قالالانۋ ۇدەرىسى بويىنشا رەسەي بىزدەن الدا ەكەن. ونداعى قالا جۇرتى — 74,66 %، اۋىل جۇرتى — 25,34 % (2020). 2020 جىلدىڭ 1 قاڭتارىنا 173 قالاسىندا 100 مىڭنان استام حالىق تۇرادى ەكەن، سونىڭ ىشىندە 15 قالانىڭ 1 ميلليوننان استام تۇرعىنى بار، ال 38 قالاسىندا جارتى ميلليوننان استام جاران تۇرادى.

قازاقستان اگرارلىق ەل. قالالانۋ ۇدەرىسى باياۋ جۇرۋدە. ءتىپتى اۋىلدىق جەرلەردەگى حالىق سانى 821 مىڭ ادامعا ارتقان، ال قالالىقتاردىڭ سانى تەك 206 مىڭعا وسكەن. قازاقستاندا قالا حالقى 54,1% بولسا، اۋىل جۇرتى 45,9%. وسى كورسەتكىشتى رەسەيمەن سالىستىرىپ كورىڭىز.

ال ءبىز ەلوردا، الماتى، شىمكەنت ءوسىپ جاتىر دەيمىز. جاقىندا بۇعان تۇركىستان قوسىلدى. ءبىز وسىعان ءمازبىز.

مۇنى تەرەڭىرەك زەردەلەگەن ماماندار بارشىلىق. ولاردىڭ تالداۋلارى كوپشىلىك نازارىنا جەتە قويعان جوق. بىزدىكى ءۇستىرت شولىپ، سونى فەيسبۋك قاۋىمىنا ۇسىنۋ.

مەنىڭ جەكە پىكىرىم بويىنشا، ەلىمىزدىڭ اگرارلىق سيپاتتان قالالىق، وندىرىستىك سيپاتقا قاراي اۋىسقانى ءتيىمدى. ءبىزدىڭ ەلدە اۋىلدىق جەرلەردە جۇمىس كۇشى تىم ارتىق. كوپشىلىك جۇرتتىڭ تىركەۋى اۋىلدا بولعانىمەن، تۇرمىس-تىرشىلىگى، كاسىبى قالامەن بايلانىستى (تاكسي، ۆاحتا، قۇرىلىس، بازار، جۇكشى، ارباكەش، ساۋدا). اۋىلدا تۇراتىنداردىڭ ءبىراز بولىگى ۆاحتامەن ءتۇرلى كەن ورىندارىندا جۇمىس ىستەپ ءجۇر. ۆاحتاسىنان سوڭ، ۇيىنە كەلىپ مالىن باعادى.

مۇنى ەسكەرسەك، ارينە، اۋىل حالقىنىڭ سانى رەسمي ستاتيستيكادان وزگەشەلەۋ بولىپ شىقپاق.

بۇل اۋىلداردى قاڭىراتىپ تاستا دەگەن ءسوز ەمەس، ونداعى ەڭبەك ونىمدىلىگىن ارتتىرىپ، ەگۋشىلىك پەن ءوسىرۋشى ەڭبەكتى وڭدەۋشىلىككە، وندىرۋشىلىككە جالعاستىرۋى كەرەك. اۋىلداردا قالامەن دەڭگەيلەس تۇرمىس، ينفراقۇرىلىم جاساۋدى ماقسات ەتۋ كەرەك.

تۇرمىس دەگەندە جۇرتىڭ كوبى اۋىلدا دا پەشى مەن تۋالەتى ىشتە، ىستىق سۋى دا بار دەگەندى ايتادى. بۇل كورسەتكىش ەمەس. شەتەلدە تۋالەتى، دۋشى، توسەگى، اس ىشەتىن جەرى ىشىندە جاساقتالعان جۇك ماشينالارى بار. بىراق ول بار-جوعى ماشينا، قالا ەمەس.

قالا تيپتەس اۋىلدار دەگەنىمىز مۇلدە بولەك ارحيتەكتۋرا، بولەك ينفراقۇرىلىم، دامىعان تاربيە، وقۋ-ءبىلىم، مادەنيەت-سپورت وردالارى بار ەلدى مەكەندەر.

بولات سىزدىقتىڭ جازباسى

Abai.kz