بەس كۇندىك جالعاننان مارادونا دا ءوتتى. ونىڭ قازاسى الەمدىك اۋقىمداعى قايعىلى وقيعاعا ۇلاسىپ، ءتىپتى، مىنا ءبىر جاھاندىق ىندەتتىڭ جايتىن دا ۇمىتتىرىپ جىبەرگەندەي.

بۇرىندارى دۇنيە جۇرتشىلىعىنىڭ اڭگىمەسىنە تۇزدىق بولىپ جۇرگەن امەريكالىق پرەزيدەنت سايلاۋى دا ءادىرام قالدى. وسىلايشا، ادامزات بالاسىنىڭ باسىم بولىگىن ءباتۋاسىز ساياسات، تىرشىلىكتىڭ تاۋسىلماس مەحناتتارى ەمەس، ەڭ الدىمەن ادامنىڭ ءوزى، ونىڭ دۇنيەدەگى ورنى، عۇمىرىنىڭ ءمانى الاڭداتاتىنى تاعى ءبىر اڭعارىلدى. بۇل جولى وسىناۋ وتكىر اقيقات مارادونانىڭ قازاسى تۇسىندا اشىلۋى سىرت قاراعاندا بايقالماعانداي كورىنگەنىمەن، اركىمنىڭ ىشكى تۇيسىگى مەن جان دۇنيەسىن قايتالاي سوعىپ، سىلكىپ وتكەنى انىق. نەگە مارادونا؟ ويتكەنى ول تاريحتى جاساۋشى جان رەتىندە وزىمەن بىرگە بۇتىندەي ءبىر ءداۋىردى الا كەتتى.

جەر شارىنىڭ قاي تۇكپىرىندە بولماسىن كەز-كەلگەن بالا، سونىڭ ىشىندە ەڭ ارتتا قالعان دەيتىن ەلدەردىڭ، جالاڭ اياق، ءجالاڭتوس كەدەي بالالارىنىڭ ويناۋىنا، ءتىپتى كاسىبي اينالىسۋىنا مۇمكىندىك بەرەتىن سپورتتىڭ جالعىز ءتۇرى، جاپپاي تانىلعان ءتۇرى – فۋتبولدىڭ پاتشاسى، ءارى تۇتاس قۇبىلىس بولعاندىقتان دا، مارادونا كۇللى ادامزات ءۇشىن ءوز جاقىنىنداي بولىپ كەتكەن جان. سوندىقتان ونىڭ فۋتبولدان سىرتتاعى بەينەسى، ەت پەن سۇيەكتەن جارالعان كادىمگى ادام رەتىندەگى ءىس-ارەكەتتەرى، كوپشىلىككە ءمالىم داۋلى، شۋلى جايتتاردىڭ ەسكە دە الىنباي، كولەڭكەدە قالۋى دا سودان. بۋەنوس-ايروستىڭ شەتىندەگى جاتاق دەۋگە كەلەتىن جۇپىنى مەكەننىڭ تۇلەگى، ءتورت قىزدان كەيىن دۇنيەگە كەلگەن سۇيكىمدى ۇل، ءوزىمىزدىڭ كەز-كەلگەن اۋىلدىڭ قارا دومالاعى سەكىلدى اڭقاۋ دا الاڭعاسار، كادىمگى جۇگىرمەك، بىراق تا ءتاڭىرىنىڭ ايرىقشا ىقىلاسىمەن بولەك جاراتىلعان، دارا تۋعان بالا ديەگونىڭ ۇلى مارادوناعا اينالۋىنىڭ قالتارىستارى قالىڭ ساپارناماسىندا، شىنىنا كەلگەندە، تراگەديالى سيپاتىندا، ميلليونداعان فاناتتارىنىڭ، شىنايى كوڭىلدەن شىققانىمەن قاۋمالاعان ءنوپىردىڭ قىسىمى، اقىرىندا نيەتى قارا توپتاردىڭ  قولتاڭباسى تۇرعانى كەيىننەن بارىپ جاريا بولعان. سوندىقتان ونىڭ ەڭ جاقىن ادامدارى مارقۇمنىڭ ءومىرى ديەگو مەن مارادونا اراسىنداعى الاپات ارپالىسپەن وتكەنىن كوكىرەكتەرى قارس ايرىلا اڭگىمەلەيدى. ارماندوداي اردا ۇل، سۇيكىمدى باۋىر، سۇيىكتى جار، جانى نازىك اكە ديەگو بار دا، جاسىل الاڭ نايزاعايى، جانكۇيەرلەرىنىڭ جان راحاتى، الاسۇرعان كوڭىلىنىڭ ماۋقىن باسۋشى، ال كوماندا قوجايىندارىنىڭ قالتاسىن قامپيتۋشى ەرەن ويىنشى مارادونا بار.

بەكزاتتان ايرىلعاندا بەلگىلى اقىن اپكەمىز وكسىپ تۇرىپ ايتقانىنداي، حالىقتىڭ، قالىڭ توپتىڭ قۇشاعى قاتتى بولاتىنى باعزىدان بەلگىلى. ميلليونداعان تابىنۋشىلاردىڭ كوزسىز قۇشتارلىعى، جانتالاسقان اركىمنىڭ ديەگونىڭ جەيدەسىنە جارماسىپ، ال ءتىلشى قاۋىمىنىڭ ونىڭ باسقان قادامىن قالت جىبەرمەي، بۇكىل تىنىس-تىرشىلىگىن كامەرا قاراۋىنا الۋى، ايەل قاۋىمىنىڭ ىستىق ىقىلاسى – مۇنىڭ بارشاسىنا مىڭ جەردەن ەرەكشە جاراتىلسا دا، ءتىرى جاننىڭ توتەپ بەرۋى قيىن، البەتتە.

دەسە دە، كوزىنىڭ تىرىسىندە-اق ءوز ەلىنىڭ شىن مانىندەگى قاستەرلى رامىزىنە اينالعان مارادونانىڭ قۇپياسى ونىڭ تۋعان وتانىنا شەكسىز بەرىلىپ، ءوز حالقىن جانىنان ارتىق جاقسى كورگەنىندە بولسا كەرەك. قارۋلى سوعىستا جەڭىلىستەن نامىسى تاپتالعان حالقىنىڭ رۋحىن اسقاقتاتىپ، جاسىل الاڭدا قارسىلاستارىن تىزە بۇكتىرگەن جەكە ەرلىگى، ونىمەن شەكتەلمەي الەمدى مويىنداتقان جانكەشتىلىگىن ارگەنتينالىقتار ماڭگىلىك ۇمىتپاسى كامىل. وسىلايشا، فۋتبول -ۇلتتىق يدەيا دەڭگەيىنە كوتەرىلگەن مۇنداي بىرەگەي ەلدە مارادونا – ول ارگەنتينا، ال ارگەنتينا – ول مارادونا ۇعىمى جۇرەكتەردە وشپەستەي جاتتالىپ قالعان.

پاتشالاردىڭ ءوزى دۇنيەدەن وتكەندە جاسالا بەرمەيتىن ايرىقشا قۇرمەتتىڭ، قازاسىنا وراي ءۇش كۇندىك ازا تۇتۋ جاريالانۋى، ول از دەسەڭىز بۇكىل دۇنيەجۇزى بويىنشا فۋتبول فەدەراتسيالارىنىڭ، انىعى بارشا الەمنىڭ ازا تۇتۋى جاسىل الاڭداعى ءاربىر ويىنىن تارتىستى دراماعا، كەيبىر ساتتەرىندە ءتىپتى پوەزياعا اينالدىرا بىلگەن ديەگو مارادونانىڭ ءبىر ەلدىڭ ۇلانى عانا ەمەس، بارشا ادامزات بالاسىنا ورتاق تۇلعا ەكەندىگىن بىلدىرگەنى، كوز جاسىن كولدەي قىلعان ارگەنتينالىقتاردىڭ مەملەكەت پەن ۇلت رەتىندەگى بىرتۇتاستىعىن پاش ەتكەنى الدەبىر تەرەڭ ويلارعا جەتەلەپ بارىپ، تابانىڭ ءتيىپ تۇرعان تۋعان توپىراعىڭا قايتا ورالاسىڭ، بابالار ميراس ەتكەن اتامەكەنىڭنىڭ، قاستەرلى حالقىڭنىڭ كەلبەتى مەن كەلەشەگى ءسات سايىن ساناڭدى سىلكي تۇسپەك!

مۇحتار كارىباي،

ءالمۇرات تۇرعانبەكوۆ

Abai.kz