21 قىركۇيەكتە Facebook-تاعى پاراقشاسىندا ول ارىپتەستەرىنە العىس ايتىپ، بيزنەسكە كەتەتىنىن جازعان. الايدا قىزمەتتەن كەتۋىنىڭ سەبەبىن تۇسىندىرمەگەن. ونىڭ ورنىنا جەتىسۋ اۋدانىنىڭ بۇرىنعى اكىمى ماقسات قيقىموۆ كەلگەن.
ساپاربەك تۇياقباەۆ ەلدە كوروناۆيرۋس ىندەتى ءورشىپ، اۋرۋحانادا ورىن تابىلماي، ءدارى-دارمەك تاپشى بولعان كەزدە ء"دارى-دارمەك جەتكىلىكتى، كەيبىر ادامدار [تاپشىلىق بارىن] ايتىپ ءالى حايپ قۋىپ ءجۇر" دەگەن ءسوزى ءۇشىن داۋعا قالعان ەدى. شىلدە ايىندا جەرگىلىكتى بەلسەندى سۆەتلانا درۋجينينا شەنەۋنىكتىڭ ۇستىنەن "كورىنەۋ جالعان اقپارات تاراتۋ" بابىمەن پوليتسياعا شاعىم تۇسىرگەن.
بەلسەندى سول كەزدە Facebook پاراقشاسىنا تىكەلەي ەفيرگە شىعىپ، ءۇيىنىڭ ماڭىنداعى دارىحانالارعا بارىپ, Covid-ءتى ەمدەۋگە ارنالعان حاتتامادا كورسەتىلگەن ءدارى-دارمەكتەردى تابۋعا تىرىسقان. ەكى ءدارىحانانىڭ بىرىندە تىزىمدەگى دارىلەردىڭ تەك بىرەۋى عانا تابىلىپ، ەكىنشىسىندە مۇلدە جوق بولىپ شىققان. ول تىكەلەي ەفير كەزىندە قالا اكىمى ورىنباسارىنىڭ "جاعدايدان مۇلدە بەيحابار" ەكەنىن ايتىپ، شەنەۋنىكتى قىزمەتىنەن كەتىرۋگە شاقىرعان ەدى.
بۇعان دەيىن پوليتسيانىڭ شاعىمدى قاراۋعا "نەگىز تاپپاعانى", ال پروكۋراتۋرانىڭ ونى سىبايلاس جەمقورلىققا قارسى ءىس-قيمىل اگەنتتىگىنە قايتارعانى حابارلانعان ەدى. اگەنتتىك ازىرگە بۇل شاعىمعا بايلانىستى تۇسىنىكتەمە بەرمەدى.
ساپاربەك تۇياقباەۆ الماتى اكىمىنىڭ ورىنباسارى مىندەتىن ءبىر جىلدان استام ۋاقىت اتقارعان.
Abai.kz
