ەلىمىزدە ورىس الەمى دەسە ىشكەن اسىن جەرگە قوياتىن ءتورت قالا بار. ولار قىزىلجار، قوستاناي، پاۆلودار جانە وسكەمەن. ەل ۇكىمەتى وسى ماسەلەنى ۇنەمى ەسىنەن شىعارىپ الادى. وسىنداي ەتنوجىكشىلدىك جايلاعان قالالاردىڭ ءبىرى ءام بىرگەيى – وسكەمەن. جانە وزىنە قازاق ءتىلدى باسشى قۇتايماي جۇرگەندە ۇلتتىق قۇندىلىقتارىمىزدى قاستەرلەيتىن جاقسىلىق ومار وسكەمەنگە قالا اكىمى بولىپ، الاش بالاسىنىڭ مەرەيى وسەتىن كوپ نارسە ىستەدى. سونىڭ ەڭ باستىسى بۇرىن ءبارىن تەك ورىس تىلىندە عانا جازاتىن دۇكەن يەلەرىن تاۋبەگە كەلتىردى. 

ەلىمىزدىڭ شىعىسى مەن سولتۇستىگىندەگى قىزىلجار، قوستاناي، پاۆلودار، سەمەي جانە وسكەمەن قالالارىن ورىس وتارشىلارى سالدى دەگەن ميفكە سەنۋشىلىكتى تەك سەمەيلىكتەر عانا جوققا شىعارا الدى. قالعاندارى ءوز قالالارىنىڭ ىرگە تاسىنىڭ قالانۋ تاريحىن ورىس وتارلاۋىمەن بايلانىستىرادى. ءبىز كەزىندە «قازاقستان مەن ءسىبىردىڭ كونە قالالارىن ورىستار سالعان جوق» دەگەن ماتەريال جازعان بولاتىنبىز.

بيىل جاقسىلىق ومار باسقاراتىن قالانىڭ تاريحي نەگىزسىز ىرگە تاسىنىڭ قالانعانىنا 300 جىل تولدى-مىس دەلىنەتىن مەرەيتويلىق شارا Covid-19 بايلانىستى كەڭ كولەمدە اتالىپ وتپەسە دە، قالا باسشىلىعى قالاعا سامار شوسسەسىمەن كىرە بەرىسكا ستەلا ورناتۋمەن شەكتەلدى. تاپ وسىنداي ستەلا قالاعا كىرەتىن ەكىنشى تۇسقا دا ورناتىلاتىن بولادى.

وسى وڭىردەگى ورىس ءتىلدى باق بۇل جاقسى لەپەستى الەۋمەتتىك جەلىدە جىكشىلدىك داۋىنا ۇلاستىردى.

قالا كۇنىنىڭ وسكەمەندە مەرەكەلەنۋىن 2012 جىلى سول كەزدەگى قالا اكىمى بولعان يسلام ابىشەۆ قىركۇيەكتىڭ ەكىنشى سەنبىسىنە اتاپ ءوتۋدى داستۇرگە اينالدىرىپ كەتكەن ەدى. مىنە، قالانى ورىستار سالدى دەپ سانايتىن قاۋىم بۇل كۇندى اتاپ ءوتۋدى قالت جىبەرمەيدى. 

وسىلايشا قيماق حاندىعىنىڭ قىزىل كەنىش (سەمەي), وردا (پاۆلودار) شاھارلارىمەن قاتار باس قالاسىنىڭ ءبىرى بولىپ سانالعان تاريحي ىرگەسىنىڭ قالانعانىنا 2000 جىلداي بولىپ قالعان بۇرىنعى تاسكەنتتىڭ، قازىرگى وسكەمەننىڭ بوداندىق كەزدەگى قالىپتاسقان 300 جىلدىق تاريحىنا ارنالعان سىي كوپشىلىككە ۇناماي اكىمشىلىكتىڭ Instagram اككاۋنتىنداعى “نەت تاكوگو گورودا - Oskemen” دەپ جازىلعان كوممەنتاري ءبىر ساتتە جۇزدەگەن لايك جيناپ ۇلگەردى. 

ەڭ وكىنىشتىسى سول شەنەۋىنىكتەر «قيماق حاندىعىنىڭ باس قالاسىنىڭ ءبىرى بولعان بۇرىنعى تاسكەنتتىڭ، قازىرگى وسكەمەننىڭ ىرگەسىنىڭ قالانعانىنا 2000 جىل» دەگەن قارىمتا جاۋاپ جازۋدى ويعا الدى ما ەكەن؟ 

ءابىل-سەرىك الياكبار

Abai.kz