قر پرەزيدەنتى جانىنان قۇرىلعان ۇلتتىق قوعامدىق سەنىم كەڭەسىنىڭ قۇرامىنا كەزەكتى رەت روتاتسيا جاسالدى. بىرنەشە ادام كەڭەس قۇرامىنان شىعارىلدى. ولاردىڭ ورنىنا سونشالىق جاڭا مۇشەلەر قوسىلدى. 

بۇل تۋرالى اقوردانىڭ الەۋمەتتىك جەلىدەگى رەسمي حابارلاماسىندا ءمالىم بولدى. سونىمەن، ۇلتتىق كەڭەستىڭ جاڭا مۇشەلەرى كىمدەر؟ كىمدەر كەڭەس قۇرامىنان شىعارىلدى؟

جاڭا مۇشەلەرى:

دينا ەردىلدينوۆا, «دوس» تاۋەلسىز ءومىر ورتالىعى» مۇگەدەكتەر قوعامدىق بىرلەستىگىنىڭ ءتورايىمى;

قانات ساحاريانوۆ، «Atameken Business» تەلەارناسىنىڭ باس ديرەكتورى;

وركەن كەنجەبەك، جۋرناليست، بلوگەر;

ماكسيم روجين، مەديا ساراپشىسى;

ەمين اسكەروۆ، الەۋمەتتىك كاسىپكەر.

شىعارىلعاندار:

دانيار اشىمباەۆ،

مۇحتار تايجان، 

جانىبەك قوجىق،

سەيداحمەت قۇتتىقادام،

باعدات مۋسين. 

ءسويتىپ، وسىعان دەيىن ءۇش مارتە كەڭەيتىلگەن وتىرىس وتكىزگەن ۇلتتىق قوعامدىق سەنىم كەڭەسىنىڭ ەسكى مۇشەلەرى ناقتى نە ىستەدى؟ ۇلتتىق كەڭەستىڭ ەندىگى ەكس-مۇشەسى جانىبەك قوجىقتىڭ وسى تۋرالى پىكىرىن نازالارىڭىزعا ۇسىنامىز...

جانىبەك قوجىق، قوعام بەلسەندىسى:

- وتكەن جىلى ماعان ەرلان كارين ءىنىم حابارلاسىپ جاڭادان قۇرىلىپ جاتقان ۇلتتىق كەڭەستىڭ قۇرامىنا كىرۋىمدى سۇرادى. بۇل ۇسىنىستى ەكى جاقتى تارازىعا سالىپ بارىپ، كەلىسىم بەردىم.

سەبەبى، مەن كەڭەسكە ءوزىمنىڭ ابىرويىمدى، بيلىكتىڭ بەدەلىن كوتەرۋ ءۇشىن بارعان جوقپىن. مەنىڭ باستى ماقساتىم: مەملەكەت باسشىسىمەن كەزدەسەتىن مۇمكىندىكتى پايدالانا وتىرىپ، حالىقتىڭ، سونىڭ ىشىندە اۋىل حالقىنىڭ جانايقايىن توقاەۆ مىرزاعا بەتپە-بەت وتىرىپ جەتكىزگىم كەلدى. سەبەبى، ۇلتتىق كەڭەس مۇشەلەرىنىڭ ىشىندە اۋىلدىق جەردە تۇراتىن جالعىز ءوزىممىن.

ۇلتتىق قوعامدىق سەنىم كەڭەسىنىڭ 3 وتىرىسى ءوتتى.

العاشقى كەڭەستە ءبىز پرەزيدەنتكە ۇسىنىس ايتتىق. ەكىنشى وتىرىستا پرەزيدەنت ءبىزدىڭ ۇسىنىسىمىزعا جاۋاپ بەردى، ءۇشىنشىسى بيىل ونلاين تارتىبىمەن ءوتتى.

ۇلتتىق كەڭەستە ءۇش ۇسىنىس جاسادىم. ءبىرىنشىسى، زەينەتكەرلىك جاس تۋرالى. ايەل ادامداردى 55 جاس، ەر ازاماتتاردى 60 جاستا زەينەتكەرلىككە شىعارۋ تۋرالى. ەكىنشىسى، قازاقستان جەرىنە قىتايدىڭ 51 زاۋىتى سالىنۋىنا، قىتاي جۇمىسشىلارىنىڭ اعىلۋىنا نارازىلىعىمدى ءبىلدىردىم.

ءۇشىنشىسى، شەتەل جۇمىسشىلارىنا بەرىلەتىن كۆوتانى قىسقارتۋ، شەتەل جۇمىسشىلارىنىڭ ورنىنا ءوزىمىزدىڭ جۇمىسسىز جۇرگەن جاستارىمىزدى ورنالاستىرۋدى سۇرادىم.

ارينە، 44 قاتىسۋشىنىڭ ءبارى دە سويلەگىسى كەلەدى، بىراق، وعان مۇمكىندىك جوق. سوندىقتان دا ۇسىنىستارىمنىڭ كوبىن جازباشا بەردىم.

ۇلتتىق كەڭەسكە كىرگەنىمنەن حالىققا قانداي پايدا بولدى؟

پرەزدەنت قاسىم-جومارت توقاەۆ مىرزاعا، 06.09.2019 جىلعى ءبىرىنشى كەڭەستە «شەتەل جۇمىسشىلارىنا بەرىلەتىن كۆوتانى قىسقارتۋ»، «شەتەل جۇمىسشىلارى مەن ەلىمىزدىڭ جۇمىسشىلارى اراسىنداعى ادىلەتسىزدىكتى جويۋ» تۋرالى ۇسىنىس جاساعان بولاتىنمىن.

مەملەكەت باسشىسى، ق.توقاەۆ 20.12.2019 جىلعى ۇلتتىق كەڭەستىڭ ەكىنشى وتىرىسىندا مەنىڭ ۇسىنىسىما ناقتى جاۋاپ بەردى. جىل سايىنعى شەتەل جۇمىسشىلارىنا بەرىلەتىن كۆوتانى 49 مىڭنان 29 مىڭعا قىسقاتىپ، شەتەلدىك 95 كومپانيانى تەكسەرىپ، 330 زاڭ بۇزۋشىلىق انىقتاپ، ناقتى شارا قولداندى.

سونىڭ ارقاسىندا بيىل 20 مىڭ شەتەلدىك ەلدەن شىعارىلىپ، ونىڭ ورنىنا 20 مىڭ جۇمىسسىز جۇرگەن قازاقتىڭ بالاسى جۇمىسقا تۇردى. بۇل 20 مىڭ شاڭىراق، ءار ۇيدە 5 ادام بار دەسەك 100 مىڭ ادامعا نان بولدى دەگەن ءسوز. بۇل تەڭىزگە تامعان تامشىداي بولسا دا، ەلگە تيگىزگەن ۇلەسىم دەپ سانايمىن. كۇنى كەشەگە دەيىن ۇلتتىق كەڭەستىڭ اتىنان حالىقتىڭ جاعدايىن ايتىپ پرەزيدەنتكە ۇسىنىس حاتتار جولدادىم. ارينە، ول ۇسىنىستاردىڭ ورىندالعانى، ورىندالماعانى دا جەتەرلىك. مەن ۇلتتىق كەڭەستەن كەتسەم دە بۇل جۇمىستارىمدى توقتاتپايمىن.

ماعان ۇلتتىق كەڭەسكە كىرگەننەن، قانداي پايدا، قانداي زيان كوردىم؟

بىرىنشىدەن ۇلتتىق كەڭەسكە پايدا ويلاپ بارعان جوقپىن. مەملەكەتتەن كەڭەستە جۇرگەنىم ءۇشىن ءبىر تيىن جالاقى العان ەمەسپىن، بۇل قوعامدىق جۇمىس.

مەنى سىناپ جۇرگەن تالعات قاتاۋوۆ، جارىلعاپ قالىباي، گەرويحاندارعا ايتارىم: ەگەر دە مەن جەكە باسىمنىڭ پايداسىن ويلاسام، 2012 جىلدان بەرى جۇمىسسىز جۇرمەس ەدىم. ەگەر دە بايلىق كوزدەسەم، مەكەمە اشىپ، اكىمدەردەن تەندەر الىپ، شالقىپ جۇرەر ەدىم. بىراق، مەن ەشقاشان دا، بيلىكتىڭ، اكىمدەردىڭ الدىنا بارىپ، قىزمەت سۇراپ، جەكە باسىمنىڭ شارۋاسىن ايتقان ەمەسپىن.

بىراق ۇلتتىق كەڭەستىڭ قۇرامىنا كىرگەن كۇننەن باستاپ، «وپپوزيتسيادا» جۇرگەن كەيبىر «دوستارىم»: «جانىبەك قوجىق ەل مەن جەردى ساتتى، سول ءۇشىن بيلىككە كەتتى. جانىبەك قوجىق پرەزيدەنتتىڭ قاسىندا وتىر»، دەپ نەشە ءتۇرلى جالالار جاپتى. الەۋمەتتىك جەلىلەر ارقىلى ءالى دە وسەكتەر تاراتىپ جاتىر. ماعان ساياسي قارسىلاستارىمنىڭ بار تاعاتىن ەڭ ۇلكەن ايىبى: ۇلتتىق كەڭەسكە كىرگەنىم بولاتىن.

كەشە ۇلتتىق قوعامدىق سەنىم كەڭەسىنەن تەلەفون سوعىپ: «ۇلتتىق كەڭەستەگى وكىلەتتىگىڭىز توقتادى»، دەپ حابارلاعاندا شىنىمەن قۋانىپ كەتتىم. ءيا، شاقىردى. باردىم. ءسوز بەردى. حالىقتىڭ تىلەگىن ايتتىم. شەتەلدىك ءىرى كومپانيالاردا جۇمىس جاساپ جۇرگەن 20 مىن شەتەل ازاماتىن ەلدەن شاعارىپ، 20 مىڭ جۇمىسسىز جۇرگەن جاستار جۇمىسقا تۇرۋىنا سەبەپ بولدىم. ۇلتتىق كەڭەسكە كىرگەنىمە، شىققانىما دا ەشقانداي وكىنبەيمىن.

Abai.kz