قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرىسىمەن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى 2020 جىلعى 14 جەلتوقساندا ورفوگرافيالىق جۇمىس توبىنىڭ كەڭەيتىلگەن ونلاين وتىرىسىن ۇيىمداستىردى.

قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ توراعاسى ادىلبەك قابا «ورفوگرافيالىق جۇمىس توبىنىڭ 2020 جىلى اتقارعان  جۇمىستارىنىڭ قورىتىندىسى  جانە 2021 جىلعا ارنالعان جۇمىس باعىتتارى» جونىندە بايانداما جاسادى.

توراعا ايتىپ وتكەندەي، «مەملەكەت باسشىسىنىڭ 2019 جىلعى 21 قازاندا بەكىتىلگەن ءالىپبيدى جەتىلدىرۋگە قاتىستى بەرىلگەن تاپسىرماسى نەگىزىندە اعىمداعى جىلى اۋقىمدى جۇمىستار اتقارىلدى. اتاپ ايتقاندا، 24 قاڭتاردا قازاقستان رەسپۋبليكاسى پرەمەر-ءمينيسترى ورىنباسارىنىڭ بەكىتۋىمەن «قازاق ءتىلىنىڭ لاتىن گرافيكاسى نەگىزىندەگى ءالىپبيىن جەتىلدىرۋ بويىنشا 2020-2025 جىلدارعا ارنالعان ءىس-شارالار جوسپارى» ازىرلەندى. جوسپارعا سايكەس رەسپۋبليكا بويىنشا جاستاردىڭ، ستۋدەنتتەردىڭ، جازۋشىلاردىڭ، جۋرناليستەردىڭ جانە قوعام قايراتكەرلەرىنىڭ قاتىسۋىمەن اشىق تالقىلاۋلار، سىناما جۇمىستارى وتكىزىلدى. قازاق ءالىپبيىن لاتىن گرافيكاسىنا كوشىرۋدە قوعامدىق پىكىر ەسكەرىلىپ، ازاماتتاردان، عالىمداردان كەلىپ تۇسكەن 30-دان استام ءالىپبي جوبالارى قارالدى».

ءالىپبيدى جەتىلدىرۋگە بايلانىستى اعىمداعى جىلى ۇلتتىق كوميسسيا جانىنداعى ورفوگرافيالىق جۇمىس توبىنىڭ  8 وتىرىسى ءوتتى. بۇل عىلىمي ماجىلىستەردە قازاق ءالىپبيىن لاتىن گرافيكاسىنا كوشىرۋدىڭ، جاڭا ءالىپبيدىڭ ورفوگرافيالىق ەرەجەلەرىنىڭ ماسەلەلەرى جانە كلاۆياتۋرا مەن سيمۆولداردىڭ ءىت تەحنولوگيالارعا سايكەستىگى تالدانىپ، تالقىلاندى. سونداي-اق قازاق ءالىپبيىن لاتىن گرافيكاسىنا كوشىرۋ ماسەلەسى وتاندىق جانە حالىقارالىق دەڭگەيدە دە كەڭىنەن قارالدى. تۇركيا، وزبەكستان، قىرعىزستان، مولدوۆا جانە رەسەي سياقتى 5 ەلدىڭ عالىمدارى قاتىسقان حالىقارالىق سەمينار-كەڭەس وتكىزىلدى. بۇل عىلىمي باس قوسۋدا قازاق، ازەربايجان، قاراقالپاق، نوعاي، وزبەك، تاتار، تۇرىك، تىۆا جانە حاكاس تىلدەرىنىڭ ءالىپبي جاساۋداعى تاجىريبەلەرى تالقىلاندى.

سونىمەن قاتار 1991 جىلى حالىقارالىق عىلىمي سيمپوزيۋمدا قابىلدانعان ورتاق تۇركى ءالىپبيىنىڭ جانە حالىقارالىق فونەتيكالىق ءالىپبيىنىڭ عىلىمي-پراكتيكالىق نەگىزدەرى سارالانعان لاتىن گرافيكاسىنداعى قازاق ءالىپبيىنىڭ جەتىلدىرىلگەن جوباسى دايىندالدى. بۇل جوبا ەلىمىز بويىنشا ماماندار تاراپىنان اشىق تالقىلاۋدان جانە اپروباتسيادان بىرنەشە رەت وتكىزىلدى.

ەندىگى كەزەكتە جەتىلدىرىلگەن ءالىپبي، ەملە ەرەجەلەرى جانە پەرنەتاقتا جوبالارىن قازاقستان رەسپۋبليكاسى ۇكىمەتى جانىنداعى قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيانىڭ كەزەكتى وتىرىسىنىڭ قاراۋىنا ەنگىزۋ مىندەتى تۇر.

اتالعان مىندەتتى ورىنداۋ وسى ونلاين باس قوسۋدىڭ باستى ماقساتى ەدى.

«قازاق ءتىلىنىڭ لاتىننەگىزدى الىپبيىنە ارنالعان پەرنەتاقتا جوبالارىن ساراپتاۋ جانە ازىرلەۋ بويىنشا قۇرىلعان جۇمىس توبىنىڭ قورىتىندى اقپاراتىن ۇسىنۋ» تۋرالى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ عالىم حاتشىسى، جۇمىس توبىنىڭ مۇشەسى نۇرلىحان ايتوۆا ايتىپ بەردى.

ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى، فيلولوگيا عىلىمدارىنىڭ كانديداتى انار فازىلجانوۆا «قازاق ءتىلىنىڭ جاڭا ەملە ەرەجەلەرى جوباسىن تالقىلاۋ» تۋرالى بايانداما جاسادى.

شاراعا جوبانىڭ جۇمىس توبى مۇشەلەرى مەن ەلىمىزگە تانىمال سالا ماماندارى، سونىمەن قاتار بۇقارالىق اقپارات وكىلدەرى قاتىستى.

Abai.kz