13 ناۋرىزدا پرەزيدەنت شاۆكات ميرزياەۆ قول قويعان زاڭعا ەنگەن وزگەرىستەرگە سايكەس، وزبەكستان اۋماعىندا تۋعان، بىراق شەتەلدە تۇرىپ كەلگەن ادامداردىڭ ازاماتتىق الۋى ءۇشىن ەلدە كەمىندە بەس جىل تۇرۋى شارت ەمەس. بۇعان قوسا، وزبەكستانعا 1995 جىلدىڭ 1 قاڭتارىنا دەيىن كەلگەن، ەلدە زاڭدى تۇرىپ كەلە جاتقان ازاماتتىعى جوق ادامدار اۆتوماتتى تۇردە وزبەكستان ازاماتىنا اينالادى. بالالارى وزبەك ازاماتى بولىپ تانىلعان اتا-انالار دا زاڭعا سايكەس، وزبەكستان ازاماتى بولىپ ەسەپتەلەدى.

زاڭعا ەنگىزىلگەن وزگەرىستەرگە سايكەس، 1992 جىلدىڭ 28 شىلدەسىنەن بەرى وزبەكستاندا تۇرىپ كەلە جاتقان، شەتەل ازاماتى ەمەس ادامدار دا ستاتۋستارىن زاڭداستىرعىسى كەلسە، ازاماتتىق الا الادى.

وزبەكستان ازاماتتىعىن العىسى كەلەتىن كەز كەلگەن ادام وزبەك تىلىندە سويلەي الۋى ءتيىس، ەلدە قوسازاماتتىق زاڭسىز بولىپ ەسەپتەلگەندىكتەن وزگە مەملەكەتتىڭ ازاماتتىعىنان دا باس تارتۋى كەرەك بولادى.