ء"بىرتۇتاس ۇلتتىق قوزعالىس" ليدەرى گريگول ۆاشادزە سااكاشۆيلي 7 قىركۇيەكتە تبيليسيگە كەلەتىنىن مالىمدەدى.

"سااكاشۆيلي حالىقتىڭ الدىندا تۇرىپ، بارلىق سۇراققا ءوزى جاۋاپ بەرۋى ءتيىس", – دەدى ول.

ال قازىرگى گرۋزيا پرەمەر-ءمينيسترى گەورگي گاحاريا "كەلسە، كەلسىن" دەپ، "ەلدىڭ تۇراقتىلىعىنا ەشكىم اسەر ەتە المايدى" دەپ جاۋاپ بەردى.

بيىل تامىز ايىندا گرۋزيا ادىلەت ءمينيسترى تەيا تسۋلۋكياني سااكاشۆيلي ەلگە كەلگەن بەتتە، قاماۋعا الىنادى دەگەن. ەلدىڭ بۇرىنعى پرەزيدەنتى مۇنىڭ ساياسي ءمانى بار دەپ بىلەدى.

گرۋزيادا پارلامەنت سايلاۋى بيىل 31 قازاندا وتەدى. قازىر سايلاۋالدى كامپانياسى باستالىپ كەتتى. پارلامەنتكە ارالاس جۇيە بويىنشا 150 دەپۋتات سايلانادى: جارتىسى پارتيا ءتىزىمى (120 ادام) بويىنشا، جارتىسى ماجوريتارلىق ءبىر مانداتتى وكرۋگ (30 ادام) بويىنشا.

جاقىندا گرۋزيادا بولعان جاپپاي نارازىلىق شاراسىنان كەيىن ساياسي پارتيالاردىڭ پارلامەنتكە ءوتۋ مەجەسى 5 پروتسەنتتەن 1 پروتسەنتكە تۇسكەن. ال پارلامەنتە باسىمدىققا يە بولۋ ءۇشىن، دەپۋتاتتاردىڭ 40 پروتسەنت داۋىسىن الۋ قاجەت.

ميحايل سااكاشۆيلي 2018 جىلى ءۇش جىلعا سىرتتاي تۇرمە جازاسىنا كەسىلگەن. كەيىن ەلدىڭ باس پروكۋراتۋراسى سااكاشۆيليدى پاتاركاتسيشۆيليدىڭ ولىمىنە كىنالى دەپ ايىپتادى.

2015 جىلى گرۋزيانىڭ بۇرىنعى پرەزيدەنتى ۋكراينا ازاماتتىعىن العان. ول ودەسسا وبلىستىق اكىمشىلىگىن باسقارعان. بىراق ەكى جىل وتكەننەن كەيىن پوروشەنكو مەن سااكاشۆيلي اراسى ناشارلاپ، ونىڭ ازاماتتىعىن كەرى قايتارعان. بىراق بيلىككە ۆلاديمير زەلەنسكي كەلگەننەن كەيىن وعان ۋكراين ازاماتتىعىن قايتارىپ بەردى. ​

7 مامىردا ۋكراينا پرەزيدەنتى ۆلاديمير زەلەنسكي سااكاشۆيليدى رەفورمالاردى ورىنداۋشى كوميتەتتىڭ باسشىسى ەتىپ تاعايىنداعان. بىراق بۇل قىزمەتتە سااكاشۆيلي جارتى جىل عانا جۇمىس ىستەدى.

Abai.kz