ارمەنيا سىرتقى ىستەر مينيسترلىگى انكارانى "ازەربايجانعا اسكەر جىبەرىپ جاتىر" دەپ ايىپتادى.

ازەربايجان مەن ارمەنيا شەكاراسىندا 27 قىركۇيەكتەن بەرى قارۋلى قاقتىعىس بولىپ جاتىر. ەكى تاراپ ءبىرىن ءبىرى كىنالاپ جاتىر.

ەرەۆان باكۋدى "تاۋلى قاراباققا قول سۇقتى" دەپ ايىپتاپ، ەلىندە اسكەري جاعداي جاريالاعان. ازەربايجان بولسا "ارمەنيا ءبىرىنشى بولىپ شابۋىل جاسادى" دەپ، "تاۋلى قاراباقتاعى سوعىستى وتان ءۇشىن سوعىس" دەپ مالىمدەدى.

حالىقارالىق قاۋىمداستىق مويىنداماعان تاۋلى قاراباق ايماعىنىڭ اسكەر جەتەكشىلەرى قاقتىعىستىڭ ەكىنشى كۇنى 15 جاۋىنگەر مەرت بولعانىن حابارلادى. ولار اتىستىڭ ءبىرىنشى كۇنىندە 16 اسكەر وققا ۇشقانىن مالىمدەگەن. رەسمي مالىمەت بويىنشا، قاراباقتىڭ 31 جاۋىنگەرى جانە ەكى بەيبىت تۇرعىن قازا بولعان.

ارمەنيا قورعانىس ءمينيسترى ارتسرۋن وۆاننيسيان اتىس كەزىندە 100-گە تارتا ادام جارالانعانىن، ولاردىڭ ءبىر بولىگى ەرەۆانعا جەتكىزىلگەنىن ايتتى.

ازەربايجان قورعانىس مينيسترلىگى 550-دەن كوپ اسكەر وققا ۇشقانىن حابارلادى. بىراق ەرەۆان بۇل اقپاراتتى تەرىسكە شىعاردى.

حالىقارالىق قاۋىمداستىق تاراپتاردى تەز ارادا سوعىستى توقتاتۋعا، كەلىسسوزگە كەلۋگە شاقىرىپ جاتىر.

تاۋلى قاراباق توڭىرەگىندە داۋ سوۆەت وداعى كەزىنەن باستالعان. ول كەزدە تاۋلى قاراباق اۋدانى ازەربايجان سسر-ءى قۇرامىنا كىرگەن، بىراق تۇرعىندارىنىڭ كوبى ارميان بولعان. 1988-1994 جىلدارى ارالىعىندا بولعان اسكەري قاقتىعىس كەزىندە 30 مىڭ ادام قازا تاۋىپ، جۇزدەگەن مىڭ ادام بوسقىنعا اينالعان. ارمەنيا اسكەرىنىڭ قولداۋىنا يە بولعان سەپاراتيستەر تاۋلى قاراباقتىڭ باسىم بولىگىن باقىلاۋىنا الىپ، ءوزىنىڭ قاراماعىنا ازەربايجانعا تيەسىلى كەي اۋدانداردى دا تىركەپ الدى. ازەربايجان بۇل تەرريتوريانى وككۋپاتسيالانعان دەپ اتايدى. 1994 جىلى ەكى ەل اراسىندا قارۋلى قاقتىعىستى توقتاتۋ جانە شيەلەنىستى بەيبىت جولمەن شەشۋ جونىندە كەلىسىم جاسالدى. بىراق بۇل كەلىسىم شيەلەنىستى شەشكەن جوق.

دەرەككوز: centralasian.org

Abai.kz