ونىڭ سوزىنشە، كوروناۆيرۋسپەن كۇرەس ءۇشىن قۇرىلعان ۇكىمەتارالىق كوميسسيا شەشىم قابىلداپ، 20 قازاننان باستاپ ۆيرۋس جۇقتىرعان دارىگەرلەردەن وتەماقىعا ءوتىنىش قابىلداۋ توقتاتتى.

قازاقستان بيلىگى ناۋرىزدا ەلدە ىندەت تاراي باستاعاندا كوروناۆيرۋس جۇقتىرعان دارىگەرلەرگە بيۋدجەتتەن ەكى ميلليون تەڭگە، ىندەتتەن قايتىس بولعان دارىگەرلەرگە 10 ميلليون تەڭگە تولەۋ تۋرالى شەشىم قابىلداعان.

شورانوۆ جۇمىس بارىسىندا Covid ىندەتىنە شالدىعىپ، قايتىس بولعان دارىگەرلەردىڭ جاقىندارىنا بەرىلەتىن 10 ميلليون تەڭگە وتەماقى ساقتالاتىنىن جەتكىزدى. رەسمي مالىمەت بويىنشا، ەلدە ناۋرىزدان بەرى 182 دارىگەر ىندەتتەن كوز جۇمعان. مينيسترلىك مارقۇم بولعان بارلىق دارىگەردىڭ جاقىندارىنا وتەماقى تولەنگەنىن ايتادى.

مينيسترلىك وكىلىنىڭ سوزىنشە، ەندى دارىگەر جۇمىس بارىسىندا ۆيرۋس جۇقتىرسا، وعان قولداۋدى مەديتسينالىق مەكەمە، كاسىپوداق نە جەرگىلىكتى بيلىك كورسەتۋى ءتيىس.

"بۇل مەديتسينالىق مەكەمە جەتەكشىلەرىنە مەدقىزمەتكەرلەردىڭ قاۋىپسىزدىگىن قامتاماسىز ەتۋگە، سانەپيدرەجيمدى باقىلاۋعا ىنتالاندىرادى" دەدى ول.

شورانوۆ جەرگىلىكتى بيلىك يا مەديتسينالىق مەكەمە ۆيرۋس جۇقتىرعان دارىگەرگە قولداۋدى قالاي كورسەتەتىنىن اشىپ ايتپادى.

بيلىك ىندەتپەن كۇرەسىپ جاتقان دارىگەرلەردىڭ جالاقىسىنا قوسىمشا تولەم تولەۋ ساقتالاتىنىن مالىمدەدى. ينفەكتسيالىق اۋرۋحانادا ىستەيتىن مەدقىزمەتكەردىڭ ايلىعىنا 850 مىڭ تەڭگە، پروۆيزورلىق ستاتسيوناردا جۇمىس ىستەيتىن دارىگەر مەن فەلدشەر جالاقىسىنا 425 مىڭ تەڭگە، كارانتيندىك ستاتسيونار، سانيتارلىق دارىگەر مەن جەدەل جاردەم جۇرگىزۋشىسىنىڭ ايلىعىنا 212 مىڭ تەڭگە قوسىلادى.

قازاقستاندا ىندەت باستالعالى مىڭداعان دارىگەر ۆيرۋس جۇقتىرعان. ەلدە جاز ايلارىندا ىندەت ورشىگەن تۇستا ىندەتتەن كوز جۇمعان دارىگەرلەردىڭ دە سانى كۇرت ارتتى. بيلىك ۆيرۋس جۇقتىرعان مەدقىزمەتكەرلەرگە جانە ىندەتتەن قايتىس بولعان دارىگەرلەردىڭ جاقىندارىنا وتەماقى تولەۋ ءۇشىن كوميسسيا قۇرعان. كوروناۆيرۋس كەسىرىنەن قايتىس بولعان دارىگەرلەردىڭ جاقىندارى كوميسسيا وتىنىشتەرىن ۇزاق قاراپ جاتقانىن ايتىپ شاعىمدانا باستادى. كەيىن قازاقستان پرەزيدەنتى قاسىم-جومارت توقاەۆ جۇمىس بارىسىندا ىندەتكە شالدىعىپ، كوز جۇمعان دارىگەرلەردىڭ ءولىم سەبەبىن تەكسەرمەي بىردەن وتەماقى تولەۋدى تاپسىرعان.

ەلدە ناۋرىزدان باستاپ 145 مىڭنان اسا ادام ىندەتكە شالدىعىپ، ەكى مىڭنان اسا ادام قايتىس بولدى.