مۇراعاتىمدى اقتارىپ وتىرعانىمدا مىنا ءبىر سۋرەت كوزىمە وتتاي باسىلدى. سونداعى ءبىر كەلگەن وي.

***

قولدان جاسالعان قايراتكەرلەر، ورتاشا تالانتتار كوبەيگەن زامان. ارينە، ونداي قايراتكەرلەردىڭ مىنەزى دە قولدان جاسالادى، كىسىلىك، كىشىلىك قاسيەتى دە از بولادى. ۋادە بەرگىش، الدامپاز. ەكى سويلەيدى. ودان كەيىن جۇرتقا قايدان سۇيكىمى بولسىن.

كەشەگى قۇدايدىڭ اتىن كىشى ارىپپەن جازاتىن قوعامدا مىنەزىن وزگەرتپەگەن بىرنەشە ادام بولسا، سونىڭ ءبىرى دە بىرەگەيى باۋىرجان اتامىز ەدى. سول سۇيەككە سىڭگەن مىنەزىمەن كەلدى، كەتتى. سول مىنەزىمەن، قاسيەتىمەن ۇلت مۇددەسىنە، ەلگە قىزمەت ەتتى.

دەرتى – ەل مەن جەر، ۇلت تاعدىرى بولدى.

سەرتى – سول جولدا تەك مىنەزى ارقىلى جەڭىسكە جەتەتىنىن ءبىلدى.

قاراپ وتىرساڭىز، ءبارىن كادر ەمەس، مىنەز شەشەدى. مىنەزى جوق كادر تۇك شەشپەيدى. ارينە، ۇردا-جىق مىنەز ەمەس، اقىلعا، پاراسات-پايىمعا، ءبىلىم-بىلىككە، ادامگەرشىلىككە نەگىزدەلگەن مىنەز. «باسىڭداعى باقىتتىڭ قادىرىن قونعاندا بىلمەيسىڭ، ۇشقاندا بىلەسىڭ» دەيدى باۋكەڭ. دەمەك، باقىتتى ۇستاپ تۇرۋ دا مىنەزدى ادامنىڭ قولىنان كەلەدى.

باتىردىڭ ۇلى باقىتجان بىردە «اكەم ءومىر بويى ىزدەگەن ۇيلەسىمىن تابا الماي كەتتى» دەپتى.

ارينە، مۇلتىكسىز مۇسىننەن ءمىن ىزدەگەن، مىنەزسىز، تايتىكتەرى مەن تالپىشتەرى تالتاڭداپ كەتكەن قوعامنان قانداي ۇيلەسىم تابىلۋى مۇمكىن. البەتتە، باۋكەڭدى مىنەزدى بولعانىمەن، ءمىنسىز دەۋگە بولماس. ەگەر قاتەلىگى بولسا، ودان دا ۇيرەنۋگە بولادى. ال ەل، ۇلت مۇددەسى جولىندا ءمۇلت كەتكەن جوق.

بۇل قوعامدا ءبىلىمدى، جان-جاقتى ويلايتىن ازاماتتار جوق دەۋگە بولماس. بىراق سول ءبىلىمدى بيىككە الىپ شىعاتىن، ەلگە قىزمەت ەتكىزەتىن مىنەز جەتىسپەي جاتادى.

ءار قازاقتىڭ كوزىنە وتتاي باسىلاتىن مىنا سۋرەتتەن نە كورۋگە بولادى؟ ۇلى ساباقتاستىقتى، ارينە.

باۋكەڭ باقىتتى ەدى. ويتكەنى، ونىڭ ارتىندا سول مىنەزدىڭ جالعاسى شەرحانداي ىنىلەرى قالدى. ول دا باي، باعلان، اسا جوعارى لاۋازىمدى باستىق بولسىن بەتىڭ بار، ءجۇزىڭ بار دەمەي، ايتارىن ايتتى، جازارىن جازدى. وسى مىنەز مەكتەبى ءوزى تاربيەلەگەن بىرنەشە بۋىن وكىلدەرىنە ۇلگى بولىپ قالدى. ول وي باتىرى دا، قول باتىرى دا (م.اۋەزوۆ) بولعان ۇلى باۋكەڭنىڭ بويىنداعى ۇلى رۋحتى ۇلتتىق باسپاسوزگە الىپ كەلىپ، ءوزى دە قازاق ءباسپاسوزىنىڭ باۋىرجانىنا اينالدى.

ايتپاعىم: بىزدە ءبىلىم مەكتەبى بار. ال ەلگە قىزمەت ەتۋگە ءتيىستى مىنەز مەكتەبى الا-قۇلا.

رۋحتارىڭىز شات بولسىن، ۇلى شىندىق شىراقشىلارى!

وسىلاي ءبىر دەدىم.

قالي سارسەنبايدىڭ جازباسى

Abai.kz