سوتپەن تىيىم سالىنعان "كوشە پارتياسىنا" قاتىسى بار دەپ كۇدىككە ىلىنگەن بەلسەندى، الماتى وبلىسىنىڭ تۇرعىنى قايرات قىلىشەۆ ۇستالدى. بۇل تۋرالى بەلسەندىنىڭ ادۆوكاتى عالىم نۇرپەيىسوۆكە سىلتەمە جاساعان Vlast سايتى حابارلادى.

ادۆوكاتتىڭ ايتۋىنشا، بەلسەندىگە قىلمىستىق كودەكستىڭ 405-باپ، 2-بولىگى ("تىيىم سالىنعان ۇيىمنىڭ ىسىنە ارالاسۋ") بويىنشا ايىپ تاعىلعان. بۇعان دەيىن بەلسەندىلەر اسحات جەكسەباەۆ پەن اباي بەگىمبەت تە وسىنداي كۇدىككە ءىلىنىپ، قاماۋعا الىنعان ەدى.

"ەسىل اۋداندىق سوتى قىزمەتىنە تىيىم سالعان "كوشە پارتياسى" قوزعالىسىن ناسيحاتتاپ، ىسىنە ارالاستى دەگەن كۇدىكپەن [ۇستادى]. قازىر ول ۋاقىتشا قاماۋ يزولياتورىندا بولۋى ءتيىس" دەدى ادۆوكات.

ازاتتىق بۇعان دەيىن قىلىشەۆتىڭ تامىز ايىنىڭ باسىندا وتكەن دۋلات اعادىلدىڭ اسىنان كەيىن "بەيبىت شەرۋگە قاتىستى" دەپ ايىپتالىپ، 8 تاۋلىككە قامالعانىن جازعان ەدى. نۇرپەيىسوۆتىڭ ايتۋىنشا، ونى اكىمشىلىك قاماۋدان شىققان جەردەن پوليتسيا دەپارتامەنتىنە الىپ كەتكەن.

ازاتتىق ءتىلشىسى ازىرگە پوليتسيادان جاۋاپ الا المادى.

مامىر ايىندا سوت "كوشە پارتياسىن" ەلدە ەكسترەميستىك دەپ تانىلعان "قازاقستاننىڭ دەموكراتيالىق تاڭداۋى" (قدت) قوزعالىسىمەن ءبىر ۇيىم دەپ تانىپ، قىزمەتىنە تىيىم سالعان ەدى. قازاقستان سوتى "ەكسترەميستىك" دەپ تانىعان قدت-نى ەۋروپارلامەنت 2019 جىلعى ناۋرىز ايىنداعى قارارىندا "بەيبىت وپپوزيتسيالىق قوزعالىس" دەپ اتاعان. ونىڭ جەتكشىسى وپپوزيتسيالىق ساياساتكەر مۇحتار ءابليازوۆ قدت تۋرالى سوت شەشىمىنىڭ ساياسي استارى بار دەپ سانايدى. "كوشە پارتياسى" مەن قدت قىزمەتىنە تىيىم سالۋ تۋرالى سوت شەشىمدەرى جاريالانبادى. بۇل ۇيىمنىڭ جاقتاستارى شەشىمنىڭ ساياسي استارى بار دەپ سانايدى.

Abai.kz