ەل باسىنا كۇن تۋعاندا، ەل-جۇرت زيالى قاۋىمنان، ايتارى بار اقىن-جازۋشىدان ۇلتتىڭ  بولاشاعىنا قاتىستى ءسوز كۇتەدى. ال «جاڭاوزەن قىرعىنى» مەن ەلدىڭ ەركىنەن تىس ەۋرازيالىق وداقتىڭ ەندەپ كەلە جاتقانى - «ەل باسىنا كۇن تۋعان» شاقتىڭ ايقىن بەلگىسى ەكەن اقيقات. وسىنداي الماعايىپ زاماندا اقىننىڭ نە ايتارى بار؟ وسى ورايدا ءبىز اقىن اقبەرەن ەلگەزەككە حابارلاسىپ، «سارسەنبىنىڭ ساتىندە» سۇحباتتاسقان ەدىك.
- اقبەرەن مىرزا، «اقىننان حال سۇراما، جىر سۇرا» دەگەن قاعيدانى بۇزىپ، سۇحباتىمىزدى بۇگىنگى تىنىس-تىرشىلىگىڭىزدەن باستاساق. استاناعا كەتىپ قالدى دەپ ەستىپ ەدىك، حال-جاعدايىڭىز قالاي؟
- استاناعا وسىمەن ءۇشىنشى رەت كوشىپ كەلدىم. العاشقى ەكى رەت كەلگەنىمدە جولىم بولمادى. ونىڭ ۇستىنە الماتىنى ولەردەي ساعىنىپ جۇرگەن كەزىم. باستىقتارىم قاتتىراق ۇرسىپ جىبەرسە بولدى، بۇلدانىپ كەتىپ قالا بەرەتىنمىن. ويتكەنى مەن ءۇشىن الماتى قاشان دا ىستىق. كىندىك قانىم تامعان جەر. الماتى - مەنىڭ عاشىعىم. ونى ساعىنباي تۇرا المايمىن.  

ەل باسىنا كۇن تۋعاندا، ەل-جۇرت زيالى قاۋىمنان، ايتارى بار اقىن-جازۋشىدان ۇلتتىڭ  بولاشاعىنا قاتىستى ءسوز كۇتەدى. ال «جاڭاوزەن قىرعىنى» مەن ەلدىڭ ەركىنەن تىس ەۋرازيالىق وداقتىڭ ەندەپ كەلە جاتقانى - «ەل باسىنا كۇن تۋعان» شاقتىڭ ايقىن بەلگىسى ەكەن اقيقات. وسىنداي الماعايىپ زاماندا اقىننىڭ نە ايتارى بار؟ وسى ورايدا ءبىز اقىن اقبەرەن ەلگەزەككە حابارلاسىپ، «سارسەنبىنىڭ ساتىندە» سۇحباتتاسقان ەدىك.
- اقبەرەن مىرزا، «اقىننان حال سۇراما، جىر سۇرا» دەگەن قاعيدانى بۇزىپ، سۇحباتىمىزدى بۇگىنگى تىنىس-تىرشىلىگىڭىزدەن باستاساق. استاناعا كەتىپ قالدى دەپ ەستىپ ەدىك، حال-جاعدايىڭىز قالاي؟
- استاناعا وسىمەن ءۇشىنشى رەت كوشىپ كەلدىم. العاشقى ەكى رەت كەلگەنىمدە جولىم بولمادى. ونىڭ ۇستىنە الماتىنى ولەردەي ساعىنىپ جۇرگەن كەزىم. باستىقتارىم قاتتىراق ۇرسىپ جىبەرسە بولدى، بۇلدانىپ كەتىپ قالا بەرەتىنمىن. ويتكەنى مەن ءۇشىن الماتى قاشان دا ىستىق. كىندىك قانىم تامعان جەر. الماتى - مەنىڭ عاشىعىم. ونى ساعىنباي تۇرا المايمىن.  
الايدا، ەلدىڭ تاعدىرىنا قاتىستى شەشىمدەر بۇگىن استانادا قابىلدانادى. قوعامنىڭ دامۋىنا اسەر ەتەتىن نەگىزگى باستامالاردىڭ تۇساۋى دا وسى جەردە كەسىلەدى. ازامات بوپ قالىپتاسىپ بولدىق، ەندى تۋعان ەلگە تيتتەي دە بولسىن پايدامىز ءتيسىنشى، قاشانعى اقىن بوپ ەركەلەپ جۇرە بەرەمىز دەپ ويلادىم. ارينە، ەلگە پايدانى اۋىلدا ءجۇرىپ تە تيگىزۋگە بولادى. بىراق استانانىڭ ءبىر بۇرىشىندا ءجۇرىپ ىستەگەن جۇمىسىڭ كوبىرەك ناتيجە بەرەتىنى انىق. سونداي ويمەن ارقاعا اۋىپ كەتتىك. «ەر كەزەگى ۇشكە دەيىن» دەگەندەي، ەندى وسى جاقتا تۇراقتاپ قالاتىن شىعارمىن دەگەن ءۇمىتىم بار.
- بىلۋىمىزشە «بوبەك قورىنداعى» قىزمەتىڭىزدەن باس تارتىپسىز.  بۇل ورتادان كەتۋىڭىزدىڭ سەبەبى نە؟
- بۇل جەردە ءبىر دۇنيەنى انىقتاپ كەتكىم كەلىپ وتىر. قازاقستاندا «بوبەك» دەگەن ەكى ۇيىم بار. ءبىرى سارا الپىسقىزىنىڭ ءوزى باسقاراتىن قوعامدىق قور، ەكىنشىسى ءبىلىم جانە عىلىم مينيسترلىگىنە قارايتىن رەسپۋبليكالىق مەملەكەتتىك كاسىپورىن. مەن سول مەملەكەتتىك مەكەمەگە قاراستى «ادامدى ۇيلەسىمدى دامىتۋ ينستيتۋتىن» باسقاردىم. ءيا، ول مەكەمەدەن ءوز ەركىممەن كەتتىم. سەبەبى، مەن ول جەرگە پەداگوگيكالىق تاجىريبەسى بار مامان رەتىندە ەمەس، قارجى جانە وزگە دە شەشىمىن كۇتىپ تۇرعان ماسەلەلەردى رەتتەيتىن مەنەدجەر رەتىندە شاقىرىلعان بولاتىنمىن. وتىرىك ايتىپ قايتەمىن، ءوز باسىم ءبىلىم بەرۋ سالاسىن جاقسى بىلمەيمىن. سوندىقتان، ماعان جۇكتەلگەن تاپسىرمانى ورىندادىم دا، جۇمىستان بوساتۋدى سۇراپ، ءوتىنىش جازدىم. ويتكەنى، ول ورتاعا ۇيىمدى ارى قاراي دامىتاتىن سول سالانىڭ مامانى كەلۋى ءتيىس. ءبىر جاعىنان ەگەر مەن ول جەردە وتىرا بەرسەم، وزىمە دە، ول ينستيتۋتقا دا پايداسىز بولۋشى ەدى.  
- جاڭاوزەن قىرعىنىنا بايلانىستى اقىنداردىڭ ءبىرازى ءۇن قوستى. ءبىرازى جازعانىن «جاقسى ۋاقىتتا» جاريا ەتەرى بەلگىلى: «مەن سول كەزدە وسىلاي دەگەن ەدىم» دەپ. سول «دەگەندى» ءسىز بۇگىن دەي الاسىز با؟
- ارينە، مەنىڭ قازىرگى بەرەتىن جاۋابىم كوپ ادامعا ۇناماۋى مۇمكىن. دەگەنمەن، باتىلدانىپ الىپ، ايتىپ كورەيىن. مەن ناۋقانشىل اقىن ەمەسپىن. ءبىر جەردە قان توگىلىپ، قازاقتى قازاق اتىپ جاتقاندا، بيلىك تۋعان حالقىن اياۋسىز جانشىپ جاتقاندا، سوعان «ءۇن قاتقانسىپ»، وقىرماندار الدىندا ۇپاي جيناۋ ءۇشىن ولەڭ جازۋ - مەنىڭ قولىمنان كەلمەيدى. سوسىن پوەزيا مەنىڭ تۇسىنىگىمدە قوعامدىق پروبلەمالاردى كوتەرۋگە مىندەتتى ەمەس. ول اۋىر جۇكتى قازىر جۋرناليستيكا كوتەرىپ كەلەدى. كەرەك دەسەڭىز، جۋرناليستيكا قازىر وپپوزيتسيانىڭ مىندەتىن اتقارىپ ءجۇر. وسى ورايدا، جاڭاوزەندەگى وقيعاعا بايلانىستى قانشاما ماقالا جازىپ، بيلىكتى وتكىر سىناعان جۋرناليست ازاماتتار مەن ازاماتشالارعا ۇلكەن راحمەت ايتقىم كەلەدى. ال، اقىن مۇنداي جاعدايدا نە ماقالا جازۋى ءتيىس، نە وسىنداي سۇحباتتى پايدالانا وتىرىپ، ءوز پىكىرىن ايتۋى قاجەت.
- ەندەشە ءسىزدىڭ ازاماتتىق پىكىرىڭىزدى قانداي؟
- كەز كەلگەن ەسى دۇرىس ادام - قانتوگىسكە قارسى شىعىپ، ءار ماسەلەنى بەيبىت تۇردە شەشۋگە ۇمتىلۋى كەرەك. وكىنىشكە قاراي ءبىزدىڭ بيلىك پاتسيفيست ەمەس ەكەنىن كورسەتىپ بەردى. مۇنايشىلاردىڭ ماسەلەسىن دەر كەزىندە شەشپەي، ولار نارازىلىق ءبىلدىرۋى مۇڭ ەدى، قارۋ قولداندى. بۇل وتە جاعىمسىز جاعداي. قارۋعا توتەپ بەرۋ وڭاي ەمەس، ارينە. «جاڭاوزەندەگى جاعداي تىنىشتالدى، كوتەرىلگەن جۇرتتى قارۋمەن باسىپ تاستادىق» دەپ جوعارىداعى ازاماتتار ويلايتىن بولسا، قاتتى قاتەلەسەدى. ءوز حالقىنا قارۋ قولدانىپ، ادىلدىك ىزدەگەن ازاماتتاردى قۇرباندىققا شالا سالۋ - ۇلكەن كۇنا. بۇنىڭ ارتى جاقسىلىققا اپارمايدى. جۇمىسسىز قالعانداردى جۇمىسپەن قامتىپ، دەر كەزىندە حالىقتىڭ ۇنىنە قۇلاق توسسا، مۇنداي جاعداي بولماس ەدى. جاڭاوزەندەگى جاعداي  ءبىر كۇندە بۇرق ەتە قالعان جوق، بۇل ايلار بويى قوردالانعان شەر مەن ىزانىڭ ناتيجەسى. سوندا كىم كىنالى؟ قۇربان بولعان الاشتىڭ بالالارى ەمەس، ارينە. ولار بار بولعانى ءوز قۇقىعىنىڭ تاپتالماۋىن تالاپ ەتتى. مۇمكىن ايتقانىنا قۇلاق اسپاعان كەيبىر شەنەۋنىككە زىعىردانى قايناپ، قۇقىق قورعاۋ ورگاندارىنا قول كوتەرگەن شىعار. ارتى نەگە اينالعانىن بىلەمىز. كىم بولسا ول بولسىن، كەز كەلگەن ازامات مۇنداي كەزەڭدەردە حالقىنىڭ جاعىنا شىعىپ، ەلدىڭ ءسوزىن سويلەۋى ءتيىس. مەن بۇل جاعدايدا، بيلىكتىڭ ەڭ الدىمەن مۇنايشىلار ماسەلەسىنە وتە نەمقۇرايدى قاراپ، ارتىنان دەگەنىن ىستەتۋ ءۇشىن قارۋ قولدانعانىن ۇلكەن قاتەلىك دەپ بىلەمىن.          
- قازىرگى كوپشىلىك اقىن-جازۋشىلار ابايعا جۇگىنۋگە شەبەر. بىراق، سولار قازىرگى قازاقتىڭ تاعدىرىنا وراي «قالىڭ ەلىم، قازاعىم» دەپ، كۇڭىرەنە المايتىنى قالاي؟
- كۇڭىرەنە بەرگەننەن نە پايدا؟! ال، مەن-اق  كۇڭىرەنەيىن، ءسىزدىڭ ماسەلەڭىز ودان شەشىلە قالمايدى عوي! ءبارىمىز قوسىلىپ الىپ، كۇڭىرەنىپ كورسەك تە، ابايدىڭ ۇلى مۇڭىن سەزىنە الماسپىز. ويتكەنى ابايدىڭ مۇڭى باسقا مۇڭ. ۇلى كەمەڭگەردىڭ قازاقتىڭ بەيشارالىعى مەن سول كەزدە قاراڭعىلىعىنا ەمەس، قازاقتىڭ ءتاڭىر مەن جاراتىلىس جايلى ەشتەڭە بىلمەي ءوتىپ جاتقانىنا قابىرعاسى قايىستى. جاراتقاننىڭ زاڭدارىن بىلمەي ءومىر ءسۇرىپ، بوستان بوسقا شىن الەمگە اتتانىپ جاتقان قانداستارىنا جانى اشىدى. بۇل مۇلدە باسقا كاتەگورياداعى قاسىرەت. ءبىر جاعىنان ابايدىڭ زامانى باسقا، ءبىزدىڭ زامان باسقا. اركىم ءوز زامانىنىڭ مۇناراسىنان وي تولعايدى، اركىم ءوزى ءومىر ءسۇرىپ جاتقان ءداۋىردىڭ سوققان داۋىلىمەن ارپالىسادى.
حالقىنا جانى اشىمايتىن، ۇلتىنا جاقسىلىق ويلامايتىن قالامگەر بولمايدى. ولاي بولسا، وندا سول ءسوز بەن وي يەسىن جاراتقان ءتاڭىردىڭ ەڭبەگىندە قيسىن بولماس ەدى.
- ال قازاقتىڭ رۋ-رۋعا بولىنۋشىلىگى اسىرەسە اقىن-جازۋشىلاردىڭ اراسىنا دەندەپ بارا جاتقانىن جاسىرا المايتىن شىعارسىز؟ ءبىزدىڭ قالىڭ ەلگە ءسوز ايتار وسى زيالىلارىمىز نەگە ترايباليزم دەرتىنە شالدىقتى دەپ ويلايسىز؟
- ماعان قازاقتى كەزىندە قىرىلىپ قالعان جوڭعارلار: «ترايباليزممەن اۋىرىپ، جۇزگە ءبولىنىپ، جۇزدەرىن كۇيسىن، رۋعا ءبولىنىپ بىتىراپ جۇرىندەر» دەپ قارعاپ-سىلەپ كەتكەن سەكىلدى كورىنەدى. بۇل ءبىزدىڭ ۇلتتىق دەرتىمىز ەكەنىن مويىندايمىن. جەرشىلدىك، رۋشىلدىق، جۇزشىلدىك دەگەن اۋرۋ تەك بيىك مادەنيەتى بار، تەرەڭ ادامداردا عانا بولمايدى. ال، جۇزگە، تاعى باسقاعا  ءبولىنىپ، ءتۇرلى-ءتۇستى بولىپ جۇرگەن ادامدار بولسا، ول زيالى ەمەس. مەن ولاردى شىرىگەن جۇمىرتقا دەر ەدىم. ول ءوزى ءبىر دىردەكتەگەن سورلى، تالانتسىز ءبىر بەيشارا بولۋى كەرەك. نە قابىلەتى جوق، نە دارىنى جوق «باۋىرلارىن» كورىنگەن جەرگە تارتىپ، قولدان جاسايتىن ادامدار - كۇناھارلار. سەبەبى، ولار سول جەرگە نەمەسە سول ابىرويعا لايىقتى ادامعا قيانات جاساپ، ونىڭ ءومىرىن قۇرتادى، تاعدىرىن تالقان ەتەدى.
ءبىر ايتا كەتەتىن نارسە، ادەبيەتتە ءترايباليزمنىڭ جولى بولمايدى. سەبەبى، تالانتسىز ادام ادەبيەتتە بىردەن ءبىلىنىپ قالادى. ونىڭ ۇستىنە قازىرگى زاماندا، ءسوز ونەرىندە ەشكىم ەشكىمدى سۇيرەپ كەرەمەت قىلا المايدى. سولاي ىستەپ جۇرگەندەر بار شىعار، بار بولسا، وتە كۇلكىلى جاعداي بوپ كورىنەتىن ەدى. ادەبيەتتەگى ترايباليستەردىڭ كۇنى قاراڭ. سەبەبى، ادەبيەت - جالعىزداردىڭ مايدانى.
- ەندەشە ايتىڭىزشى، جوقشىلىقتان جارىمكوڭىل بولىپ جۇرگەن جۇرتشىلىق، اسىرەسە جۇمىسسىز قالعان جاستار قانشالىقتى ۇلتجاندى دەپ ويلايسىز؟
- ۇلتجاندىلىق - ساۋدا ەمەس قوي، سەن مەنى جۇمىسقا قوي، پاتەر بەر، سوسىن مەن وتانىمدى سۇيە باستايمىن دەيتىن. ۇلتجاندىلىق، وتاندى ءسۇيۋ - ادامنىڭ ىشكى الەمىندەگى قۇبىلىس. «وتاندى ءسۇيۋ - يماننان» دەپتى پايعامبار ءبىر حاديسىندە. سول ءسوز - اقيقات.
جاس كەزىندە ادام وكپەشىل، ۇنەمى نارازى كۇيدە جۇرەدى. ول ادامنىڭ بالعىن كەزىندەگى پسيحوفيزيولوگيالىق سەبەپتەرىمەن تۇسىندىرىلەدى. بىراق گەندەگى اتا-بابا رۋحى ونىڭ جۇرەگىندەگى ۇلتىنا، جەرىنە دەگەن ماحاببات سەزىمىن ءبىر ساتكە دە سۋىتپاق ەمەس. جالپى، بۇگىنگى جاعدايىنا نارازى ازاماتتار سول ءۇشىن ۇلتىن سۇيمەي قالۋى مۇمكىن دەگەن قيسىنعا كەلمەيدى.
- ەندەشە بۇل سۇراققا باسقاشا قىرىنان كەلەيىك: اتا-بابادان ميراس بولىپ قالعان ۇلان-بايتاق ولكە، استى دا، ءۇستى دە بايلىققا تولى جەرىمىزگە وزگەلەر كوز الارتقان قازىرگى قوعامدا ءوز ەلىندە وگەي بولعان قازاق بالاسى تەرەششەنكو مەن باتۋرينا سياقتى لاتيفۋنديستەر ساتىپ العان جەردى قورعاۋعا ءازىر مە؟
- قۇداي بەتىن ارى قىلسىن، جەرىمىزگە جاۋ كىرسە، سول تەرەششەنكوڭىز بەن باتۋرينالار يەلىك ەتكەن گەكتارلارىنىڭ قايدا قالعانىن بىلمەي، باس ساۋعالاي قاشاتىنى انىق. ال، ءبىزدىڭ ەر جىگىتتەر بۇل تەرەششەنكونىڭ نەمەسە حراپۋنوۆتىڭ جەرى ەكەن دەپ قاراپ تۇرمايدى. جەر - قازاقتىكى. ءبىز قورعاساق جەرىمىزدىڭ تۇتاستىعىن قورعايمىز. وعان قۇداي جەتكىزبەسىن.
- ارينە، جەرىمىزدىڭ بايلىعىنا يە بولماساق، جالپاق قازاقتىڭ جارتىسى جۇمىسسىز بولسا، قازاق قازاقتى جەمقورلىقپەن توناپ جاتسا، سوندا ءبىز قانداي حالىق بولعانىمىز؟
- وكىنىشكە قاراي، راس، قازاق ءوز بايلىعىنىڭ قىزىعىن كورىپ وتىرعان جوق. ونى ءسىز دە، مەن دە، كوشەدە جۇرگەن كەز كەلگەن باۋىرىمىز دا ايتا الادى. ءبىز ءوزى باسىمىزدان سورىمىز ارىلماعان ەل بولدىق. بودان ەدىك، تاۋەلسىزدىك الدىق. ەركىندىك الدىق قوي، ەندى ءوز قولىمىز ءوز اۋزىمىزعا جەتەتىن شىعار دەپ جۇرگەندە، تاعى بىردەڭە شىعا قالادى، ايتەۋىر...ءتاڭىردىڭ نازارى ءتۇزۋ بولسىن، قانشاما قيىندىقتان كورگەن قازاقتىڭ ماڭدايى دا جارقىرار ءبىر كۇنى. مەن سوعان سەنەمىن.
ال جالپى قانداي حالىقپىز دەگەن سۇراققا بىلاي دەپ جاۋاپ بەرەر ەدىم: ءبىز وتە نەمقۇرايلى حالىقپىز. بىزگە ءبارىبىر سەكىلدى، كەيدە... توناپ جاتىر ما، ۇرلاپ جاتىر ما، قۇقىعىڭ تاپتالىپ جاتىر ما، جۇرە بەرەمىز. جالپى، باسقارۋعا وتە ىڭعايلى ۇلتپىز عوي.
- سىرت كوزگە بولمىسى بولەكتەۋ، ويى جۇمباق، بىراق كەسەك سويلەيتىن ءسىزدى اقىن ەمەس، اكىم بولۋعا لايىق دەگەن ءسوز ەستىدىك. مۇنداي ءسوزدى باقتالاس اعايىندار اراسىنان ءوز قۇلاعىڭىزبەن ەستىگەن جوقسىز با؟
- مەن ۋنيۆەرسيتەت بىتىرگەلى مەملەكەتتىك قىزمەتتە ءجۇردىم. اراسىندا ءۇزىلىس بولعاندا باسپادا ىستەدىم. جاستايىمنان كىشىگىرىم بولسا دا، باسشىلىق قىزمەتتەردە بولدىم. ول كۇنكورىس. سوسىن يكەمىڭ بولسا، نەگە ىستەمەسكە؟ نەگىزىندە «مەملەكەتتىك قىزمەتتە ىستەۋ وڭاي شارۋا» دەپ ويلايتىندار قاتەلەسەدى. ءبارى جەمقور، ءبارى بايۋ ءۇشىن قىزمەتكە بارادى دەپ قاتەلەسپەۋ كەرەك. بۇل دا ءبىر مەنىڭ ازاماتتىق پوزيتسيامنىڭ جەمىسى شىعار. قوعامعا پايدالى بولۋ، ەلگە از دا بولسا ەڭبەگىڭدى ءسىڭىرۋدىڭ جولى. سوندىقتان اتقارىپ كەلگەن، الدا اتقاراتىن جۇمىسىمدى ەل-جۇرت «بۇنىكى دا مانساپ قۋ ەكەن» دەپ ويلاماسا دەپ تىلەيمىن.
ال، اقىندىق - ءتاڭىردىڭ سىيى. ول سەنىڭ بويىڭا بىتسە، مازا بەرمەيدى، شىقپاي قويمايدى. قىزمەتتە جۇرگەنىمدى بىلەتىندەر، اقىن ەمەس، اكىم بولعانى دۇرىس دەپ ايتقان شىعار. قىزمەت بۇگىن بار، ەرتەڭ جوق، ال، ولەڭ قاشاندا مەنىمەن بىرگە. مەن  ءۇشىن قىزمەت ەمەس، ولەڭىمنىڭ تاعدىرى ماڭىزدىراق.
- دەگەنمەن اكىم بولۋدىڭ نەسى ايىپ، ەگەر حالقىڭا جاقىن بولساڭ؟
- ارينە!
- ال ادەبيەتتەگى قانداي جاعداي ءسىزدىڭ مازاڭىزدى الىپ ءجۇر؟
- ادەبيەتتە مىنا ماسەلەنى شەشۋ كەرەك ەدى، مىنا ءبىر جاعداي مازامدى الىپ ءجۇر دەيتىن سالا ەمەس قوي. ول ءار قالامگەردىڭ ىشىندەگى الەمدەردەن قۇرالاتىن عارىش. جازىلاتىن دۇنيە جازىلادى، تاريح وزىنە كەرەگىن الىپ قالادى، قالعانى اقپاراتتىق كەڭىستىككە قايتا ورالادى.    
- دەگەنمەن سوڭعى ون جىلدا قازاق ادەبيەتىنە قۇبىلىس اكەلدى دەگەن قانداي شىعارمانى اتاي الاسىز؟
- سوڭعى ون جىلدا جاستار قارقىندى جازدى. مەن ءوز بۋىنىما عانا جانە تەك اقىندارعا عانا باعا بەرىپ كەتسەم، قارسى بولمايتىن شىعارسىز. ماسەلەن، ەرلان ءجۇنىستىڭ، سەرىك ساعىنتايدىڭ، ۇلاربەك بايتالاقتىڭ، باۋىرجان قاراعىزۇلىنىڭ، توقتارالى تاڭجارىقتىڭ، ازامات تاسقاراۇلىنىڭ جانە سول سەكىلدى ءبىر شوعىر جاستاردىڭ ارقايسىسى كەم دەگەندە قۇبىلىس دەۋگە تۇرارلىق ءبىر شىعارما جازدى دەپ ايتۋعا تولىق نەگىز بار.
جاستاردىڭ شىعارماشىلىعىنان بەيحابار كەيبىر بىلگىش اعالارىمىز: «جاستار كۇڭگىرت، جاستار قيالي، جىلاۋىق، مۇڭشىل تاعى بىردەڭە» دەپ بەكەر جازعىرادى. قازىر جاڭا پوەزيانىڭ، مۇلدە وزگە پوەزيانىڭ ىرگەتاسى قالانىپ جاتىر. بۇعان قارسىلىق بىلدىرەتىندەردىڭ ەركى وزدەرىندە، بىراق قازاق ادەبيەتىندە بۇرىن-سوڭدى بولماعان پسيحواناليز باعىتىنداعى شىعارمالار جازىلدى، جازىلىپ تا جاتىر. قازاق پوەزياسىن كوكجيەگى كەڭەيىپ كەلەدى، بۇل ءبىزدىڭ ءتىلدىڭ كوركەيۋىنە، ۇلتتىڭ ءوزىن-ءوزى تانۋىنا ۇلكەن سەپتىگىن تيگىزەدى دەپ سەنەمىن. ەرتەڭ باسقا ءبىر زاماندار تۋادى، سول كەزدە الەمدىك دەڭگەيدە الاشتىڭ پوەزياسى جاقۇتتاي جارقىراپ، ادامزات ساناسىنا بەرىك ورنايتىن بولادى. ونى ءبىز كورمەۋىمىز مۇمكىن، بىراق قازاق امان بولسا، سوعان كۋا بولادى. الەم قازاقتىڭ دۇنيەتانىمىنا، قازاقتىڭ فانتازياسى مەن سۇلۋ مۇڭىنا عاشىق بولاتىن زامان كەلەدى.
- اۋمين دەلىك! سۇحباتىڭىزعا راحمەت!

اڭگىمەلەسكەن - ارداق يمانبەكقىزى،
«دات» گازەتى، №06 (134) 1 اقپان 2012 جىل.