قىتاي تاجىكستاندا جاڭا اسكەري بازاسىن اشۋدى قاراستىرىپ جاتىر دەپ مالىمدەدى اقش-تىڭ قورعانىس مينيسترلىگى كونگرەسس مۇشەلەرىنە ارنالعان بايانداماسىندا.

«قىتاي مايانمۋ، تايلاند، سينگاپۋر، يندونەزيا، پاكىستان، شري-لانكا، بىرىككەن اراب امىرلىگى، كەنيا، سەيشەلى، تانزانيا، انگولا جانە تاجىكستاننان جاڭادان اسكەري-لوگيستيكالىق نىساندارىن ورنالاستىرۋدى قاراستىرىپ جاتىر»، – دەلىنگەن 200 بەتتىك قۇجاتتا.

قازىر تاجىكستاندا رەسەيدىڭ اسكەري بازاسى بار، وندا 7 مىڭ سارباز قىزمەت ەتەدى.

امەريكالىق ساراپشىلاردىڭ ەسەبى بويىنشا، بەيجىڭنىڭ ماقساتى قىتاي ىقپالدى الەمدىك دەرجاۆالى ەل بولۋعا ۇمتىلىپ، قۇراما شتاتتارمەن باسەكەلەس بولعىسى كەلەدى.

باياندامادا بەيجىڭنىڭ الداعى ون جىل ىشىندە يادرولىق قارۋدى ەكى ەسەگە كۇشەيتۋگە نيەتتى ەكەنى ايتىلعان. بىراق قىتايدىڭ سىرتقى ىستەر مينيسترلىگى پەنتاگوننىڭ بۇل بايانداماسىن تەرىسكە شىعارىپ وتىر.

بىلتىر اقپان ايىندا Washington Post گازەتى تاجىكستاننىڭ تاۋلى-باداحشان اۆتونومدى وبلىسىنداعى جەرگىلىكتى تۇرعىنداردىڭ سوزدەرىنە سىلتەمە جاساپ، قىتايمەن شەكارالاس ايماقتا بەيجىڭنىڭ ءۇش بىردەي قۇپيا اسكەري بازاسى بار ەكەنىن جازعان. XIX عاسىردا بۇل اۋداندى رەسەي يمپەرياسىنىڭ كازاك اسكەرلەرى كۇزەتەتىن.

«سپۋتنيك ارقىلى تۇسىرىلگەن ۆيدەودان بۇل ماڭايدان ەكى عيماراتتى كورۋگە بولادى. بۇل كەشەن اۋعانستانمەن شەكارالاس ماڭدا ورنالاسقان. ونداعى اسكەر اۋعانستاننان تاجىكستانعا باراتىن ۇلكەن تاس جولدى كۇزەتەدى»، - دەلىنگەن ماقالادا.

Washington Post ءجۋرناليسى مۋرگاب بازارىندا اسكەري فورمادا جۇرگەن قىتاي ساربازىن سۋرەتكە ءتۇسىرىپ العان.

الايدا تاۋلى-باداحشان اۆتونومدى وبلىسىنىڭ توراعاسى يودگور فايزوۆ بۇل وڭىردە قىتايدىڭ اسكەري بازاسى بار دەگەن اقپاراتتى تەرىسكە شىعاردى. وندا تەك شەكارا بەكەتى عانا بار دەگەن.

اۋعانستاننىڭ تاجىكستانمەن، قىتايمەن جانە پاكىستانمەن شەكتەسەتىن تاۋلى ۆاحان دالىزىندە 2012 جىلدان بەرى قىتايدىڭ قارۋلى پوليتسياسى بار.

2018 جىلدىڭ جازىندا قىتاي اۋعاننىڭ باداحشان اۋماعىنان تەرروريزممەن كۇرەس ماقساتىندا وقۋ-جاتتىعۋ لاگەرىن قۇرعان. بۇل مالىمەتتى South China Morning Post گازەتى دەرەككوزىنە سىلتەمە جاساپ حابارلاعان بولاتىن. بىراق بۇل اقپاراتتى كابۋل راستاماعان.

ساراپشىلار پىكىرىنشە، بەيجىڭ شىعىس تۇركىستان يسلام قوزعالىسى عانا ەمەس، "يسلام مەملەكەتى" تەرروريستىك ۇيىمى قىتايدىڭ باتىسىنداعى شىڭجاڭ ۇيعىر اۋدانىنا ىقپال ەتۋى مۇمكىن دەپ قاۋىپتەنەدى.

Abai.kz