قازاقستان ماۋسىم ايىنان باستاپ رەسەيگە قارا مەتال سىنىقتارىن ەكسپورتتاۋدى توقتاتتى. قازاقستاننىڭ بۇل شەشىمىنە نارازى بولعان رەسەي ەۋرازيالىق ەكونوميكالىق كوميسسياعا (ەەك) شاعىم تۇسىرگەن. بۇل تۋرالى LS سايتى جازدى.

مەتال سىنىقتارىنىڭ ورنىنا قازاقستان دايىن ءونىم رەتىندە بولاتتى ەكسپورتتايدى. الايدا ەەك قازاقستاننىڭ بۇل ارەكەتىن وداقتاستار اراسىنداعى ساۋدا بايلانىسىنا كەدەرگى كەلتىردى دەپ قاراستىرادى.

ستاتيستيكا كوميتەتىنىڭ حابارلاۋىنشا، 2019 جىلى قازاقستان رەسەيگە 203,6 ملن دوللارعا 947,8 مىڭ توننا مەتال سىنىقتارىن جونەلتسە، 2020 جىلدىڭ ءبىرىنشى جارتىجىلدىعىندا 34,4 مىڭ دوللارعا 283,8 مىڭ توننا سىنىق ەكسپورتتالعان.

رەسەيدىڭ مەتاللۋرگيالىق كومپانياسىنداعى دەرەككوزگە سۇيەنسەك، مامىر ايىنان باستاپ قازاقستاننان جەتكىزىلەتىن مەتال سىنىقتارى ءۇش ەسەگە ازايىپ، ماۋسىم ايىنان باستاپ ەكسپورت تولىعىمەن توقتاعان.

ەەك قورىتىندىسىنا سايكەس، 10 ماۋسىمدا «قازاقستان تەمىر جولىنىڭ» ەنشىلەس كاسىپورنى - «KTZ-Freight Freight» ەكسپورتقا جونەلتىلگەن قارا جانە ءتۇستى مەتال سىنىقتارى مەن قالدىقتارى تيەلگەن ۆاگونداردى تاسىمالداۋعا تىيىم سالعان بۇيرىق شىعاردى. ال، 2018 جىلدان باستاپ قازاقستاندا قارا جانە ءتۇستى مەتالدار سىنىقتارى مەن قالدىقتارىن اۆتوموبيلمەن تاسىمالداۋعا تىيىم سالىنعان بولاتىن.

بارەر قۇرۋ تۋرالى ماسەلە ەكىجاقتى كەلىسسوزدەر كەزىندە تالقىلانۋى مۇمكىن نەمەسە ەەك القاسىنىڭ تالقىسىنا سالىنادى. ءىستىڭ سوتقا جەتۋى ەكىتالاي.

Abai.kz