جامبىل وبلىسىنىڭ تاراز قالاسىندا قازاقتىڭ ۇلتتىق اسپابى – دومبىراعا ارنالعان ەسكەرتكىش بوي كوتەردى. تارازداعى ۋنيۆەرسيتەت جاتاقحاناسىنىڭ الدىنداعى سكۆەرگە ورناتىلعان ەسكەركەتكىشتىڭ بيىكتىگى 7,5 مەتردى قۇرايدى.

ەسكەرتكىش وڭىردەگى دەمەۋشىلەردىڭ قاراجاتىنا ورناتىلعان ەكەن. ۇلتتىق اسپاپقا ارنالعان بۇل ەسكەرتكىش جامبىل وبلىستىق ساۋلەت بيۋروسىنىڭ ەسكيزى بويىنشا دايىندالعان. ونىڭ اشىلۋىنا جامبىل وبلىسى اكىمى بەردىبەك ساپارباەۆ ارنايى بارىپ قاتىسقان.

وبلىس اكىمى بەردىبەك ماشبەكۇلى ءوز سوزىندە جاڭادان اشىلىپ جاتقان بۇل ەسكەرتكىشتىڭ ءجون-جوسىعى تۋرالى ايتا كەلە، قازاق حالقىنىڭ ەجەلگى ءھام بۇگىنگى ومىرىندەگى دومبىرانىڭ ءرولى مەن ماڭىزى تۋرالى  توقتالعان.

«دومبىرا قازاق حالقىنىڭ ومىرىندە ەرەكشە ماڭىزعا يە اسپاپ. بۇل ەسكەرتكىشتىڭ ءدال وسى ستۋدەنتتىك جاتاقحانانىڭ الدىندا اشىلۋى، جالپى وسى جەرگە دومبىرا ەسكەرتكىشىن ورناتۋ  - ءسوزسىز تاماش يدەيا! نەگە؟ دومبىرا ەسكەرتكىشى قازاق حالقىنىڭ تەرەڭ رۋحاني مۇراسىن ەسكە تۇسىرەدى. ءاردايىم جاستاردىڭ كوز الدىندا تۇرادى. مەن ءبىزدىڭ جاستارىمىزدىڭ بۇل قۇندىلىقتى جوعارى باعالايتىنىنا سەنەمىن. جاستار ۇلت مۇراسىنا لايىقتى بولادى. جانە ۋنيۆەرسيتەت ۇستازدارى دا وسى باعىتتا تاربيە جۇمىستارىن جالعاستىرادى»، - دەدى بەردىبەك ساپارباەۆ.

دومبىرا قازاقتىڭ ۇلتتىق مۋزىكالىق اسپابى عانا ەمەس، ول قازاقتىڭ جانى، كونە تاريحىنىڭ كۋاسى. ول كوشپەلى قازاقتىڭ تۇرمىس-تىرشىلىگىندە، قۋانىش-قايعىسىندا كۇمبىر كۇيمەن سىرت شەرتىسكەن قاسيەتتى اسپاپ.

دومبىرا كۇيلەرى يۋنەسكو-نىڭ ماتەريالدىق ەمەس مۇرالار تىزىمىنە كىرگەن.  قازاقستاندا وسىمەن ءۇشىنشى جىل قاتارىنان «ۇلتتىق دومبىرا كۇنى» اتالىپ ءوتىلىپ كەلەدى.

«دومبىرانى ۇلىقتاۋ – ۇلتتىق قۇندىلىقتى، ۇلتتى ۇلىقتاۋ». بۇل مەملەكەت باسشىسى قاسىم-جومارت توقاەۆتىڭ  قاسيەتتى اسپاپتىڭ ماڭىزدىلىعى تۋرالى ايتقان ەكى اۋىز پىكىرى.

«دومبىرا مەن قازاق، قازاق پەن دومبىرا ەگىز ۇعىمدار. دومبىرا ءۇنى باتىرلارىمىزعا رۋح، اقىندارىمىزعا شابىت بەرگەن. دومبىرا ءاربىر قازاقتىڭ رۋحىن كوتەرەتىن ۇلتتىق قازىنامىز. دومبيۋىرا پەرنەسىنەن شىققان كۇيلەردە قازاقتىڭ كەشەگى تاريحى بار. اتا-بابالارىمىزدان بىزگە جەتكەن وسى ءبىر اسىل مۇراتى ساقتاپ، كەلەشەككە جەتكىزۋ ءبىز ءۇشىن مىندەت»، - دەگەن ەلى پرەزيدەنت.

ال 2019 جىلعى «ۇلتتىق دومبىرا كۇنىندە» مەملەكەت باسشىسى دومبىرا ساباعان ارنايى ءپان رەتىندە ۇيرەتۋ كەرەكتىگىن ايتقان.

«بارشا قازاققا ورتاق قۇندىلىق دومبىرانى جان-جاقتى ناسيحاتتاۋ ماڭىزدى. وسى تۇرعىدان، مەكتەپكە دومبىرا ۇيرەنۋ ساباعىن ەنگىزۋ قاجەت. قازىرگىدەي، جاھاندانۋ زامانىندا حالقىمىزدىڭ اسىل مۇراسىن جاڭعىرتۋ ماڭىزدى قادام. بۇل اۋەلى ءتول مادەنيەتىمىزگە دەگەن قامقورلىق»، - دەگەن ەدى.

Abai.kz