي كسەنيا بارابانوۆا دەگەننەن: «سىزگە قانداي كومەك كەرەك؟» دەگەن جاۋابى كەلدى. عاجاپ، مەن اكىمگە ساۋال جىبەرەمىن، ال ماعان قايداعى ءبىر كسەنيا بارابانوۆادان جاۋاپ كەلەدى. 

بىرىنشىدەن، مەن ءوز باسىما قاجەت دۇنيە سۇراپ وتىرعانىم جوق. مەن قالالىق ەمحانادا قالىپتاسقان قيىن جاعادايدى شەشۋدى ءوتىنىم وتىرمىن. ماعان ەگەر ءوزى بولماسا، نەگە وسى وبلىستىق دەنساۋلىق ساقتاۋ باسقارماسىنىڭ باسشىسى دۋدنيك نەمەسە ونىڭ ورىنباسارلانىڭ ءبىرى نەگە جاۋاپ بەرمەيدى؟ مەنى نەگە بارابانوۆا دەگەن ەشكىم بىلمەيتىن ادامعا يترە سالادى؟ كەيىن «باقسام - باقا ەكەن» دەگەندەي، ىزدەستىرىپ بايقاسام، بۇل كىسى سول دەنساۋلىق ساقتاۋ مەكەمەسىندە ءباسپاسوز حاتشىسى بولىپ قىزمەت ىستەيتىن كورىنەدى. مىنە، وبلىسىمىزدا دەنساۋلىق ساقتاۋ سالاسىنداعى قوردالاپىپ قالعان دۇنيەلەردى اكىم ەمەس، ول تاعايىنداعان ءتيىستى مەكەمەنىڭ باسشىسى ەمەس، ونىڭ ءباسپاسوز حاتشىسى شەشەتىن كورىنەدى. 

وزگە جاقتى بىلمەيمىن، بىزدەگى جاعداي وسىنداي.

جايبەرگەن بولاتوۆ

Abai.kz