الگىندە الەۋمەتتىك جەلىدە ءماجىلىس دەپۋتاتى بەكبولات تىلەۋحاننىڭ سەرىك بوقان دەيتىن ءجۋرناليستى جەر-جەبىرىنە جەتكىزە قارعاپ-سىلەپ جاتقان اۋديوسى تاراعان ەدى.

كەيىن بەلگىلى بولعانداي، اۋەلى سەرىك بوقان «Facebook» جەلىسىندە دەپۋتات تىلەۋحاندى تىلدەپ سويلەپ، جازبا جاريالاپتى. وندا ەل-جۇرتقا ەسىم-سويى ەرەكشە تانىس، كوبىنە حالىقشىل پىكىرىمەن جۇرت كوزىنە جاقسى كورىنىپ جۇرگەن ماجىلىسمەننىڭ (بەكبولات تىلەۋحاننىڭ) شىنداپ كەلگەندە سول حالىققا سىنىق سۇيەم پايداسى تيمەگەنى، شەكارا شەتىندەگى قانداستارعا دا، ەل ىشىندەگى ىندەتتى جۇرتقا دا كومەك قولىن سوزباعانى ايتىلعان.

وسىدان سوڭ، دەپۋتات بەكبولات تىلەۋحاننىڭ سەرىك بوقانعا قاراتا سويلەپ، «جازا بەر»، دەپ قارعىس جاۋدىرعان اۋديوسى تاراعان. جەلى قولدانۋشىلارى بەكەڭنىڭ بۇل ايتقاندارىن (قارعىسىن) جاپپاي سىناپ سويلەگەن. ال ءدىن عالىمدارى قارعاۋعا قاتىستى يسلام ءدىنىنىڭ ۇكىمى جايلى جازىپ جاتتى.

ۋاعىزدى نە ءۇشىن ايتامىز؟..

قايرات جولدىبايۇلى:

«مەنەن كەيبىر كىسىلەر قارعىس ايتۋدىڭ دىندەگى ۇكىمىن سۇراپ جاتىر. كەشىرىمدى بولۋ، وزىنە جامانشىلىق جاساعان، رەنجىتكەن ادامدار ءۇشىن اللادان جاقسىلىق تىلەۋ مۇسىلمان بالاسىنا جاراسادى. بۇل ەڭ اۋەلى كىسىنىڭ جۇرەگىن كەكتەن، ىزا مەن دۇشپاندىقتان ساقتايدى. سەنى رەنجىتكەن ادامعا دەگەن جۇرەگىڭدەگى دۇشپاندىقتى باسقا ەمەس، سول ادامعا ارنايى جاساعان ىزگى تىلەگىڭ عانا جۋىپ تازالايدى. كوكىرەككە كەك بايلاتپايدى. مەن مۇنى ءوز باسىم ءجيى قولدانامىن. ەكىنشىدەن شىنايى جاناشىرلىق. ابايدىڭ «ادامدى ءسۇي، اللانىڭ حيكمەتىن سەز» دەگەن ءپالساپاسى ءبىزدى وسىعان تاربيەلەيدى. ۋاعىزدى نە ءۇشىن ايتامىز؟ ادامدار ەكى دۇنيەدە دە جامانشىلىققا ۇشىراماسا ەكەن دەگەن جاناشىرلىقپەن ايتامىز. ەندەشە قارعىس، وسى نيەتىمىزگە كەراعار ارەكەت.

بىراق ومىردە نەشە ءتۇرلى جاعداي بولادى. ءتۇرلى زۇلىمدىققا ۇشىراعان كىسىنىڭ قاتتى جانى قىسىلعاندا اۋىزىنان ەرىكتى-ەرىكسىز قارعىس ءسوز شىعۋى دا مۇمكىن. بىراق ونى بىلايعى ۋاقىتتا رەنجىسكەن ءار ادامعا قولدانۋ دۇرىس ەمەس. ارى كەتسە، اللاعا تاپسىرعان ابزال. كەيدە ارى مەن نامىسىن ساقتاپ قالۋدىڭ باسقا جولى قالماعاندا، ناقاقتان جالا جاپقان ادامعا بارىپ «سەنىڭ ايتقانىڭ راس بولسا، قۇداي مەنى توبەمنەن ۇرسىن، ال جالعان بولسا سەنى ۇرسىن» دەپ بىرگە دۇعا ەتەيىك دەپ ۇسىنىس جاساۋعا رۇقسات. مۇنى دىندە «مۇلاعانا» دەيدى. كوپ جاعدايدا وزىنە سەنىمسىز تاراپ بۇدان باس تارتىپ جاتادى. بۇل بىراق اسا ءزارۋ جاعدايدا عانا جاسالادى. قارعىس جايلى قىسقاشا مالىمەتتەن كەيىن الەۋمەتتىك جەلىدە قىزۋ تالقىلانىپ جاتقان بەكەڭنىڭ اۋديوسى جايلى قىسقاشا عانا ايتايىن.

بەكەڭنىڭ جۇيكەسى سىر بەرگەنگە ۇقسايدى. شىن جانىم اشىدى. اللا بارشامىزدىڭ ءبىلىپ-بىلمەي ىستەگەن كۇنا، قاتەلىكتەرىمىزدى كەشىرسىن!

ۋا، اللام، بىزگە ادامداردىڭ جاقسى جاعىن كورە بىلەتىن كوز، ناشار جاعىن كەشىرە الاتىن جۇرەك، جاماندىقتى ۇمىتا الاتىن كوكىرەك، ەشقاشانداي جاعدايدا ءۇمىت پەن سەنىمىن جوعالپايتىن رۋح بەرە گور!»، - دەپ جازدى جەلىدە.

قارعىس ايتۋعا بولا ما؟

ال مۇحان يساحان:

«اللا ەلشىسى (س.ع.س.) مۇسىلمانداردى لاعىنەت جاساماۋعا شاقىرعان:

«اللانىڭ لاعىنەتى، ازاپ جانە توزاقپەن قارعاماڭدار» (تيرميزي، بيرر: 48).

«مۋمين لاعىنەت يەسى بولا المايدى» (ات-تاعريف، 3: 470).

«كەمەل مۇسىلمان ەشكىمگە جاماندىق جاسامايدى، ەشكىمدى قارعامايدى، اسىرا سىلتەمەيدى جانە ۇيات نارسەنى جاسامايدى» (تيرميزي، بيرر: 48).

«ادال ادامعا قارعاعان جاراسپايدى» (مۋسليم، بيرر: 84).

«ءبىر ادام ءمۋميندى لاعىنەتتەيتىن بولسا، ونى ولتىرگەن سياقتى كۇنا جاساعان بولادى... (تاجريد، 12: 139).»، - دەگەن جازبا قالدىردى.

«ەلشىل بوپ كورىنەتىن بەكبولات ەشكىمگە كومەكتەسكەن جوق»، دەپ سىناعان سەكەڭنىڭ جازباسى مەن «قارعايتىن ادامدارىمنىڭ تىزىمىنە قوسىلدىڭ» دەگەن بەكەڭنىڭ قارعىسى جەلىدە ءبىراز تالقى بولدى. بەلگىلى جۋرناليست سەرىك اباس-شاح تا جازبا جاريالادى. وسىدان ءبىراز بۇرىن بەكبولات تىلەۋحاننىڭ «قارعىسىنا قالعانىن» جازدى.

بەكەڭنىڭ قارعىسىنا قاتىستى جەلىدەگى ءسوزتالاس وسى باعىتتا ءوربىپ جاتتى. كەيىن سەرىك بوقاننىڭ العاشقى جازبالارى جەلىدەن وشىرىلگەنى ايتىلدى. ال وسىدان بىرنەشە كۇن بۇرىن سەرىك بوقان جەلىگە تاعى ءبىر جازبا جاريالاپتى. «بەكبولات اعا، جازدىم، جاڭىلدىم! كەشىرە گور! تەرىس باتاڭىزدى قايتىپ الىڭىز»، - دەپتى.

سەرىك بوقان:

«اسا قادىرلى بەكبولات-اعا! جازدىم، جاڭىلدىم! مەن بايعۇستى قۇداي ۇرىپ قالدى. كەشىرە كورشى، بەك-اعا! قينالعان كەزدە ءبارىمىز ءوزىڭدى پانا تۇتىپ، الدىڭا باراتىن ەك. بەتىمىزدى قايتارعان كەزىڭ از. ءسىزدىڭ ارقاڭىزدا قاجىعا باردىم. قارجىلاي كومەك بەرىپ باقتىڭىزدار. مەن بىلمەپپىن، قىتاي مەن وزبەكستاننان، مۇڭعۇليادان باس-اياعى 185 وتباسىن اكەلگەنىڭىزدى. وسى كوروناۆيرۋستىڭ كەزىندە 23 ميلليون تەڭگەگە حالىققا جاردەم ەتىپسىزدەر. مۇسىلمان بولعان سوڭ ريا قىلىپ، جاريا ەتپەپسىزدەر. كەيىن ءبىلدىم.

مەنى شايتان ءتۇرتتى. كۇيسەڭىز كۇيگەندەي-اق ەكەن. تەرىس باتاڭىزدى قايتىپ الىڭىز، اعا!!! ۇيقىم بۇزىلىپ، جانىم قينالا باستادى. قياناتىمدى كەشىرىپ، ءىنى قالپىمدا جانىڭىزدان الاستاماڭىزشى! الدىنا كەلسە، اتاسىنىڭ قۇنىن كەشەتىن تەكتىنىڭ تۇياعى ەدىڭىز عوي! مەن جاڭىلدىم. ءسىز كەشىرە كورىڭىز! سالەممەن سەرىك بوقان باۋىرىڭىز», - دەپ جازىپتى. سەرىكتىڭ بۇل جازباسى جەلىدا قىزۋ تالقىلانىپ جاتىر.

ال بەكبولات تىلەۋحان مىرزا دا «Facebook-تاعى» رەسمي پاراقشاسىندا سەرىكتى كەشىرگەنىن ايتىپتى.

بەكبولات تىلەۋحان:

«اداسقاننىڭ الدى - ءجون، ارتى - سوقپاق. ىنىدە ىزەت، اعادا ايبىن بولماسا، ەلدەن بەرەكەت قاشپاي ما؟  سەرىك باۋىرىم كەشىرىم سۇرادى. مەن نالامدى قايتارىپ الدىم. اللا الاشتى الاۋىزدىقتان، اعايىندى ارازدىقتان ساقتاسىن! اڭگىمەنىڭ نۇكتەسى - وسى!»، - دەپ جازىپتى.

سونىمەن ءبىر-بىرىنە قارعىس ايتىپ، قايتا كەشىرىمدەسكەن بۇل ەكەۋى كىم؟ قىسقا-نۇسقا:

بەكبولات تىلەۋحان – ءماجىلىس دەپۋتاتى. قاراعاندىنىڭ جاڭاارقاسىندا تۋعان. 2001-2002 جىلدارى قر مادەنيەت كوميتەتىن باسقارعان. 2002-2004 جىلدارى مادەنيەت ۆيتسە-ءمينيسترى بولعان.

2004-2007 جانە 2007-2011 جىلدارى ءماجىلىستىڭ III-IV شاقىرىلىمىنىڭ دەپۋتاتى بولعان. اراعا از-كەم ۋاقىت سالىپ، 2016 جىلى ماجىلىسكە قايتا سايلانعان. «نۇر وتان» پارتياسىنىڭ مۇشەسى.  قر ەڭبەك سىڭىرگەن ءارتىسى. بىرنەشە مەدال-وردەندەرمەن ماراپاتتالعان.

سەرىك بوقان – اقىن، جۋرناليست. شىعىس تۇركىستاندا تۋعان. «جاس قازاق ءۇنى» گازەتىندە، «ءۇن» جۋرنالىندا، «اسىل ارنا» تەلەارناسىندا قىزمەت اتقارعان. رەسپۋبليكالىق جىر ءمۇشايرالارىنىڭ جۇلدەگەرى.

Abai.kz