ءبىز ءوزى قانداي ەلدە تۇرىپ جاتىرمىز. تۇسىنىكسىز. ويتكەنى مەن الەمنىڭ وركەنيەتكە اياق باسقان ءبىراز ەلىندە بولدىم. ءتىپتى ءبىراز جىل ءومىر ءسۇردىم. سوندا بايقاعانىم كەز-كەلگەن ەلدە سول ۇلتتىڭ انا ءتىلى ءبىرىنشى ورىندا تۇرادى. ول ءتىلدى بىلمەسەڭ سەن ەشكىم ەمەسسىڭ. ەشقانداي قىزمەتتە، جۇمىستا جوق. ءتىل ءبىلۋ شارت.

ال، بىزدە شە؟ كەرىسىن شە؟ مەملەكەتتىڭ ايناسى بولۋعا ءتيىس ۇكىمەتتەگى مينيسترلەردىڭ، پارلامەنتتە وتىرعان دەپۋتاتتاردىڭ، اكىم-قارالاردىڭ، سونداي-اق وزگەدە قۇزىرلى ورىنداردا وتىرعان شەنەۋنىكتەردىڭ 70-80 پايىزى انا ءتىلىن ياكي كونستيتۋتتسيادا مەملەكەتتىك ءتىل دەپ كورسەتىلگەن قازاق ءتىلىن بىلمەيتىندەر. بۇل تراگەديا ما، تراگەديا! بۇدان وتكەن سوراقىلىق جوق شىعار.

بۇعان ءوزىن ءتىلىن بىلمەيىن قاراكوز قانداستارىمىزدى قوسىڭىز. تاۋەلسىزدىك العانىمىزعا 30 جىلعا اياق باسسادا «وزگە ەلدە ءومىر ءسۇرىپ جاتىرمىن، نان سۇراپ جەۋ ۇشىندە وسى ەلدىڭ ءتىلىن بىلەيىن» دەيتىن ەلىمىزدە تۇرىپ جاتقان 4 ميلليونعا تاقاۋ سلاۆيان جۇرتى جوق. تاۋەلسىز مەملەكەت بولا تۇرا مەملەكەتتىك ءتىلدى سىرتتان كەلگەندەر تۇرماق، ءوز ىشىمىزدە باياعىدان تۇرىپ جاتقاندارعا مويىنداتا الماساق نە بولعانىمىز؟ نامىستىڭ جوقتىعى، رۋحتىڭ السىرەگەنى بۇل.

نە ىستەۋ كەرەك؟ مۇنى ەل بولىپ ويلانۋعا ءتيىسپىز. ەڭ باستىسى بيلىك قازاق تىلىندە سويلەۋگە ءتيىس! سوندا كۇرمەۋلى ءجىپ شەشىلىپ كەتۋى مۇمكىن. ال، بيلىك وزگە تىلدە، رەسەي تىلىندە سويلەي بەرەتىن بولسا، وندا وسى كەتكەنىمىز كەتكەن، قۇرىعانىمىز قۇرىعان!

ازاماتحان ءامىرتاي

Abai.kz