سولتۇستىك قازاقستان وبلىسىنىڭ قىزىلجار اۋدانى پەتەرفەلد اۋىلىنىڭ ورتا مەكتەبى قىزىلجار اباي مەكتەبىنە قالاي اينالعانى تۋرالى بۇعان دەيىن جازعانمىن.

سول مەكتەبىمىز تاپ بۇگىن ليتسەنزياسىن الىپ، رەسمي ىسكە قوسىلدى.
وسى جوباعا تەر توككەن بارلىق ارىپتەستەرىم مەن مەكتەپ ۇجىمىن قۇتتىقتايمىن!

ءبىز بۇل مەكتەپتى بيىلعى جىلدىڭ باسىندا عانا باسقارۋعا الدىق. مەكتەپتى باسقاراتىن «اباي مەكتەپتەرى» قوعامدىق قورى. ءبىر جىلعا جەتپەس ارالىقتا مەكتەپتى جاڭارتۋ جوباسى جاسالىپ، ول جوبا ىسكە استى. مەكتەپتىڭ cۋ، جىلۋ، ەلەكتر جەلىلەرى، شاتىرى، ەدەنى، ەسىك-تەرەزەسى، ىشكى-سىرتقى قالپى تولىقتاي جاڭاردى. ونى ءوز قاراجاتىمىزعا جاسادىق.

بۇل – ءبىزدىڭ ويىمىزداعى قازاقستاندىق اۋىل مەكتەبىنىڭ جاڭا ۇلگىسى. مەكتەپتى جوندەۋ جۇمىستارى الداعى ۇلكەن شارۋانىڭ باسى عانا. ەڭ باستىسى، ءارى كۇردەلىسى اۋىل مەكتەبىنىڭ جاڭا مازمۇنىن جاساۋ. ماقساتىمىز – مەكتەپتى تەك اۋىل بالالارى عانا ەمەس، بارلىق تۇرعىندارى ءۇشىن جۇمىس ىستەيتىن ءبىلىم مەن مادەنيەتتىڭ، جاڭالىق پەن جاسامپازدىقتىڭ وشاعىنا اينالدىرۋ.

مەكتەپتىڭ اۋلاسى، سپورت زالى، كىتاپحاناسى، ساحناسى مەن اكت زالى، پسيحولوگ بولمەسى بارلىق اۋىل تۇرعىندارىنا جۇيەلى، جوسپارلى تۇردە قىزمەت ەتۋى قاجەت.

كەزەڭ-كەزەڭمەن مەكتەپ اياسىندا جۇمىس ىستەيتىن جاڭا سپورت كەشەنىن، جىلىجاي، تەحنولگيالار مەن شىعارماشىلىق ورتالىعىن، كاسىپكەرلىك مەكتەبىن ىسكە قوسامىز.
سوندىقتان الدا جۇمىس ءالى كوپ.

جوباعا قولداۋ كورسەتىپ، مازمۇنىن قالىپتاستىرۋعا زور ۇلەس قوسىپ جاتقان نازارباەۆ زياتكەرلىك مەكتەپتەرىنىڭ ۇجىمى مەن ونىڭ باسشىسى كۇلاش نوعاتايقىزى شامشيدينوۆاعا العىس بىلدىرەمىز!

بۇل اۋىل مەكتەبى نەگىزىندە جاسالعان تۇڭعىش مەملەكەتتىك جەكە مەنشىك ارىپتەستىك جوباسى. وسىنداي تىڭعا تۇرەن سالعان باستامانى قولداعان ايماق اكىمشىلىنە ريزاشىلىق بىلدىرەمىز!

بۇگىنگى راسىمگە ۆيتسە-پرەمەر ەرالى توعجانوۆ، وبلىس اكىمى قۇمار اقساقالوۆ، نزم باسشىسى كۇلاش ءشامشيدينوۆا قاتىسىپ، وڭ باعا، اق تىلەكتەرىن ءبىلدىردى. راحمەت سىزدەرگە!

ءبىر جىل بۇرىن ەشكىم سەنبەگەن ەلەس وسىلايشا شىندىققا اينالدى.
ىستىق قايرات، نۇرلى اقىل، جىلى جۇرەكتى تولىق ادام تاربيەلەۋدى ماقسات ەتكەن جاڭا مەكتەپكە اباي ارۋاعى جار بولسىن!

راۋان كەنجەحانۇلىنىڭ جازباسى

Abai.kz