"قازىر پرەزيدەنت جانە پارلامەنت سايلاۋى زاڭىنا وزگەرىستەردى دايىنداپ جاتىر. ەگەر ناتيجەسىندە زاڭدار وزگەرتىلسە، پرەزيدەنت سايلاۋىنا قاتىسامىن. بىراق قازىر بۇل تۋرالى ايتۋ ەرتە. بۇل ماسەلە بويىنشا شەشىم قابىلدانعان جوق" دەدى جاپاروۆ 19 قازاندا "روسسيا-24" تەلەارناسىنا بەرگەن سۇحباتىندا.

قىرعىزستان كونستيتۋتسياسىنا ساي، ۋاقىتشا پرەزيدەنت بولعان ادام پرەزيدەنت سايلاۋىنا قاتىسا المايدى. ال ەلدە كونستيتۋتسيانى وزگەرتۋ ءۇشىن حالىقتىق رەفەرەندۋم ءوتۋى ءتيىس.

ادام ۇرلادى دەپ سوتتالىپ، كەيىن جاقتاستارىنىڭ كومەگىمەن بوساپ شىققان ەكس-دەپۋتات جاپاروۆ الدىمەن پرەمەر-مينيستر، كەيىن ۋاقىتشا پرەزيدەنت قىزمەتىنە تاعايىندالدى. ال ەل پرەزيدەنتى سوورونباي جەەنبەكوۆ ەلدە پارلامەنت سايلاۋى ناتيجەسىنە قارسى نارازىلىقتان سوڭ وتستاۆكاعا كەتتى. ال جاپاروۆتى ۋاقىتشا پرەزيدەنتتىككە جوگوركۋ كەڭەش بەكىتكەن ەدى.

4 قازاندا وتكەن پارلامەنت سايلاۋىنان كەيىن جوگوركۋ كەڭەشكە وتپەي قالعان وپپوزيتسيالىق پارتيالار مەن جۇرت جاپپاي نارازىلىققا شىعىپ، قايتا سايلاۋ وتكىزۋدى، جەەنبەكوۆتىڭ پرەزيدەنتتىكتەن كەتۋىن تالاپ ەتتى. نارازى جۇرت "سايلاۋدا بيلىككە جاقىن پارتيالار جەڭدى، ولار اكىمشىلىك رەسۋرستاردى پايدالاندى، جۇرتقا اقشا بەرىپ داۋىس ساتىپ الدى" دەپ ايىپتاعان.

نارازىلار 6 قازانعا اۋعان ءتۇنى پرەزيدەنت پەن پارلامەنت وتىراتىن "اق ءۇيدى", مەملەكەتتىك ۇلتتىق قاۋىپسىزدىك كوميتەتىنىڭ عيماراتىن باسىپ الىپ، قاماۋدا وتىرعان ەكس-پرەزيدەنت المازبەك اتامباەۆتى، ەكس-پرەمەر ساپار يساكوۆتى، بۇرىنعى دەپۋتات سادىر جاپاروۆتى بوساتىپ العان. اتامباەۆ قىلمىستىق توپ جەتەكشىسى ازيز باتۋكاەۆتى تۇرمەدەن بوساتتى دەگەن ايىپپەن 11 جىلعا سوتتالعان. ال يساكوۆ "بىشكەك جەس جوندەۋ جۇمىسىنا بولىنگەن اقشانى جىمقىرۋ ايىبىمەن" 18 جىلعا تۇرمەگە قامالعان. جاپاروۆ 2013 جىلى قۇمتور التىن كەنىشىن مەملەكەت يەلىگىنە الۋ تالابىمەن قاراقول اۋىلىندا ميتينگ ۇيىمداستىرىپ، سول كەزدەگى ىستىقكول وبلىسىنىڭ اكىمىن كەپىلگە العان دەگەن ايىپپەن 2017 جىلى تامىزدا 11,5 جىلعا تۇرمەگە قامالعان.

ەلدە نارازىلىق كۇشەيگەن تۇستا ورتالىق سايلاۋ كوميسسياسى 4 قازانداعى سايلاۋدىڭ ناتيجەسىن جويدى.

جوگوركۋ كەڭەش قاماۋدان شىققان جاپاروۆتى الدىمەن پرەمەر-مينيسترلىككە تاعايىندادى. ال جەەنبەكوۆ ەلدە جاڭا پارلامەنت سايلاۋى وتپەي پرەزيدەنتتىكتەن كەتپەيتىنىن ايتقان. بىراق جاپاروۆتىڭ جاقتاستارى جەەنبەكوۆتىڭ وتستاۆكاسىن تالاپ ەتۋدى توقتاتپادى. 15 قازاندا جەەنبەكوۆ "تاريحتا ءوز حالقىنا وق اتقان پرەزيدەنت بولعىسى كەلمەيتىنىن" ايتىپ، پرەزيدەنتتىكتەن كەتتى.

Abai.kz