قاسىم-جومارت توقاەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرىنەن قۇتتىقتاۋ جەدەلحاتتارى كەلىپ تۇسۋدە.

گەرمانيا فەدەراتيۆتىك رەسپۋبليكاسىنىڭ پرەزيدەنتى فرانك-ۆالتەر شتاينمايەر جەكە ءوزىنىڭ جانە بۇكىل ەلىنىڭ اتىنان قازاقستان حالقىن تاۋەلسىزدىك كۇنىمەن شىن جۇرەكتەن قۇتتىقتادى.

«تاۋەلسىزدىك العان ساتتەن باستاپ ەكى ەلدى دوستىق ءارى تىعىز قاتىناستار بىرىكتىرەدى. قازاقستانداعى ەتنيكالىق نەمىستەر ءوز مادەنيەتىنە دەگەن قۇرمەتكە يە بولا وتىرىپ، ەلدەرىمىز اراسىن بايلانىستىرۋشى التىن كوپىر بولىپ وتىر. ءسىزدىڭ بەرلينگە جاساعان بىلتىرعى ساپارىڭىز ءبىزدىڭ ىنتىماقتاستىعىمىزعا قوسىمشا سەرپىن بەردى. گەرمانيا بولاشاقتا قازاقستاننىڭ سەنىمدى سەرىكتەسى بولىپ قالا بەرەدى»، – دەلىنگەن گفر پرەزيدەنتىنىڭ جەدەلحاتىندا.

ريم پاپاسى فرانتسيسك قۇتتىقتاۋ حاتىندا قازاقستان پرەزيدەنتىن تاۋەلسىزدىك كۇنىمەن قۇتتىقتاپ، بارلىق ەلدىڭ بەيبىتشىلىك پەن ىنتىماقتاستىقتا بولۋىنا جانە قۇدايدىڭ ريزاشىلىعىنا بولەنە بەرۋىنە تىلەكتەستىك بىلدىرگەن جۇرەكجاردى سوزدەرىن جەتكىزگەن.

قازاقستاننىڭ تاۋەلسىزدىك العانىنا 29 جىل تولۋىنا وراي قاسىم-جومارت توقاەۆقا قىرعىز رەسپۋبليكاسى پرەزيدەنتىنىڭ مىندەتىن اتقارۋشى تالانت مامىتوۆ تا قۇتتىقتاۋ حاتىن جولدادى.

«قازاقستان رەسپۋبليكاسى تاۋەلسىزدىك جىلدارى مەملەكەتتى قالىپتاستىرۋ، ساياسي جانە الەۋمەتتىك-ەكونوميكالىق دامۋ ىسىندە ۇلكەن تابىسقا قول جەتكىزدى، حالىقارالىق ارەناداعى ەلىڭىزدىڭ بەدەلى بىرتىندەپ نىعايىپ كەلەدى. قىرعىز رەسپۋبليكاسى مەن قازاقستان رەسپۋبليكاسى اراسىنداعى تاتۋ كورشىلىككە، ستراتەگيالىق سەرىكتەستىككە جانە وداقتاستىق بايلانىستارعا نەگىزدەلگەن ەكىجاقتى قاتىناستار ەكى ەلدىڭ يگىلىگى ءۇشىن ودان ءارى دامىپ، تەرەڭدەي بەرەتىنىنە سەنىمدىمىن»، – دەلىنگەن جەدەلحاتتا.

اۆستريانىڭ فەدەرالدىق پرەزيدەنتى الەكساندر ۆان دەر بەللەن ءوزىنىڭ قۇتتىقتاۋىندا بارلىق قازاقستاندىقتارعا باق-بەرەكە تىلەگەن.

«ەلدەرىمىز اراسىندا قالىپتاسقان جاقسى دوستىق قارىم-قاتىناستار ەكونوميكا جانە ەنەرگەتيكا سالالارىنداعى ىنتىماقتاستىقتىڭ ودان ءارى دامىپ، كەڭەيۋىنە سەپتىگىن تيگىزەدى دەپ سەنەمىن»، – دەپ جازعان اۆستريا پرەزيدەنتى.

سونىمەن قاتار قاسىم-جومارت توقاەۆتىڭ اتىنا قۇتتىقتاۋ جەدەلحاتتارىن نيدەرلاند كورولى ۆيللەم-الەكساندر، كانادانىڭ گەنەرال-گۋبەرناتورى جيۋلي پايەتت، مالايزيانىڭ پرەمەر-ءمينيسترى تان سري مۋحيددين ياسين، تايلاند كورولدىگىنىڭ پرەمەر-ءمينيسترى پرايۋت چان-وچا، اۆستراليا گەنەرال-گۋبەرناتورى دەۆيد حەرلي، نيكاراگۋا پرەزيدەنتى دانيەل ورتەگا سااۆەدرا جانە نيكاراگۋانىڭ پرەمەر-ءمينيسترى روساريو مۋريلو جولدادى.

Abai.kz