قۇقىق قورعاۋشىلاردىڭ ايتۋىنشا، بوقاەۆ جاعدايى جاقسى ەكەنىن، دەموكراتيا ءۇشىن كۇرەستەن باس تارتپايتىنىن ايتقان.

- ماكس ءوزىن اتىراۋعا - تۋعان قالاسىنداعى كولونياعا اۋىستىرعانىنا قۋانىپ وتىر. اقتوبەمەن سالىستىرعاندا ءوزىن جاقسىراق سەزىنەدى. كۇرەسىن جالعاستىرۋعا دايىن، ساياسي جاڭالىقتاردىڭ ءبارىن قاداعالاپ وتىر. مەملەكەتتىك ەمەس سەكتورداعى جاعدايدان دا حاباردار. ورتالىق سايلاۋ كوميسسياسىنداعى وزگەرىستەردى دە بىلەدى. سوزىنەن وپتيميزم سەزىلەدى، ءتىپتى ەشكىم ەشتەڭە ىستەمەسە، قايتا الاڭعا بارامىن دەپ وتىر، - دەيدى باقىتجان تورەعوجينا ازاتتىق تىلشىسىنە.

قۇقىق قورعاۋشىلار ساياسي تۇتقىندار قاتارىنا قوسقان ماكس بوقاەۆقا تورەعوجينانىڭ ايتۋىنشا، وسىعان دەيىن بىرنەشە رەت "بيلىك ادامدارى كەلىپ، كەلىسىم جاساۋعا تىرىسقان", بىراق بەلسەندى كەلىسپەگەن. قىركۇيەك ايىندا اقتوبەدەن اتىراۋداعى كولونياعا اۋىستىرعاننان كەيىن دە وزدەرىن "پرەزيدەنت اكىمشىلىگىنەنبىز" دەپ تانىستىرعان ەكى ادام (فاميليالارىن دا اتاعان) كەلگەن.

- ولار ء"بىز سەنى دەرەۋ بوساتامىز، ول ءۇشىن ءتىپتى ارىز جازۋدىڭ دا قاجەتى جوق، تەك ەكولوگيا ماسەلەلەرىمەن اينالىساسىڭ جانە ىسىڭە مونيتورينگ جاسايتىن كۋراتور بەكىتەمىز" دەپ ايتقان. ال ماكس بوقاەۆ بۇل تالاپتارمەن كەلىسپەگەن، - دەيدى تورەعوجينا.

بوقاەۆ اقتوبەدەگى كولونيادا وتىرعان كەزدە دە "كەلىسىمگە كەلۋ ءۇشىن" بىرنەشە ادام كەلگەنىن ايتقان. ول كەزدە دە بەلسەندى كەلىسىمگە كەلۋدەن باس تارتقان.

تورەعوجينانىڭ ايتۋىنشا، بۇۇ بىرنەشە جىل بۇرىن قازاقستان بيلىگىن ماكس بوقاەۆتى بوساتۋعا شاقىرعانمەن نۇر-سۇلتان ۇسىنىستى ورىنداماي كەلەدى.

46 جاستاعى ماكس بوقاەۆ 2016 جىلعى جەر ميتينگىلەرىنەن كەيىن (جۇرت ول كەزدە بيلىكتىڭ جەردى شەتەلدىكتەرگە جالعا بەرۋ تۋرالى زاڭىنا قارسى شىعىپ، ىزىنشە بيلىك بۇل زاڭعا موراتوري جاريالاۋعا ءماجبۇر بولعان) "الەۋمەتتىك ارازدىق تۋدىردى", "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەگەن ايىپپەن بەس جىلعا سوتتالعان ەدى.

قازاقستاندىق قۇقىق قورعاۋشىلار ماكس بوقاەۆتى "ساياسي تۇتقىندار" تىزىمىنە قوسقان. رەسمي نۇر-سۇلتان ەلدە ساياسي تۇتقىنداردىڭ جوق ەكەنىن العا تارتادى.

وسىعان دەيىن حالىقارالىق ۇيىمدار نۇر-سۇلتاندى "پىكىر ايتۋ جانە جينالۋ ەركىندىگى قۇقىعىن پايدالانعانى ءۇشىن" قامالعان بەلسەندىلەر مەن قۇقىق قورعاۋشىلاردى بوساتۋعا شاقىرعانمەن قازاقستان بيلىگى رەاكتسيا بىلدىرمەگەن.

قازاقستاننىڭ ءوز ىشىندە وقتىن-وقتىن بولاتىن بەيبىت ميتينگىلەردە بەلسەندىلەر بيلىكتەن ماكس بوقاەۆتى اقتاپ، تۇرمەدەن بوساتۋدى تالاپ ەتىپ كەلەدى.

Abai.kz