لۋكاشەنكو مينسكىدەگى نارازىلىق اكتسياسىنا اۆتومات اسىنىپ كەلدى
بەلارۋستىڭ قازىرگى پرەزيدەنتى الەكساندر لۋكاشەنكو مينسكىدە ءجۇز مىڭعا جۋىق ادام جينالعان قارسىلىق اكتسياسى اياسىندا ۇستىنە وق وتپەيتىن كەۋدەشە كيىپ، قولىنا اۆتومات ۇستاپ جۇرگەن. بۇل ۆيدەوكادرلار مەملەكەتتىك "بەلتا" اقپارات اگەنتتىگىندە جاريالاندى.
اگەنتتىك سونىمەن بىرگە لۋكاشەنكونىڭ تىكۇشاقپەن تاۋەلسىزدىك سارايى ۇستىنەن ۇشىپ بارا جاتقان ۆيدەوسىن دا جاريالادى. كادردا لۋكاشەنكونىڭ تومەن قاراپ، "ەگەۋقۇيرىق سەكىلدى قاشىپ كەتىپتى" دەگەن سوزدەرىن ەستۋگە بولادى.
ۆيدەودان لۋكاشەنكونىڭ 15 جاستاعى ۇلى نيكولايدى دا بايقاۋعا بولادى. ول دا وق وتپەيتىن كەۋدەشە مەن كاسكا كيگەن. ونىڭ قولىندا دا قارۋ بار.
جەكسەنبى كۇنى مينسكىدە الەكساندر لۋكاشەنكوعا قارسى جاڭا اكتسيا ءوتتى. حالىق تاۋەلسىزدىك الاڭىنا جينالدى. كەيىن پرەزيدەنت رەزيدەنتسياسىنا قاراي مارشپەن ءجۇردى. بىراق ولاردىڭ جولىن ومون جاپتى. لۋكاشەنكونىڭ ءباسپاسوز قىزمەتى مەملەكەت باسشىسىنىڭ كۇش قۇرىلىمى وكىلدەرىنا العىس ايتىپ جاتقان ۆيدەوسىن تاراتتى. وندا كەيبىرى "سىزبەن سوڭىنا دەيىن بىرگەمىز" دەپ جاۋاپ بەرىپ جاتادى.
بەلارۋستە جاپپاي قارسىلىق شاراسى ەكى اپتادان بەرى، 9 تامىزدا پرەزيدەنت سايلاۋى وتكەننەن كەيىن جالعاسىپ كەلەدى. نارازىلىق بىلدىرۋشىلەر سايلاۋ ناتيجەسى بۇرمالاندى، قاراپايىم حالىققا كۇش كورسەتتى دەيدى. ميتينگ كەزىندە كەمىندە ءۇش ادام قايتىس بولدى.
Abai.kz
