22 تامىزدا الماتى، اقتاۋ جانە نۇر-سۇلتان قالالارىندا پوليتسيا وننان استام بەلسەندىنىڭ ۇيىنە ءتىنتۋ جاساپ، وزدەرىن ۇستاپ اكەتتى. پوليتسيا ونىڭ سەبەبىن «قىلمىستىق ءىس شەڭبەرىندەگى ءتىنتۋ امالدارى جۇرگىزىلدى» دەپ ءتۇسىندىردى.

سەنبى كۇنى ساعات 20.00 شاماسىندا ءبىر توپ الماتىلىق بەلسەندى مەن ۇستالعانداردىڭ تۋىستارى الماتى قالالىق پوليتسيا دەپارتامەنىنىڭ الدىنا جينالىپ، تۋىستارىن بوساتۋدى تالاپ ەتتى. بولعان جاعدايدى الماتىلىق بەلسەندى ۇلاسبەك احمەتوۆ Facebook پاراقشاسىندا تىكەلەي ەفير ارقىلى حابارلادى.

ۆيدەودا «بوستاندىق! بوستاندىق» دەپ ۇرانداتقان ادامدارعا جەرگىلىكتى پوليتسيا باسقارماسىنىڭ باستىعى سەرىك بايعوجاەۆ كەلىپ، باسۋ ايتتى، جينالعاندارى زاڭسىز ەكەنىن تۇسىندىرمەك بولدى. بىراق ونى نارازى جۇرت تىڭدامادى. «بەلسەندىلەر تەرروريست پە، ەكسترەميست پە؟» دەپ سۇراق جاۋدىرىپ، ولاردى دەرەۋ بوساتۋدى تالاپ ەتتى. كەيىن جينالعاندارمەن سويلەسۋگە الماتى قالالىق پوليتسيا دەپارتامەنتى باستىعىنىڭ ورىنباسارى پودپولكوۆنيك رۋستام ءابدىراحمانوۆ شىقتى. جينالعاندار وعان 11 ادامنىڭ ءتىزىمىن بەرىپ، ولاردى بوساتۋدى تالاپ ەتتى.

– ارنايى جاساق تاڭعى 7.00 شاماسىندا مەن ۇيدە جوقتا كامەلەتكە تولماعان بالامدى «كورشىمىز» دەپ الداپ ىشكە كىرىپ، ءۇيدىڭ استان-كەستەنىن شىعارىپ كەتكەن. بالامنىڭ كومپيۋتەرىنىڭ پروتسەسسورىن، تەلەفوندارىن الىپ كەتكەن. بۇل بانديتيزم ەمەي نەمەنە؟ – دەدى شارا جەكسەباەۆا.

ول كۇيەۋى اسحات جەكسەباەۆتى بوساتۋدى تالاپ ەتەتىنىن، ونى اقتاۋدان الماتىعا جەتكىزگەنىن ەستىگەنىن ايتتى.

– ون مينۋت ۋاقىت بەرەمىز. مىنا ءتىزىم بويىنشا ۇيىنە ءتىنتۋ جاسالىپ، الىپ كەتكەن بەلسەندىلەردىڭ قايدا ەكەنىن ايتىڭىزدار جانە بوساتىڭىزدار. باسقا پوليتسيا بولىمشەلەرى وسى دەپارتامەنتكە باعىنادى، سوندىقتان ءبىز باسقا جاقتان ىزدەمەيمىز، – دەدى جينالعاندار.

پوليتسيا قولىنا بەرىلگەن تىزىمدە دامەتكەن اسپاندياروۆا، قايرات قىلىشەۆ، اباي بەگىمبەتوۆ، ەرمەك قازيەۆ، مارات ايتباەۆ، الىبەك جىلقايداروۆ، بولات سماعۇلوۆ، نيناگۇل جۇمانيازوۆا، مەيىرحان ءابدىماناپوۆ، گۇلزيپا جاۋكەروۆا، ەلدار سمادياروۆ سەكىلدى بەلسەندىلەردىڭ اتى-ءجونى كورسەتىلگەن.

رۋستام ءابدىراحمانوۆ اباي بەگىمبەتوۆ پەن گۇلزيپا جاۋكەروۆامەن تەرگەۋ امالدارى ءجۇرىپ جاتقانىن ايتىپ، قالعاندارى بوساتىلعان دەدى.

بەلسەندى ۇلاسبەك احمەتوۆتىڭ ايتۋىنشا، قايرات قىلىشەۆتىڭ، مارات ايتباەۆتىڭ جانە مەيىرحان ءابدىماناپوۆتىڭ 8 تاۋلىككە قامالعان. ول ءدال وسىنداي جاعداي اقتاۋدا دا بولعانىن ايتتى. ونىڭ سوزىنشە، سەنبى، 22 تامىز كۇنى ارنايى جاساق اقتاۋدا جۇرگەن الماتىلىق بەلسەندىلەر ديانا بايماعامبەتوۆانى، نۇربول ونەرحاندى، بيبىگۇل مامايدى، ديدار قايىروۆتى جانە ەرلى-زايىپتى ايگۇل اقبەردى مەن ابلوۆاس جۇماەۆتى ءتىنتىپ، قاماۋعا العان. بەلسەندىنىڭ مالىمەتىنشە، نۇربول ونەرحان مەن ديدار قايىربەك 15 تاۋلىككە، بيبىگۇل ماماي 10 تاۋلىككە قامالعان.

Facebook جەلىسىندە تاراعان اقپاراتقا سايكەس، نۇر-سۇلتاندا پوليتسيا بەلسەندى اسقار قايىربەكتى كوشەدەن كۇشتەپ الىپ كەتكەن.

ازاتتىق ءتىلشىسى ۇستالعان بەلسەندىلەر تۋرالى قۇقىق قورعاۋ ورىندارى مەن سوت وكىلدەرىنە حابارلاسقانىمەن، جاۋاپ الا المادى.

Abai.kz