وسى تۇستا ەو بەلارۋسپەن قارىم-قاتىناسىن قايتا قاراستىرادى. ەۋرووداقتىڭ سىرتقى ىستەر جانە قاۋىپسىزدىك ساياسات جونىندەگى جوعارعى وكىلى جوزەپ بوررەلدىڭ مالىمدەمەسىندە وسىلاي دەپ ايتىلادى.

مالىمدەمەدە لۋكاشەنكو يناۋگۋراتسياسى بەلورۋس حالقىنىڭ ايتارلىقتاي بولىگىنىڭ ەركىنە قايشى كەلەدى جانە بۇل سايلاۋدان كەيىن جالعاسىپ جاتقان مىڭداعان ادام قاتىسقان بەيبىر شەرۋلەر مەن اكتسيالاردان كورىنىپ جاتىر، بۇل ەلدە ساياسي داعدارىستى تەرەڭدەتە تۇسەدى دەپ جازىلعان.

"بيلىكتىڭ دورەكى كۇش قولدانىپ، قۋدالاعانىنا قاراماستان نەگىزگى قۇقىقتارى مەن دەموكراتيانى بەيبىت تۇردە تالاپ ەتىپ وتىرعان بەلورۋس حالقىنىڭ باتىلدىعىنا ءسۇيسىنىپ وتىرمىز" دەلىنگەن مالىمدەمەدە.

ەۋرووداق بەلورۋس حالقىنىڭ ەركىن ءارى ءادىل سايلاۋ ارقىلى پرەزيدەنتتى سايلاۋ قۇقىعىن قولدايدى دەپ جازىلعان.

سارسەنبى كۇنى مينسكىدەگى تاۋەلسىزدىك سارايىندا وتكەن شارادا لۋكاشەنكو انت بەرىپ، پرەزيدەنت قىزمەتىنە كىرىسكەن. يناۋگۋراتسيا جايلى الدىن الا حابارلانبادى. مەملەكەتتىك بەلتا اگەنتتىگىنىڭ اقپاراتىنشا، وعان شەنەۋنىكتەر، دەپۋتاتتار، اقپارات قۇرالدارىنىڭ باسشىلارى، عىلىم، مادەنيەت، سپورت قايراتكەرلەرى قاتىسقان.

بەلارۋستەگى پرەزيدەنت سايلاۋىنا قاتىسقان وپپوزيتسيا جەتەكشىسى سۆەتلانا تيحانوۆسكايا يناۋگۋراتسيانى "فارس" دەپ اتادى.

سارسەنبى كۇنى مينسك پەن بەلارۋستىڭ وزگە قالالارىندا يناۋگۋراتسياعا قارسى نارازىلىق اكتسيالارى ءوتتى. 250-دەن استام ادام ۇستالعان. 200-ءى مينسكىدە ۇستالعان. مۇندا ارنايى جاساق دەمونسترانتتاردى تاراتۋ ءۇشىن سۋ شاشقان.

Abai.kz