كۇنى كەشە ورتالىق سايلاۋ كوميسسياسىنىڭ توراعاسى بەرىك يماشەۆ رەسپۋبليكالىق ماڭىزى بار ءۇش قالا مەن 14 وبلىستىڭ سەناتورلارىنا دەپۋتات كۋالىگىن تابىس ەتتى. ءسويتىپ، سەناتتىڭ جاڭا دەپۋتاتتارى ورتالىق سايلاۋ كوميسسياسىنا رەسمي تۇردە تىركەلدى.

ال، كۋالىك تاپسىرۋ ءراسىمى ورتالىق سايلاۋ كوميسسياسىنىڭ سايتىندا تىكەلەي ەفيردە كورسەتىلگەن بولاتىن. جيىندا ءسوز العان بەرىك يماشەۆ جاڭا سايلانعان دەپۋتاتتاردى وكىلەتتىگىمەن قۇتتىقتاپ، جۇمىستارىنا ساتتىلىك تىلەدى.

«سىزدەردىڭ پارلامەنت سەناتىنىڭ دەپۋتاتى رەتىندەگى وكىلەتتىكتەرىڭىز ورتالىق سايلاۋ كوميسسياسىنا تىركەلگەن ساتتەن باستاپ كۇشىنە ەنەدى. قىمباتتى دەپۋتاتتار، قۇتتىقتاۋىمدى قابىل الىڭىزدار! جۇمىستارىڭىزدىڭ جەمىستى بولۋىن تىلەيمىن!

بۇل ناۋقاندى ءبىز پاندەميا جاعدايىندا وتكىزدىك. سوندىقتان دا بۇل كەزەڭ تاريحتا قالادى. الايدا، كەلەسى سايلاۋ مۇنداي بولمايدى دەپ ۇمىتتەنەمىن»،- دەدى ورتالىق سايلاۋ كوميسسياسىنىڭ توراعاسى.

ال، دەپۋتات بولىپ قايتا سايلانعان ولگا پەرەپەچينا دەپۋتات بولۋ ارقىلى قوعام يگىلىگى مەن مەملەكەتكە قىزمەت ەتۋگە دايار ەكەندىكتەرىن ايتتى.

-سايلاۋشىلاردىڭ مۇددەسىن قورعاۋ جانە دەپۋتات بولۋ – جاۋاپكەرشىلىكپەن ۇلكەن ابىرويدى قاجەت ەتەدى. ءبىز، سايلانعان پارلامەنت دەپۋتاتتارى، مەملەكەت پەن قوعام يگىلىگى ءۇشىن قىزمەت ەتۋگە دايىنبىز.

سونىمەن قاتار، قازاقستان پرەزيدەنتىنىڭ جوعارى سەنىمىن اقتاۋعا، سايلاۋشىلارىمىز بەن ءوز وڭىرلەرىمىزدىڭ اتىنان لايىقتى جۇمىس ىستەۋگە بار كۇش-جىگەرىمىزدى سالامىز،- دەدى پەرەپەچينا.

بۇل سايلانعان دەپۋتاتتاردىڭ 7-ەۋىن ءماسليحات ۇسىنسا، 9 دەپۋتات ءوزىن-ءوزى ۇسىنعان. سەنات دەپۋتاتتىعىنا ۇسىنىلعان كانديداتتاردىڭ ورتاشا جاسى – 56,7 جاس بولعان. سايلاۋ كوميسسيالارى اتالعان ۇيىمداستىرۋشىلىق شارالاردى سايلاۋ زاڭىندا كورسەتىلگەن بارلىق تالاپتاردى ساقتاي وتىرىپ جۇرگىزگەن.

ايتا كەتەيىك، بۇعان دەيىن قر سەنات توراعاسى ماۋلەن اشىمباەۆ ەلىمىزدە 12 تامىز كۇنى وتكەن سەنات دەپۋتاتتارىنىڭ سايلاۋى جونىندە ايتقان بولاتىن. ياعني، قولدانىستاعى زاڭناماعا سايكەس رەسپۋبليكالىق ماڭىزى بار قالالار مەن ءار وبلىستان سايلاناتىن 17 سەناتوردى ءماسليحات دەپۋتاتتارى سايلايتىنىنا نازار اۋدارعان ەدى.

سونىمەن قاتار اتالعان جازبادا جوعارعى پالاتا قۇرامىنىڭ ءبىر بولىگى ءار ءۇش جىل سايىن جاڭارتىلىپ وتىراتىنى ايتىلعان. جانە، سەناتتا قوعامنىڭ ۇلتتىق مۇددەلەرىنىڭ ءبىلدىرىلۋىن قامتاماسىز ەتۋ قاجەتتىگىن ەسكەرىپ، پالاتانىڭ 15 دەپۋتاتىن قر پرەزيدەنتى تاعايىندايتىنى جونىندە جازىلعان.

-سەنات زاڭ شىعارۋشى بيلىك جۇيەسىنە سايكەس، ەلىمىزدىڭ بارلىق ءوڭىرىنىڭ پارلامەنتتەگى وكىلدىگىن، ءماجىلىس قۇرامى جاڭارعان كەزەڭدەگى زاڭنامالىق ساياساتتىڭ ساباقتاستىعىن سونىمەن قاتار زاڭ جوبالارىن ساپالى دەڭگەيدە قاراستىرۋدى قامتاماسىز ەتەدى. ال، ءماجىلىس دەپۋتاتتارىنىڭ قازاقستان حالقى اسسامبلەياسىنان جانە پارتيالىق تىزىمدەر بويىنشا سايلاناتىنىن نازارعا الساق، سەناتتا ءوڭىر مۇددەلەرىنىڭ ءبىلدىرىلۋى اسا ماڭىزدى،- دەدى ماۋلەن اشىمباەۆ.

سونداي-اق ماۋلەن اشىمباەۆ قابىلدانعان زاڭداردى ساپالى پىسىقتاۋ زاڭ شىعارۋشى بيلىكتى ۇيىمداستىرۋدىڭ قازىرگى جۇيەسىمەن استاسىپ جاتاتىنىن ايتتى.

-زاڭ قابىلداۋ جۇمىستارىنىڭ ساپاسى تۇتاس ەلدىڭ تىنىس-تىرشىلىگى مەن مەملەكەتتىك ورگانداردىڭ نورمالارىنا ىقپال ەتەدى. سوندىقتان دا اتالعان ماسەلە تەرەڭ ءارى جان-جاقتى زەرتتەلىپ، زاڭ قابىلداۋ جۇمىستارى كەزەڭ-كەزەڭمەن جانە قيسىندى جۇرگىزىلۋى ءتيىس.

سەبەبى، قابىلدانعان ءار زاڭ ناقتى ادامدار مەن ونداعان مىڭ وتباسىنىڭ تىنىس-تىرشىلىگىنە تىكەلەي اسەر ەتەدى. بۇل تۇرعىدا پارلامەنت پالاتالارىنىڭ جۇمىسى زاڭ قابىلداۋ جۇمىسىنىڭ مۇمكىندىگىنشە تەڭگەرىمدى ءارى ءتيىمدى بولۋىنا مۇمكىندىك بەرەدى. سوندىقتان دا زاڭ ءار ازاماتتىڭ مۇددەسىن ەسكەرە وتىرىپ قابىلدانۋى ءتيىس، - دەپ جازىلعان.

ارينە، قر پرەزيدەنتى ۇسىنعان حالىقتىڭ ءال-اۋقاتىن ارتتىرۋعا جانە ەكونوميكالىق وسۋگە ارنالعان جاڭعىرتۋ باعدارىن زاڭنامالىق تۇرعىدان قاماتاماسىز ەتۋدە دەپۋتاتتاردىڭ ءرولى ايرىقشا. سونىمەن قاتار، كوروناۆيرۋس پاندەمياسىنىڭ سالدارىمەن كۇرەسۋ باعىتىندا قۇقىقتىق بازانى جەتىلدىرۋ اسا ماڭىزدى مىندەت. الداعى ۋاقىتتا وسى سايلانعان دەپۋتاتتار ءتيىستى وكىلەتتىكتەرىن العان ساتتەن باستاپ، جوعارىدا كورسەتىلگەن ستراتەگيالىق مىندەتتەردى ورىنداۋعا بەلسەنە اتسالىسىپ، جۇمىس ىستەيدى دەپ سەنەمىن،- دەگەن بولاتىن سەنات توراعاسى.

سونىمەن قر سەناتىنا جاڭادان سايلانعان 17 دەپۋتات:

اقىلبەك كۇرىشباەۆ 

ماكەجانوۆ سۇلتانبەك الماسبەكۇلىنا 

ايگۇل قاپباروۆا 

نۇرلان بەكەنوۆ

باۋىرجان قانيەۆ   

ساعىندىق لۇقپانوۆ

لياززات رىسبەكوۆا

بەكبولات ورىنبەكوۆ

سەرگەي كارپليۋك

اقمارال ءالنازاروۆا

سۇيىندىك الداشەۆ

التىنبەك نۋحۇلى

ولگا پەرەپەچينا

ءالي بەكتاەۆ

ولگا بۋلاۆكينا

سۇلتان ديۋسەمبينوۆ

سەرگەي ەرشوۆ

 Abai.kz