2021 جىلدىڭ باسىندا رەفورمالاردىڭ جاڭا توپتاماسى جاريا ەتىلەتىن بولادى. بۇل تۋرالى تاۋەلسىزدىك كۇنى قارساڭىندا وتكەن مەملەكەتتىك ناگرادالار تاپسىرۋ راسىمىندە قر پرەزيدەنتى قاسىم-جومارت توقاەۆ ايتتى.

«ءبىز ەلدى ساياسي جاڭعىرتۋ پروتسەسىن تاباندى تۇردە جالعاستىرۋعا نيەتتىمىز. قازىرگى ۋاقىتتا رەفورمالاردىڭ جاڭا توپتاماسى ازىرلەنىپ جاتىر، ول جايىندا كەلەسى جىلدىڭ باسىندا جاريا ەتەمىز»، - دەدى قر پرەزيدەنتى.

مەملەكەت باسشىسى بۇل «حالىق ۇنىنە قۇلاق اساتىن مەملەكەت» قۇرۋعا، ادىلەت جانە تەڭ مۇمكىندىكتەر قاعيداتتارىن بەكىتۋگە باعىتتالعان قازاقستانداعى دەموكراتيالىق تۇرلەنۋگە تىڭ سەرپىن بەرەتىندىگىن باسا ايتتى.

«ءماجىلىس جانە بارلىق دەڭگەيدەگى ماسليحاتتارعا سايلاۋ وتكىزۋ ەلىمىز ءۇشىن كەلەسى جىلدىڭ ماڭىزدى وقيعاسى بولماق. الداعى سايلاۋ جوعارى ازاماتتىق بەلسەندىلىك تانىتىپ، قوعامنىڭ ساياسي ساۋاتتى ەكەنىن كورسەتەتىنىنە سەنىمدىمىن. سايلاۋ ناۋقانى قازاق مەملەكەتتىگىنىڭ ينستيتۋتسيونالدىق تۇراقتىلىعىن تاعى ءبىر رەت ناقتى دالەلدەيدى»، - دەدى قاسىم-جومارت توقاەۆ.

Abai.kz