ول ازاتتىقتىڭ قىرعىز قىزمەتىنە بەرگەن سۇقباتىندا قىرعىزستاننىڭ قاۋىپسىزدىك كەڭەسى حاتشىسىنىڭ ورىنباسارى قىزمەتىنە قايتا كىرىسكەنىن، قوعامداعى ءتارتىپتى باقىلاۋ ءۇشىن شارالار ەنگىزە باستاعانىن جەتكىزدى.

"قازىر پرەزيدەنتتىڭ قايدا ەكەنىن بىلمەيمىن. بىراق قاۋىپسىزدىك كەڭەسى حاتشىسىنىڭ ورىنباسارى رەتىندە زاڭدى جۇمىس جۇرگىزىپ جاتىرمىن. قازىر ەلدەگى ءتارتىپ مەن قاۋىپسىزدىك جاعىن ۇيلەستىرىپ جاتىرمىن. مەليس تۋرگانباەۆ ("زامانداش" پارتياسى اتىنان دەپۋتاتتىققا ۇمىتكەر بولعان – رەد.) جازانى ورىنداۋ مەملەكەتتىك قىزمەتىندەگى جۇمىسىنا كىرىسىپ كەتتى. ال بىشكەك كومەندانتى رەتىندە كۋرسان اسانوۆقا ۋاقىتشا سەنىم ارتتىق", - دەدى ومۋربەك سۋۆاناليەۆ.

كۋرسان اسانوۆ پەن ومۋربەك سۋۆاناليەۆ "بۋتۋن كىرگىزستان" پارتياسى اتىنان سايلاۋعا قاتىسقان. 2019 جىلى كۋرسان اسانوۆ "ميليتسيا مۇددەسىن ساتتى" دەگەن ايىپپەن ىشكى ىستەر ءمينيسترىنىڭ ورىنباسارى قىزمەتىنەن بوساتىلىپ، وعان ءۇش بىردەي قىلمىستىق ءىس قوزعالعان.

الەۋمەتتىك جەلى مەن باق-تا باس پروكۋروردىڭ مىندەتىن اتقارۋشى بولىپ المامبەت شىكماماتوۆ تاعايىندالعانى حابارلاندى. ول "بير بول" پارتياسى اتىنان دەپۋتاتتىققا ۇمىتكەر بولعان.

قىرعىزستاندا ورتالىق الاڭدا 5 قازاندا پارلامەنت سايلاۋىنىڭ ناتيجەسىمەن كەلىسپەگەن حالىق ميتينگكە شىققان. ولار سايلاۋ ناتيجەسىن جويىپ، قايتا سايلاۋ وتكىزۋدى تالاپ ەتتى. تۇنگە قاراي نارازى حالىق اق ءۇيدى باسىپ كىردى. كەيىن مەملەكەتتىك قاۋىپسىزدىك كوميتەتى عيماراتىن باسىپ الدى.

قىرعىزستان پرەزيدەنتى سوورونباي جەەنبەكوۆ ساياسي كۇشتەر ەلدەگى "بەيبىتشىلىك پەن تۇراقتىلىقتى" ساقتايدى دەگەن ءۇمىتىن جەتكىزگەن. بۇل جونىندە ونىڭ ءباسپاسوز حاتشىسى تولگوناي ستاماليەۆا حابارلادى. ونىڭ ايتۋىنشا، مەملەكەت باسشىسى بىشكەكتە.

Abai.kz