مينسك قالاسىندا نارازىلىق اكتسيالارىنان حابار تاراتۋ كەزىندە ۇستالعان جۋرناليستەردى 2 قىركۇيەكتە سوتتايدى.

TUT.BY جۋرناليستەرى نادەجدا كالينينا مەن الەكسەي سۋدنيكوۆ، "كومسومولسكايا پراۆدا: بەلارۋس" جۋرناليستەرى ​سەرگەي ششەگولەۆ، نيكيتا دۋبولەكو جانە ماريا ەلەشەۆيچ، سونىمەن بىرگە بەلاپان ءتىلشىسى اندرەي شاۆليۋگو قازىر ىشكى ىستەر باسقارماسىندا وتىر.

TUT.BY باسىلىمىنىڭ حابارلاۋىنشا، وكتيابر اۋداندىق ىشكى ىستەر عيماراتىنا جۋرناليستەردى قولداۋشىلار جينالىپ جاتىر. ارىپتەستەرىن قولداعان كەيبىر جۋرناليست وسىندا تۇنەدى. مۇندا قىرىق شاقتى ادام جينالدى.

بەلارۋس جۋرناليستەر قاۋىمداستىعى ۇستالعانداردى تەز ارادا بوساتۋدى تالاپ ەتتى. "زاڭ ورەسكەل بۇزىلدى!" دەپ مالىمدەدى ۇيىم.

ۇستالعان جۋرناليستەردىڭ بارلىعى مينسك قالاسىندا ءوتىپ جاتقان نارازىلىق اكتسيالارىنان حابار تاراتىپ جۇرگەن.

TUT.BY باسىلىمىنىڭ حابارلاۋىنشا، سايلاۋ ناۋقانى باستالعالى بەرى بۇل سايتتىڭ جۋرناليستەرى ون شاقتى رەت ۇستالدى.

29 تامىزدا مينسك "ناستوياششەە ۆرەميا" تەلەارناسىنىڭ ءتىلشىسى رومان ۆاسيۋكوۆيچتىڭ اككرەديتاتسياسىن قايتارىپ الدى. بۇعان قوسا ازاتتىق راديوسى بەلارۋس قىزمەتىنىڭ، ARD نەمىس تەلەارناسىنىڭ، ۆۆس، Reuters, AFP, Associated Press جانە RFi تىلشىلەرىنىڭ اككرەديتاتسياسى توقتاتىلدى. بۇل قۇجاتسىز تىلشىلەر ەلدە جۇمىس ىستەي المايدى.

Abai.kz