سەيسەنبى كۇنى اۆتوپارك الدىنا جينالعان ونداعان ادام قاراشا ايىنىڭ جالاقىسىن ءالى الماعانىن ايتتى. كەيبىرى قازان ايىنىڭ جالاقىسى دا قولىنا تيمەگەنىنە شاعىمداندى.

— كۇزدە اكىمنىڭ ءوزى جالاقى ماسەلەسى شەشىلەدى، ۋاقىتىندا بەرىلەدى دەپ ۋادە بەرگەن. ءبىر اي ىستەدىك، ماسەلە قايتا باستالدى، — دەيدى اۆتوپارك جۇمىسشىلارى.

Semey Bus كومپانياسى قىزمەتكەرلەرىنىڭ سوزىنە قاراعاندا، جۇمىس بەرۋشى جۇمىسشىلاردىڭ زەينەتاقى مەن مىندەتتى مەديتسينالىق ساقتاندىرۋ جارناسىن دا قۇيماعان.

— مەن قان قىسىمى بويىنشا ەسەپتە تۇرمىن، سوڭعى ءۇش ايدا سيستەما الۋعا ءتيىسپىن. وسىعان دەيىن ەكى رەت ەمدەلدىم، ءبارى ويداعىداي بولاتىن. ەندى وسى جولى بارسام، مەديتسينالىق ساقتاندىرۋ جارناسى تولەنبەگەن دەپ ايتتى. كاسىپورىنعا كەلسەم، قاراشا مەن جەلتوقسان ايىنىڭ جارناسىن تولەۋ تۋرالى ءوتىنىش جازىڭىز، ەكى كۇندە شەشىم بەرەمىز دەدى. ەكى كۇن كۇتتىم، جارنا ءالى تولەنبەيدى، — دەيدى جۇرگىزۋشى قاجىۇلى سالىقباەۆ.

اۆتوپارك جۇمىسشىلارىنىڭ سوزىنە قاراعاندا، زەينەتكە شىعۋىنا ءبىر جىل قالعان ارىپتەستەرىنىڭ ءبىرى قارىزى ءۇشىن وزىنە قول جۇمساعان.

— كۇزدە وزىنە قول جۇمسادى. [اۆتوبۋستا] اجىراتىپ-قوسقىش بار. تاڭەرتەڭ اۆتوبۋس تولى بولعان كەزدە بىرەۋدىڭ اياعى ءتيىپ كەتسە، ىستەمەي قالادى. سونىڭ سالدارىنان ەسىك دۇرىس جابىلماي، ادامداردىڭ اۆتوبۋستان قۇلاپ كەتۋى وڭاي. سونداي ءبىر جاعدايدان كەيىن كولىك اپاتى بولىپ، سول جۇرگىزۋشىنىڭ ۇستىنەن 2 ميلليون تەڭگەلىك شاعىم تۇسكەن. ونىڭ زەينەتكە شىعۋىنا 10 اي قالعان ەدى. شىداماي وزىنە قول جۇمسادى، — دەيدى قاجىۇلى سالىقباەۆ.

جەرگىلىكتى ۋاقىت بويىنشا تاڭەرتەڭگى ساعات 6:30 شاماسىندا نارازى جۇمىسشىلاردىڭ الدىنا ديسپەتچەر شىقتى. ول كاسىپورىننىڭ قارجى جاعدايى اۋىر ەكەنىن ايتتى.

— ماماندار جۇمىستان كەتىپ جاتىر، قوسالقى بولشەك جەتىسپەيدى، جالاقى تولەيتىن اقشا جوق. بۇگىن ولار (كاسىپورىن باسشىلىعى - رەد.) ماسەلەنى شەشۋ ءۇشىن وسكەمەن قالاسىنا وبلىس اكىمىنە كەتتى. بۇگىن-ەرتەڭ زەينەتكەرلەر، مۇگەدەكتەرگە اقشا تولەۋ ءۇشىن 90 ملن تەڭگە كولەمىندە دوتاتسيا اۋدارىلۋى ءتيىس — دەدى ديسپەتچەر.

ول نارازىلارعا وسىعان دەيىن باسشىلىق قاتىسقان جينالىستا نە بولعانىن ايتىپ بەردى. كامەرانى ءوشىرىپ، ءوزىن جازباۋدى سۇرادى.

جۇمىسشىلاردىڭ ايتۋىنشا، قازىر كاسىپورىننىڭ ەسەپشوتى ساقتاندىرۋ كومپانياسىمەن سوت داۋىنا بايلانىستى بۇعاتتالعان. بۇعان قوسا، اۆتوپارك سەمەي قالاسىنىڭ مەملەكەتتىك كىرىس جونىندەگى باسقارما ۇستىنەن 8 شاعىم تۇسىرگەن. Semey Bus سوتتان 20 قازاندا جۇرگىزىلگەن كامەرالىق باقىلاۋ ناتيجەسىن جارامسىز دەپ تانۋدى سۇراپ وتىر.

Semey Bus جۇمىسشىلارى وسىعان دەيىن دە جالاقىعا بايلانىستى ەرەۋىلگە شىققان.

Abai.kz