قازاقستاندا قوعام نازارىنا ىلىككەن ءبىر ماسەلە پەداگوگ مارتەبەسىن كوتەرۋ بولاتىن. ال، بۇگىن قر ءبىلىم جانە عىلىم ءمينيسترى اسحات ايماعامبەتوۆ ۇستازدار مارتەبەسىن كوتەرۋ ءۇشىن قانداي جۇمىستار اتقارىلاتىنىن ايتتى.

«قازاقستان پرەزيدەنتى قاسىم-جومارت كەمەلۇلى ءبىلىم جانە عىلىم مينيسترلىگىنە "پەداگوگ مارتەبەسى تۋرالى" زاڭ نورمالارىن ىسكە اسىرۋ باعىتىندا ىستەلىپ جاتقان جۇمىستاردى جالعاستىرۋدى تاپسىردى. اتالعان زاڭ نورمالارىنداعى ماڭىزدى ەرەجەنىڭ ءبىرى – پەداگوگتاردى ءوز مىندەتىنە جاتپايتىن جۇمىستاردان، ورىنسىز ەسەپ بەرۋدەن بوساتۋ. اتالعان قۇجات جاڭا وقۋ جىلىنىڭ قارساڭىندا وتە وزەكتى» ،- دەگەن بولاتىن مينيستر ايماعامبەتوۆ.

ءبىلىم جانە عىلىم مينيسترلىگى بۇل ماسەلەنى قاشاندا نازاردا ۇستاپ كەلەدى. الايدا، بۇل ماسەلەدە ءالى دە ەرەجەلەردى بۇزۋ فاكتىلەرى كەزدەسەتىنى راس.

ماسەلەن، بىرنەشە كۇن بۇرىن تۇركىستان وبلىسىنداعى لەنگىر مەكتەپ-ينتەرناتىندا پەداگوگتەردىڭ تىكەلەي جۇمىسىنا، مىندەتىنە كىرمەيتىن جۇمىستارعا تارتىپ، سول ءۇشىن اكىمشىلىك ءىس قوزعالعان ەدى. اتالعان مينيسترلىكتىڭ ءبىلىم سالاسىندا ساپانى قامتاماسىز ەتۋ دەپارتامەنتى وقيعا ورنىنا بارىپ، قىزمەتتىك تەكسەرىس جۇرگىزگەن. ناتيجەسىندە، شاعىم بويىنشا فاكتىلەر راستالىپ، مەكتەپ ديرەكتورىنىڭ مىندەتىن اتقارۋشى ادام اكىمشىلىك جاۋاپكەرشىلىككە تارتىلعان بولاتىن.

سونىمەن قاتار، وسى ۋاقىتقا دەيىن تۇركىستان وبلىسىنىڭ كەنتاۋ قالاسىنداعى م.مۇسا اتىنداعى مەكتەپتە تەكسەرۋ ءجۇرىپ، ەرەجە بۇزىلعانى انىقتالعان. اتالعان مەكتەپتە پەداگوگ مەكتەپ جوندەۋ جۇمىستارىنا تارىتلعان. تەكسەرىس بارىسىندا اتالعان فاكتى راستالىپ، مەكتەپ ديرەكتورىنىڭ مىندەتىن اتقارۋشى ادام مەن كەنتاۋ قالالىق ءبىلىم ءبولىمىنىڭ قىزمەتكەرى اكىمشىلىك جاۋاپكەرشىلىككە تارتىلعان.

اسحات ايماعامبەتوۆتىڭ ايتۋىنشا، از عانا ۋاقىت ىشىندە ءبىلىم سالاسىندا ساپانى قامتاماسىز ەتۋ جونىندەگى اۋماقتىق دەپارتامەنتىنە جۇزدەگەن ءوتىنىش تۇسكەن. ناتيجەسىندە، وقۋشىلاردىڭ اتا-انالارى مەن لاۋازىمدى تۇلعالارعا قاتىستى 30-دان استام اكىمشىلىك جازا قولدانىلىپتى. بۇل جۇمىستار الداعى ۋاقىتتا دا تۇراقتى تۇردە جۇرگىزىلىپ وتىراتىن بولادى. سونىمەن قاتار، مۇنداي زاڭسىزدىققا جول بەرگەن جاۋاپتى تۇلعالارعا قاتىستى جازا تەك اكىمشىلىك جازامەن شەكتەلمەي، جۇمىستان بوساتۋ جايلى شەشىمدەر دە قابىلداناتىن بولادى.

پەداگوگتاردىڭ قۇقىعىن قورعاۋ مەكتەپ ديرەكتورلارىنىڭ دا، جەرگىلىكتى ايماقتىق مەكەمە باسشىلارىنىڭ دا تىكەلەي مىندەتىنە جاتادى. ارينە، بۇل تۇرعىدا پەداگوگتار دا وزدەرىنىڭ كاسىبي مىندەتتەرىن ادال ورىنداۋ ماسەلەسىنە دەن قويۋى ءتيىس. سەبەبى جاڭا زاڭنىڭ تالاپتارى دا باسقاشا.

-ۇستازدىقپەن اينالىساتىن ءاربىر ادام جاس ۇرپاققا ۇلگى بولىپ، كاسىبي قىزمەتىندە مورالدىق قۇندىلىقتار مەن ادامگەرشىلىك قاعيدالاردى نەگىزگە الۋى ءتيىس. ونىڭ ىشىندە ادامنىڭ قادىر-قاسيەتى مەن ار-نامىسىن قۇرمەتتەۋ، مىنەز-قۇلىق مادەنيەتى، ادالدىق پەن ادەپتىلىك ۇستازدىق ەتيكانىڭ نەگىزى. وسى قاعيداتتاردىڭ ساقتالۋى ءۇشىن ءبىز پەداگوگتەرگە قاتىستى قۇقىقبۇزۋشىلىقتار مەن پەداگوگيكالىق ەتيكانى ورەسكەل بۇزعان داۋلى ماسەلەلەردى قاراستىراتىن ارنايى ورگان قۇرۋ باستاماسىن ىسكە اسىرىپ جاتىرمىز. اتالعان ورگان مۇعالىمدەردىڭ قۇقىتارىن قورعاۋ جانە پەداگوگيكالىق ەتيكا جونىندەگى كەڭەس بولىپ تابىلادى,- دەدى ءبىلىم جانە عىلىم ءمينيسترى.

اتالعان ورگان پيلوتتىق رەجيمدە العاش رەت وسى جىلدىڭ تامىز ايىندا نۇر-سۇلتان قالاسىندا ءوز جۇمىسىن باستاعان. الايدا، كەلەشەكتە ادەپ بويىنشا كەڭەستەر ەلىمىزدىڭ بارلىق ايماعىندا قۇرىلماق. ينستيتۋت مينيسترلىك جانىنداعى ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرى جانىنان جۇمىس ىستەيتىن بولادى.

-ءبىز مەملەكەتتىك قىزمەتكەرلەردىڭ ەتيكا جونىندەگى كەڭەسىنىڭ ءتيىمدى جۇمىستارىنا كۋا بولدىق.ال، جاڭادان قۇرىلعان كەڭەس قىزمەتى دە سولاردىڭ ۇلگىسى بويىنشا جۇزەگە اسادى. جانە بۇل ۇلكەن باستاما. ياعني، ءار مۇعالىم ءوز مارتەبەسىن ماقتان تۇتۋى ءتيىس. ساپالى ءبىلىم بەرۋى ءۇشىن ىڭعايلى جاعدايدا جۇمىس ىستەۋى ءتيىس. سەبەبى، ءبىلىمدى ۇستازداردىڭ قولىندا ءبىزدىڭ بالالارىمىزدىڭ ءبىلىمى مەن ءال-اۋقاتى بار،- دەدى اسحات ايماعامبەتوۆ.

ايتا كەتەيىك، 2019 جىلدىڭ جەلتوقسان ايىندا مەملەكەت باسشىسى قاسىم-جومارت توقاەۆ پەداگوگ مارتەبەسى تۋرالى زاڭعا قول قويعان بولاتىن. اتالعان زاڭدا مۇعالىمدەردىڭ ەتيكا ماسەلەلەرىنە باسا نازار اۋدارىلعان. سونىمەن قاتار ۇستازدارا داپتەر تەكسەرگەنى ءۇشىن تولەنەتىن قوسىمشا اقى كولەمى ەكى ەسەگە ۇلعايتىلعان ەدى. ودان بولەك، جەرگىلىكتى اتقارۋشى ورگاندار 300 ايلىق ەسەپتىك كورسەتكىش كولەمىندە مۇعالىمدەرگە قوسىمشا اقى تولەۋگە قۇقىلى ەكەنى ايتىلعان.

Abai.kz