تۇركىستانداعى قوجا احمەت ياساۋي اتىنداعى قازاق-تۇرىك ۋنيۆەرسيتەتىندە جاڭا وقۋ جىلىنىڭ (2020-2021 جىلدار) باستالۋىنا وراي ونلاين رەجيمدە جيىن وتكەن ەكەن. وعان تۇركيانىڭ سىرتقى ىستەر ءمينيسترى ءماۋلىت شاۆۋشوگلى قاتىسقان. قۇتتىقتاۋ ءسوز سويلەگەن. 

ءماۋلىت شاۆۋشوگلى اتالعان جيىن بارىسىندا تاۋلى قاراباقتاعى سوعىسقا قاتىستى دا پىكىر ءبىلدىرىپ، تۇركى حالىقتارىن بىرىگۋگە، ازەربايجاندى قولداۋعا شاقىرعان.

«تۇركىتىلدى مەملەكەتتەر ازەربايجانعا قولداۋ ءبىلدىرۋى كەرەك. انكارا تاريحي جەرلەردى دەوككۋپاتسيالاۋ كۇرەسىندە ءاردايىم باكۋمەن بىرگە بولىپ كەلدى»، - دەپتى شاۆۋشوگلى.

«ءبىز تاعى دا ارمەنيا بيلىگى تاراپىنان ازەربايجانعا قارسى ارانداتۋشىلىقتاردى كورىپ وتىرمىز. ارمەنيا ازەربايجان جەرلەرىن شابۋىلداپ جاتىر. وكىنىشكە وراي كەيبىر مەملەكەتتەر ازەربايجان مەن وككۋپانت ارمەنيانى تارازىعا تەڭ قويعىسى كەلەدى. بۇل مەملەكەتتەر بۇۇ مەن ەقىۇ شەشىمدەرىن ەلەمەي وتىر. سوندىقتان ازەربايجانعا قولداۋ قازىر اۋاداي قاجەت»، - دەيدى تۇركيا سىرتقى ىستەر ءمينيسترى.

وسىعان دەيىن ءماۋلىت شاۆۋشوگلى جانە رەجەپ تايىپ ەردوعان باسقاراتىن تۇركيا بيلىگى تاۋلى قاراباقتاعى قاقتىعىستى بەيبىت جولمەن شەشۋ تۋرالى ۇسىنىستى قولدايتىنىن، الايدا ارمەنيا باسىپ العان تەرريتوريادان كەتۋى كەرەكتىگىن مالىمدەگەن.

«الەمدىك قاۋىمداستىقتىڭ ۇسىنىسى اقىلعا قونىمدى دەپ ەسەپتەيمىز. ەشكىم سوعىستى قالامايدى. الايدا قاراباق داۋىن ەشكىم بۇۇ رەزوليۋتسياسى شەڭبەرىندە شەشكىسى كەلمەيدى. ەشكىم ارمەنياعا قاراباقتان كەتۋ تۋرالى تالاپ قويماي وتىر. الەمدىك قاۋىمداستىق الدىمەن وسىنى تالاپ ەتۋى كەرەك ەدى عوي»، - دەگەن ءماۋلىت شاۆۋشوگلى.

ايتا كەتەيىك، تاۋلى قاراباقتاعى سوعىس 27 قىركۇيەكتە باستالعان. ال 10 قازان كۇنى ماسكەۋدە جولىققا ازەربايجان جانە ارمەنيا سىرتقى ىستەر مينيسترلەرى وق اتۋدى توقتاتۋ تۋرالى كەلىسىمگە كەلگەن. بۇل كەلىسىم قابىلدانعاننان ءبىر تاۋلىك وتەر-وتپەستەن قايتادان وق داۋسى ەستىلە باستاعان. ال 15 قازاندا ازەربايجان پرەزيدەنتى يلحام اليەۆ ارمەنيا بيلىگى كەلىسىمدى بۇزعانىن ايتىپ، قاراباقتاعى ارنايى وپەراتسيالار قايتا جالعاساتىنىن مالىمدەگەن.

Abai.kz