وسى جىلدىڭ سوڭىنا دەيىن 30-عا جۋىق انىقتاما ءتۇرى جويىلادى. بۇل تۋرالى ۇكىمەت وتىرىسىندا قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مالىمدەدى.

«جىلدىڭ سوڭىنا دەيىن 30-عا جۋىق انىقتاما ءتۇرىن بەرۋدى الىپ تاستاۋ جوسپارلانۋدا. ازامات قاجەت ەتەتىن مالىمەتتەرمەن تىكەلەي تەلەفونى ارقىلى انىقتاما سۇراتپاي-اق بولىسە الادى. QR-كودتى كورسەتىپ، الدە مەسسەندجەر ارقىلى ۇسىناتىن بولادى», - دەدى ول.

ءمينيستردىڭ ايتۋىنشا، ونلاين قىزمەتتەر ارقاشان دا قولجەتىمدى بولۋى ءتيىس.

«بۇگىنگى تاڭدا ەgov-تا قىزمەت كورسەتۋدى قامتاماسىز ەتەتىن 500-دەن استام اقپاراتتىق جۇيە مەن 1500-دەن استام ينتەگراتسيا جۇمىس ىستەيدى. ياعني، ەgov - بۇل تەك بەت جاعى، بىرىڭعاي تەرەزە سياقتى. مەملەكەتتىك ورگانداردىڭ اقپاراتتىق جۇيەلەرىنىڭ جۇمىس ىستەۋ قابىلەتتىگىن 99,9 پايىزعا دەيىن كوتەرۋ قاجەت»، - دەدى باعدات مۋسين.

بۇعان دەيىن ۇكىمەت باسشىسى اسقار مامين 2021 جىلى «قاعاز» انىقتامالاردى تولىعىمەن جويىلۋى كەرەكتىگىن ايتقان.

«سمارتفون قولدانۋشىلار سانى وسۋدە، وسى رەتتە مەملەكەتتىك قىزمەتتەر مەن سەرۆيستەردى ءموبيلدى پلاتفورمادا كورسەتۋ قاجەتتىلىگى ارتىپ وتىر. ەڭ قاجەتتى الەۋمەتتىك ماڭىزدى مەملەكەتتىك قىزمەتتەردى ءموبيلدى فورماتقا كوشىرۋ جۇمىسىن جانداندىرۋ قاجەت. تسيفرلىق دامۋ مينيسترلىگىنە مۇددەلى مەملەكەتتىك ورگاندارمەن بىرلەسىپ، بارلىق الەۋمەتتىك ماڭىزدى مەملەكەتتىك قىزمەتتەردى eGov موبايلعا اۋىستىرۋ بويىنشا جوسپاردى بەكىتۋدى تاپسىرامىن. جالپى 2021 جىلى «قاعاز» انىقتامالاردىڭ قاجەتتىلىگىن تولىعىمەن جويۋىمىز كەرەك. «ازاماتتارعا ارنالعان ۇكىمەت» كورپوراتسياسىنان قىزمەتتەردى جەتكىزۋدى جانە بارلىق ونلاين قىزمەتتەر مەن سەرۆيستەردىڭ 100 پايىز قولجەتىمدىلىگى قامتاماسىز ەتۋىمىز قاجەت»، - دەدى مامين.

سونىمەن قاتار اسقار مامين مەملەكەت باسشىسى زەينەتاقى مەن جاردەماقىلاردى تاعايىنداۋ جانە تولەۋگە قاتىستى پروتسەستەردى تولىعىمەن تسيفرلاندىرۋدى تاپسىرعانىن اتاپ ءوتتى.

«وسى جىلدىڭ سوڭىنا دەيىن الەۋمەتتىك جانە ەڭبەك سالاسىندا ەلەكتروندىق فورماتتا كورسەتىلەتىن مەملەكەتتىك قىزمەتتەر كورسەتكىشى 90 پايىزعا جەتكىزىلەدى. دەنساۋلىق ساقتاۋ مينيسترلىگىنە ازاماتتارعا قاجەتتى ەلەكتروندىق مەديتسينالىق مالىمەتتەردى بەرۋدى قامتاماسىز ەتۋدى تاپسىرامىن. ەڭبەك مينيسترلىگى مەملەكەتتىك ورگاندارمەن بىرلەسىپ، زەينەتاقى مەن جاردەماقىلاردى تاعايىنداۋ جانە تولەۋ پروتسەستەرىن تسيفرلاندىرۋ ءۇشىن قاجەتتى دەرەكتەردى تولىق تسيفرلاندىرۋ مەن جاڭارتۋدى قامتاماسىز ەتۋدى جۇكتەيمىن», - دەدى پرەمەر-مينيستر.

Abai.kz