بۇۇ باس اسسامبلەياسىنىڭ سەسسياسىندا قىرىمدى ميليتاريزاتسيالاۋ ماسەلەسى بويىنشا قارارعا قول قويىلدى. وندا بۇۇ رەسەيدى ۋكراينا تەرريتورياسىن وككۋپاتسيالاۋدى جانە قىرىم تۇرعىندارىن رەسەيدىڭ قارۋلى كۇشتەرىنە شاقىرۋدى توقتاتۋ كەرەكتىگى ايتىلعان. 

7 جەلتوقساندا بۇۇ باس اسسامبلەياسىنىڭ 75-سەسسياسىنىڭ قاتىسۋشىلارى قىرىم اۆتونوميالىق رەسپۋبليكاسى مەن سەۆاستوپول قالاسىن، سونداي-اق قارا جانە ازوۆ تەڭىزدەرىن ميليتاريزاتسيالاۋ پروبلەماسى بويىنشا قارار قابىلدادى.

قۇجاتتى 63 مەملەكەت قولداپ، 17 ەل قارسى بولعان. تاعى 62 مەملەكەت قالىس قالدى. رەزوليۋتسيانى جاساۋشىلار رەسەيدى «دەرەۋ، تولىقتاي جانە ەشقانداي شارت قويماي، ءوز قارۋلى كۇشتەرىن قىرىمنان شىعارىپ، ۋكراينا تەرريتورياسىن ۋاقىتشا باسىپ الۋدى توقتاتۋعا» شاقىردى.

«سونىمەن قاتار، رەسەي حالىقارالىق گۋمانيتارلىق قۇقىقتى بۇزا وتىرىپ، قىرىم تۇرعىندارىن رەسەيدىڭ قارۋلى كۇشتەرىنە شاقىرۋدى، سونداي-اق ءبىلىم بەرۋدى «ميليتاريزاتسيالاۋدى» توقتاتۋى كەرەك»، دەلىنگەن قۇجاتتا.

قۇراستىرۋشىلار قىرىمداعى وقۋ ورىندارىنىڭ اسكەري-پاتريوتتىق تاربيەسى رەسەي جۇيەسىنىڭ نەگىزىندە ەكەنىن ايتتى.

ۋكراينانىڭ سىرتقى ىستەر ءمينيسترى دميتري كۋلەبا قازىرگى قاراردى «رەسەيگە كۇشەيىپ جاتقان قۇقىقتىق قىسىمنىڭ جاڭا ەلەمەنتى» دەپ اتادى. ونىڭ ايتۋىنشا، قۇجاتتى قابىلداۋ قىرىمدى ميليتاريزاتسيالاۋ پروبلەماسى «حالىقارالىق قوعامداستىقتىڭ نازارىندا» تۇرعانىن كورسەتەدى جانە ول «قىرىمدى ۇلكەن اسكەري بازاعا اينالدىرۋدى» ايماقتاعى قاۋىپسىزدىك پەن تۇراقتىلىققا تىكەلەي قاتەر توندىرەدى دەپ سانايدى.

«ەۋرووداق ۋكراينانىڭ ەگەمەندىگى مەن اۋماقتىق تۇتاستىعىن قولدايدى، رەسەيدىڭ قىرىمدى اننەكسيالاۋىن زاڭسىز دەپ سانايدى جانە ونى مويىنداعىسى كەلمەيدى»، - دەدى بۇۇ جانىنداعى ەو دەلەگاتسياسىنىڭ جەتەكشىسى سيلۆيو گونزاتو.

«رەسەيدىڭ ارەكەتى حالىقارالىق قۇقىق پەن حالىقارالىق ءتارتىپتىڭ نەگىزگى قاعيدالارىن ورەسكەل بۇزۋ بولىپ تابىلادى», - دەيدى بريۋسسەلدىڭ رەسمي مالەمەمەسىندە.

گونزاتونىڭ پىكىرىنشە، ۋكراينا تۇبەگىن ميليتاريزاتسيالاۋ قارا تەڭىز ايماعىنداعى قاۋىپسىزدىك جاعدايىن ناشارلاتتى.

ايتا كەتەيىك، رەسەي 2014 جىلدىڭ ناۋرىزىندا قىرىمدى ءوزىنىڭ اۋماعى دەپ جاريالادى. كيەۆ جانە الەمدەگى ەلدەردىڭ باسىم كوپشىلىگى مۇنى مويىندامايدى. كوپ ۇزاماي اقش، ەۋروپالىق وداق، اۆستراليا، جاڭا زەلانديا جانە كانادا ماسكەۋگە قارسى العاشقى سانكتسيالاردى ەنگىزگەن.

ال رەسەيدى قىرعىزستان، بەلارۋس، قىتاي، ارمەنيا، سولتۇستىك كورەيا، يران، سۋدان، سيريا، ۆەنەسۋەلا، ميانما جاقتاعان.

قازاقستان بۇل ماسەلەدە بەيتاراپ پوزيتسيا ۇستاندى.

Abai.kz