«بۇگىن پرەزيدەنت سوورونباي جەەنبەكوۆ سادىر جاپاروۆپەن كەزدەسىپ، سويلەستى. كەزدەسۋدە پرەمەر-مينيستر "پرەزيدەنت بۇگىن كەشكە قىزمەتىن تاپسىرۋى كەرەك" دەگەن تالابىن قويدى. پرەزيدەنت سوورونباي جەەنبەكوۆ قازىرگى جاعدايدا مەملەكەت باسشىلىعىن تاستاپ كەتە المايتىنىن، مۇنىڭ سالدارى اۋىر بولۋى مۇمكىن ەكەنىن باسا ايتتى», - دەدى ستاماليەۆا.

ونىڭ ايتۋىنشا، جەەنبەكوۆ جاپاروۆقا 9 قازانداعى سوزىندە تۇراتىنىن، پرەزيدەنتتىك قىزمەتتەن قىرعىزستاندا جاعداي تۇراقتىلىپ، جاڭا پارلامەنت سايلاۋىن وتكىزىپ بارىپ كەتەتىنىن جەتكىزگەن.

جەەنبەكوۆ 9 قازان كۇنى مالىمدەمە جاساپ، "ەلى زاڭ جولىنا تۇسكەندە" قىزمەتىنەن كەتۋگە دايىن ەكەنىن جەتكىزگەن.

"مەن ءۇشىن مەملەكەت تۇتاستىعىنان، حالىق بىرلىگىنەن جانە قوعام تىنىشتىعىنان ارتىق لاۋازىم جوق. بىزگە بارىنشا تەزدەتىپ زاڭ جولىنا ءتۇسۋىمىز كەرەك. اتقارۋشى بيلىكتىڭ زاڭدى جەتەكشىلەرى بەكىتىلگەننەن كەيىن، مەن قىرعىزستان پرەزيدەنتى قىزمەتىمنەن كەتۋگە دايىنمىن", - دەگەن ەدى سوورونباي جەەنبەكوۆ.

الايدا، ءبىر كۇننەن كەيىن سوورونباي جەەنبەكوۆ پرەزيدەنت قىزمەتىنەن كەتۋگە ءماجبۇر بولىپ وتىر.

قىرعىزستاندا 4 قازاندا وتكەن پارلامەنت سايلاۋىنان كەيىن ەلدە ساياسي داعدارىس قالىپتاسقان ەدى. سايلاۋ ناتيجەسىن جويۋدى تالاپ ەتكەن نارازىلىق اكتسياسىنىڭ سوڭى تارتىپسىزدىككە ۇلاسىپ، 6 قازانعا قاراعان ءتۇنى دەمونسترانتتار پارلامەنت پەن پرەزيدەنت كەڭسەسى ورنالاسقان "اق ءۇيدى" باسىپ العان. ەلدە ساياسي كۇشتەر اراسىندا بيلىككە تالاس قىزعان.

پارلامەنتتىڭ بۇرىنعى دەپۋتاتى سادىر جاپاروۆتى 6 قازانعا قاراعان ءتۇنى جاقتاستارى كۇشەيتىلگەن تارتىپتەگى تۇرمەدەن شىعارىپ العان. قىرعىزستان بيلىگى جاپاروۆتى 2013 جىلى قۇمتور التىن كەنىشىن مەملەكەت يەلىگىنە الۋ تالابىمەن قاراقول اۋىلىندا ميتينگ ۇيىمداستىرىپ، سول كەزدەگى ىستىقكول وبلىس اكىمىن كەپىلگە العان دەگەن ايىپپەن 2017 جىلى تامىزدا سوتتاپ، 11,5 جىلعا تۇرمەگە قاماعان ەدى.

14 قازاندا پارلامەنت پرەمەر-مينيستر ەتىپ سايلاعان سادىر جاپاروۆتىڭ ۇكىمەت قۇرامىن، قۇرىلىمىن بەكىتىپ، وعان پرەزيدەنت سوورونباي جەەنبەكوۆ قول قويعان. بىراق جاپاروۆتىڭ جاقتاستارى جەەنبەكوۆ قىزمەتىنەن كەتپەي، الاڭنان تارامايتىنىن ءبىلدىردى.

Abai.kz