وسى ايدىڭ ىشىندە قر ءبىلىم جانە عىلىم مينيسترلىگىنە قاراستى بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى عالىمدارى ازىرلەگەن ۆاكتسينا 244 ەرىكتىگە سالىنادى.

«2020 جىلدىڭ قىركۇيەگىندە 244 ەرىكتىگە ۆاكتسينانى كلينيكالىق سىناۋ باستالادى. ونىڭ ىشىندە 44-ءى ۆاكتسينانى كلينيكالىق سىناقتىڭ ءبىرىنشى فازاسىندا، ال قالعاندارى ەكىنشى فازاسىندا الادى» دەلىنگەن اتالعان ينستيتۋتتىڭ Facebook پاراقشاسىندا جاريالانعان اقپاراتتا.

ەستەرىڭىزگە سالا كەتسەك، دۇنيەجۇزىلىك دەنساۋلىق ساقتاۋ ۇيىمى (دسۇ) قر بعم بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى جاساپ شىعارعان ەكپەنى رەسمي تۇردە كلينيكالىق سىناقتارعا جىبەرىلگەن ۆاكتسينالار تىزىمىنە قوستى.

دۇنيەجۇزىلىك دەنساۋلىق ساقتاۋ ۇيىمىنىڭ كلينيكالىق سىناققا جىبەرىلگەن ۆاكتسينالار تىزىمىنە ۇلىبريتانيا، قىتاي، رەسەي، اقش، گەرمانيا، جاپونيا، ءۇندىستان، وڭتۇستىك كورەيا، بەلگيا، شۆەتسيا، سينگاپۋر، يتاليا، اۋستراليا، تايۆان، كۋبا، فرانتسيا، اۋستريا جانە كانادا سەكىلدى ەلدەردىڭ كومپانيالارى نەمەسە زەرتتەۋ ينستيتۋتتارى جاساپ شىعارعان 33 ۆاكتسينا كىرگەن.

Abai.kz