بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

ءماجىلىس ءبىرىنشى وقىلىمدا دەپۋتاتتار ازىرلەگەن  قازاقستاننىڭ شەگىنەن تىس جەرگە شىعارىپ جىبەرۋ كەزىندە ۇستاۋ مەرزىمدەرىن رەتتەۋ ماسەلەلەرىنە قاتىستى  زاڭ جوباسىن قارايدى.

سونىمەن قاتار، پالاتانىڭ الداعى جالپى وتىرىسىندا بىرقاتار راتيفيكاتسيالىق زاڭ جوبالارى تالقىلاناتىن بولادى. اتاپ ايتقاندا،  شىۇ مۇشە مەملەكەتتەر اراسىنداعى بىرلەسكەن اسكەري وقۋ-جاتتىعۋلار وتكىزۋ تۋرالى، سونداي-اق، قازاقستان مەن ليۋكسەمبۋرگ اراسىنداعى تابىس پەن كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كەلىسىمدەر بويىنشا زاڭ جوبالارى.

كۇن ءتارتىبىنىڭ جوباسىندا «نوتاريات تۋرالى» زاڭ جوباسىن جۇمىسقا الۋ كوزدەلگەن. وسىنىڭ قاتارىندا ەاەو مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ جانە كەدەن وداعىنا مۇشە مەملەكەتتەردىڭ كەدەن قىزمەتتەرىنىڭ بىرىككەن القاسى تۋرالى شارتقا وزگەرىستەر ەنگىزۋ تۋرالى قۇجاتتاردى راتيفيكاتسيالاۋعا قاتىستى زاڭ جوبالارى بار.

Abai.kz