قمدب توراعاسى، باس ءمۇفتي ناۋرىزباي قاجى تاعانۇلى ماڭعىستاۋ وبلىسىنا جاساعان ساپارىندا «زەكەت» قورىنىڭ «ەل ۇلەسى – پاتەرگە» جوباسى اياسىندا مۇقتاج وتباسىنا پاتەر سىيلاۋ راسىمىنە قاتىستى.

قالانىڭ جاڭا شاعىناۋدانىنداعى ەكى بولمەلى قوس پاتەر كوپبالالى وتباسىلارعا بۇيىردى. اقتاۋلىق سنەجانا بازارقۇلوۆا ءۇي كەزەگىندە 2001 جىلدان بەرى تۇرسا، التى بالانىڭ اناسى اقسۇلۋ الماسباەۆا وسى كەزگە دەيىن پاتەر جالداپ جۇرگەن ەكەن.

قايىرىمدىلىق اكتسياسىنىڭ 280 جانە 281-باسپانا كىلتىن قوس وتباسىعا باس ءمۇفتيدىڭ ءوزى تاپسىرىپ، جاڭا قونىسقا تۇرمىستىق تەحنيكالار تارتۋ ەتتى.

«جاڭا قونىستارىڭىزعا ءبىر اللادان قۇت-بەرەكە تىلەيمىن! شاڭىراقتارىڭىزدان ەلىن، جەرىن قۇرمەتتەيتىن، اتا-اناسى، اعايىن-تۋماسىنا قامقور بولاتىن اقىلدى، يماندى پەرزەنتتەر ءوسىپ-ونە بەرسىن! قۋانىشتارىڭىز ۇزاعىنان بولعاي!» دەپ باس ءمۇفتي باتاسىن بەردى.

Abai.kz