وتكەن جەكسەنبىدە مينسكىدە پرەزيدەنت الەكساندر لۋكاشەنكوعا قارسى نارازىلىق اكتسياسى كەزىندە 200-گە جۋىق ادام ۇستالعان. مۇنداي مالىمەتتى بەلارۋستىڭ "ۆەسنا" قۇقىق قورعاۋ ورتالىعى كەلتىردى.

ۇستالعانداردىڭ اتى-ءجونى ۇيىم سايتىندا جاريالاندى. الى تولىقتىرىلىپ جاتىر. بەلارۋس ىشكى ىستەر مينيسترلىگى نارازىلىق اكتسياسىندا كەمىندە 100 ادامنىڭ ۇستالعانىن راستادى.

باق وكىلدەرى مەن قۇقىق قورعاۋشىلار گرودنو، برەست، بارانوۆيچي، موگيليوۆ، ۆيتەبسك قالالارىندا دا ميتينگكە شىققان ادامداردىڭ ۇستالعانىن حابارلادى. Tut.By كەلتىرگەن مالىمەت بويىنشا، گرودنو قالاسىندا كوشەگە شىققان ادامدارعا اياۋسىز قاتىگەزدىك تانىتقان. "شاشتارىنان جۇلدى، ۇرىپ-سوقتى، كوزدەن جاس اعىزاتىن گاز شاشتى", - دەيدى كۋاگەردىڭ ءبىرى.

مينسكىدە چەبوتارەۆ كوشەسىندە سوققىعا جىعىلعان ءبىر ادامدى جەدەل جاردەم كولىگىنە سالىپ جاتتى دەپ حابارلايدى "ينتەرفاكس". مينسك تراكتور زاۋىتى ماڭىندا دا پوليتسيا قولىنان سوققىعا جىعىلعان ادامدار دارىگەردىڭ كومەگىنە جۇگىنگەن.

ۇستالعانداردىڭ اراسىندا ۇيلەستىرۋ كەڭەسىنىڭ مۇشەسى ولگا پاۆلوۆا، "ەكودوم" كومپانياسىنىڭ جەتەكشىسى يرينا سۋحي مەن "راديو راتسىيا" ءجۋرناليسى ارتيوم سيزينتسوۆ بولعان.

6 قىركۇيەكتە "بىرلىك مارشى" دەگەن اتپەن جانە ء"بىرى ءبارى ءۇشىن، ءبارى ءبىر ءۇشىن" دەگەن ۇرانمەن اكتسيا ءوتتى. قۇقىق قورعاۋشىلاردىڭ مالىمەتىنشە، كەمىندە 100 مىڭ ادام كوشەگە شىققان.

Abai.kz