قازاقستان پرەزيدەنتى قاسىم-جومارت توقاەۆتىڭ سەمەي يادرولىق پوليگونىنىڭ جابىلعان كۇنىنە بايلانىستى ۇندەۋى

قۇرمەتتى وتانداستار!

وسىدان تۋرا 29 جىل بۇرىن، 29 تامىزدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆ يادرولىق قارۋ-جاراقتان باس تارتۋ تۋرالى تەڭدەسسىز تاريحي شەشىم قابىلداپ، انتيادرولىق قوزعالىستىڭ كوشباسشىلارىنىڭ ءبىرى بولدى. بىرىككەن ۇلتتار ۇيىمىنىڭ قاۋلىسىمەن 29 تامىز حالىقارالىق يادرولىق سىناقتارعا قارسى ءىس-قيمىل كۇنى دەپ جاريالاندى.

وسىلايشا، 450-دەن استام جارىلىس جاسالعان الەمدەگى ەڭ ءىرى يادرولىق سىناق الاڭىنىڭ ءبىرى – سەمەي پوليگونى، بۇرىنعى كەڭەس وداعى باسشىلىعىنىڭ قارسىلىعىنا قاراماستان، ءبىرجولا جابىلدى. بۇل وسكەلەڭ ۇرپاقتىڭ جارقىن كەلەشەگى مەن مەملەكەتىمىزدىڭ باياندى بولاشاعى جولىندا جاسالعان شەشۋشى قادام بولدى. سونىمەن قاتار الەمنىڭ ءار تۇكپىرىندەگى سىناق الاڭدارىنىڭ جابىلۋىنا جول اشقان باتىل باستاماعا اينالدى.

تاۋەلسىزدىكتى يادرولىق قارۋسىزدانۋ جانە جويقىن قارۋدى تاراتپاۋ جونىندەگى بەيبىت ۇستانىممەن قارسى الۋىمىز ەلباسىنىڭ ساياسي ەرىك-جىگەرى مەن ساليقالى ساياساتىنىڭ ارقاسىندا جۇزەگە اسقانى انىق.

ەلباسى نۇرسۇلتان ءابىشۇلى نازارباەۆ تاريحتا تۇڭعىش رەت يادرولىق پوليگوندى ءوز ەركىمەن جابۋ جونىندە پاراساتتى شەشىم قابىلداۋى ارقىلى الەمدەگى قاۋىپسىزدىكتى جانە بەيبىتشىلىكتى قامتاماسىز ەتۋگە زور ۇلەس قوستى.

وسى باتىل ارەكەت الەم تاريحىندا جارقىن بەت رەتىندە ماڭگى قالاتىنىنا كۇمانىم جوق.

قادىرلى قاۋىم!

قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ سەمەي يادرولىق پوليگونىن جابۋ تۋرالى جانە جاھاندىق قاۋىپسىزدىك جونىندەگى باسقا دا باستامالارى بەيبىتشىلىككە دەگەن بەرىك ۇستانىمىمىزدى ايقىنداپ بەردى.

ەلباسىنىڭ كورەگەن باسشىلىعىمەن مەملەكەتتى جويقىن قارۋسىز دامىتۋدىڭ الەمدىك بىرەگەي ۇلگىسى قالىپتاستى. ەلىمىز يادرولىق قاۋىپسىزدىك سالاسىنداعى حالىقارالىق قوزعالىستىڭ بەلسەندى مۇشەسىنە اينالدى.

تاۋەلسىزدىكتىڭ 30 جىلدىعى قارساڭىندا قازاقستان رەسپۋبليكاسى حالىقارالىق قاۋىپسىزدىكتى نىعايتۋ، مەملەكەتتەر اراسىنداعى ىنتىماقتاستىقتى دامىتۋ، جاھاندىق قاقتىعىستاردى بەيبىت جولمەن شەشۋ ىسىنە بەلسەنە اتسالىسا بەرەدى دەپ سەنىممەن ايتا الامىن.

قاسىم-جومارت توقاەۆ،

قازاقستان پرەزيدەنتى.

Abai.kz