وڭتۇستىك كورەيانىڭ ەكس-پرەزيدەنتى لي ميون باك جەمقورلىق قىلمىسى ءۇشىن 17 جىلعا سوتتالدى.

كورەيا رەسپۋبليكاسىنىڭ جوعارعى سوتى ەلدىڭ ەكس-پرەزيدەنتى لي ميون باكقا قاتىستى شىققان ۇكىمدى كۇشىندە قالدىردى. ساياساتكەر ۇلكەن كولەمدە ايىپپۇل ارقالاپ قانا قويماي، 17 جىلعا باس بوستاندىعىنان ايىرىلدى. سونداي-اق، ءۇي قاماۋىندا بولۋعا مۇمكىندىك بەرەتىن الدىڭعى شەشىم جويىلدى.

«لاۋازىمدىق وكىلەتتىگىن تەرىس پايدالانۋ جانە سىبايلاس جەمقورلىققا قاتىستى ايىپتاۋلارعا قاتىستى باستاپقى شەشىمنەن قانداي دا ءبىر قاتەلىكتەر تاپپادىق»، - دەلىنگەن جوعارعى سوتتىڭ 2-ءشى باسقارماسىنىڭ ەكس-پرەزيدەنتكە قاتىستى بۇرىنعى ۇكىمگە بەرىلگەن اپەللياتسيانى قاراعان قورىتىندى مالىمدەمەسىندە.

لي ميون باك پارا العانى جانە كومپانيا قاراجاتىن يەمدەنگەنى ءۇشىن كىنالى دەپ تانىلدى. قورىتىندى ۇكىم بويىنشا ول 17 جىلعا باس بوستاندىعىنان ايىرىلدى. سونىمەن قاتار، 13 ميلليارد ۆون (11,5 ميلليون دوللار) ايىپپۇل، سونداي-اق 5 ميلليارد 780 ميلليون ۆون (5 ميلليون دوللاردان استام) قوسىمشا اقى تولەۋگە مىندەتتەلدى.

Abai.kz