ارميان تارابىنا - 44 تۇتقىن، ازەربايجان جاعىنا 12 ادام تاپسىرىلعان. رەسەي قورعانىس مينيسترلىگى تۇتقىن الماسۋ پروتسەسىنە رەسەيلىك بىتىمگەر ساربازداردىڭ قاتىسقانىن حابارلادى. وسىعان دەيىن ارميان جانە ازەربايجان تارابى شۋشا قالاسىنداعى شايقاستان كەيىن ءبىر-بىرىنە مايىتتەر تاپسىرعان.

جەلتوقسان ايىنىڭ باسىندا تاۋلى قاراباقتا اتىستى توقتاتۋ تۋرالى ورتاق مالىمدەمەگە قول قويىلعاننان بەرى العاش رەت كەلىسىم شارتتارى بۇزىلدى. ارميان جانە ازەربايجان تارابى ءبىر-ءبىرىن كىنالادى. ازەربايجان بيلىگى حادرۋتتا قالعان ارميان اسكەرى "ىرىتكى سالىپ", "تەراكت ۇيىمداستىرۋمەن" اينالىستى، سونىڭ ناتيجەسىندە ءتورت ازەربايجان ساربازى قازا بولدى دەپ مالىمدەدى. ال ارمەنيا ازەربايجاندى "بەيبىت كەلىسىمدى بۇزدى" جانە "ارانداتتى" دەپ ايىپتادى.

تاۋلى قاراباقتا 1990 جىلدارى باستالعان شيەلەنىس بيىل قىركۇيەكتىڭ سوڭىندا قايتا ءورشىدى. باكۋ مەن ەرەۆان جاعدايدى ۋشىقتىردى دەپ ءبىرىن-ءبىرى ايىپتادى. ازەربايجان اسكەرىنىڭ قاراباقتاعى بىرنەشە اۋدانعا كىرگەن سوڭ، 9 قاراشادا رەسەي، ازەربايجان پرەزيدەنتتەرى جانە ارمەنيا پرەمەر-ءمينيسترى سوعىس قيمىلدارىن توقتاتۋ تۋرالى ورتاق مالىمدەمە جاسادى.

كەلىسىم بويىنشا ازەربايجان مەن ارمەنيا كۇشتەرى سول ساتتەگى پوزيتسيالارىندا قالىپ، ايماققا رەسەيدىڭ بىتىمگەر كۇشتەرى كىرگىزىلدى. تاۋلى قاراباقتى قورشاي ورنالاسقان 7 اۋدان ازەربايجانعا قايتارىلىپ، ارمەنياعا قاراباقپەن جالعاستىراتىن ەنى 5 كم كولىك ءدالىزى بەرىلدى. كەلىسىم بويىنشا ارمەنيا دا ازەربايجاندى ناحيچەۆان اۆتونوميالى رەسپۋبليكاسىمەن جالعايتىن ەنى 5 كم كولىك ءدالىزىن بەرۋى ءتيىس. ەكى ءدالىزدى دە رەسەي بىتىمگەر كۇشتەرى باقىلايدى.

Abai.kz