دانا حالقىمىز: «سابىرلى شىدار، سابىرسىز جانار» دەيدى. ەلىمىزدىڭ ەل بولعالى وزگە مەيرامدارىن ايتپاعاندا ماڭدايىنا جازعان ۇلى تاۋەلسىزدىك مەرەكەسىنىڭ تويلانىپ ءوتۋىن، ءارى ناق سول تۇستا كوڭىلىمىزدى ءارى-ءسارى قىلعان جاڭاوزەن وقيعاسىنىڭ سايابىرسۋىن، اقىرى سايلاۋدىڭ ءوتۋىن كۇتىپ، تومەندەگى ايتارىمىزدى ىركىپ كەلدىك.

ەسكى جىلدىڭ قاراشا ايىنىڭ 16 كۇنى وسى «ەگەمەن قازاقستان» گازەتىندە «بۇل ورالدا بولعان ەدى» دەگەن ماقالا جارىق كوردى. 1991 جىلى ورال مۇسىلماندار مەشىتىندە يمام بولعان زەينوللا احمەدوۆتەن ءتىلشى بازارگۇل اقىنقىزى سۇقبات الىپتى. جەر-جەردە تاۋەلسىزدىكتىڭ جيىرما جىلدىعى دەپ جاتقان سوڭ ءتىلشى قىزىمىز تاريحتان توسىن ءبىر اڭگىمە قوزعاعىسى كەلسە كەرەك، الايدا بۇگىندە شىمكەنت قالاسىنداعى اكبار قاجى شاكىرباي مەشىتىنىڭ يمامى بولىپ وتىرعان زەينەكەڭ شەت جاعاسىنا ءوزى شالا-شارپى كۋا بولعان 1991 جىلدىڭ قىركۇيەك ايىندا ورالدى ءدۇر سىلكىگەن قازاق پەن ورىس-كازاك تەكەتىرەسى تۋرالى وتىرىكتى بوسىڭكىرەپ جىبەرىپتى. تىلشىگە بەرگەن جاۋابىن وقىپ وتىرىپ جاعامىزدى ۇستادىق. زەينوللا احمەدوۆ: «...العاشقى كۇنى كازاكتار 250-300-دەيگە جەتتى. باستارىندا پاپاحا، ۇستەرىندە جاسىل مۋندير، كەۋدەلەرىندە ءتۇرلى وردەن-مەدال تاعىنعان، بەلدەرىندە قىلىش اسىنعان. ءبارى ساپ بولىپ ءتىزىلىپ ءجۇر. گارموشكامەن ايەلدەرى ءان سالۋدا. كەشكىسىن تارادى. بىزدە جينالىس وتۋدە» دەپتى.

دانا حالقىمىز: «سابىرلى شىدار، سابىرسىز جانار» دەيدى. ەلىمىزدىڭ ەل بولعالى وزگە مەيرامدارىن ايتپاعاندا ماڭدايىنا جازعان ۇلى تاۋەلسىزدىك مەرەكەسىنىڭ تويلانىپ ءوتۋىن، ءارى ناق سول تۇستا كوڭىلىمىزدى ءارى-ءسارى قىلعان جاڭاوزەن وقيعاسىنىڭ سايابىرسۋىن، اقىرى سايلاۋدىڭ ءوتۋىن كۇتىپ، تومەندەگى ايتارىمىزدى ىركىپ كەلدىك.

ەسكى جىلدىڭ قاراشا ايىنىڭ 16 كۇنى وسى «ەگەمەن قازاقستان» گازەتىندە «بۇل ورالدا بولعان ەدى» دەگەن ماقالا جارىق كوردى. 1991 جىلى ورال مۇسىلماندار مەشىتىندە يمام بولعان زەينوللا احمەدوۆتەن ءتىلشى بازارگۇل اقىنقىزى سۇقبات الىپتى. جەر-جەردە تاۋەلسىزدىكتىڭ جيىرما جىلدىعى دەپ جاتقان سوڭ ءتىلشى قىزىمىز تاريحتان توسىن ءبىر اڭگىمە قوزعاعىسى كەلسە كەرەك، الايدا بۇگىندە شىمكەنت قالاسىنداعى اكبار قاجى شاكىرباي مەشىتىنىڭ يمامى بولىپ وتىرعان زەينەكەڭ شەت جاعاسىنا ءوزى شالا-شارپى كۋا بولعان 1991 جىلدىڭ قىركۇيەك ايىندا ورالدى ءدۇر سىلكىگەن قازاق پەن ورىس-كازاك تەكەتىرەسى تۋرالى وتىرىكتى بوسىڭكىرەپ جىبەرىپتى. تىلشىگە بەرگەن جاۋابىن وقىپ وتىرىپ جاعامىزدى ۇستادىق. زەينوللا احمەدوۆ: «...العاشقى كۇنى كازاكتار 250-300-دەيگە جەتتى. باستارىندا پاپاحا، ۇستەرىندە جاسىل مۋندير، كەۋدەلەرىندە ءتۇرلى وردەن-مەدال تاعىنعان، بەلدەرىندە قىلىش اسىنعان. ءبارى ساپ بولىپ ءتىزىلىپ ءجۇر. گارموشكامەن ايەلدەرى ءان سالۋدا. كەشكىسىن تارادى. بىزدە جينالىس وتۋدە» دەپتى.

قۇرمەتتى زەينەكە، العاشقى كۇن دەگەنىڭىز قىركۇيەكتىڭ 13-ءى. ءسىز ايتقانداي سول كۇنى اسكەري كيىمدە، قىلىش سۇيرەتىپ، ايەلدەرى ءان سالىپ، ەمىن-ەركىن كوشە شارلاپ جۇرگەن بىردە-ءبىر كازاكتى كورمەدىك. سىزدىڭشە، ولاردىڭ ايەلدەرىنە ءان سالعىزىپ، ال ەركەكتەرىن قىلىش اسىنتىپ، كوشە كەزگىزىپ قويىپ، ءبىز، قازاقتار جايباراقات جينالىس وتكىزەدى ەكەنبىز عوي. مۇندايعا كىم سەنەدى؟ مولدەكە، ءوزىڭىز 1981 جىلى اسكەرگە الىنىپ، اۋعان سوعىسىنا قاتىسىپسىز، پاكىستان جاعىندا تۇتقىندا بولىپسىز، قۇران بىلگەندىكتەن قۇداي ساقتاپ ەلگە امان-ساۋ ورالىپ، 1986 جىلى بۇقاراداعى «مير-اراب» ءدىني مەدرەسەسىن ءتامامداپسىز، سودان كەيىن ورالعا يمام بولىپ تاعايىندالدىڭىز. بۇل دەرەكتى ءوز سۇقباتىڭىزدان الدىق. تاعدىردىڭ تالقىسى مەن سىيىن كورگەن ادام كورىنەسىز، بىراق جەر بەتىندە جيىرما جىلعى بولعان وقيعانىڭ وزىڭىزدەن باسقا بىردە-ءبىر كۋاگەرى قالماعانداي «بۇل ورالدا بولعان ەدى...» دەپ جەل سوزگە ەرىك بەرەسىز. ءسىز سول وقيعا بولعان جەرگە قالاي بارعانىڭىزدى ۇمىتىپسىز، قاجەت بولسا ونى دا ەسىڭىزگە سالاتىن ادامدار ورالدا بار.

سۇحباتتىڭ تاعى ءبىر تۇسىندا: « ...ورال كوشەلەرىندە 5-6 قاتاردان ساپ تۇزەپ، قىلىشتارىن اياقتارىنا تيگىزە سارت-سۇرت جۇرەدى. ايەلدەرىنىڭ گارمونمەن قازاق حالقىن قورلاپ ايتقان ولەڭدەرىن ەستىگەندە، قانىڭ باسىڭا شىعادى» دەپ ىلكى وتىرىگىڭىزدىڭ بوياۋىن ءتىپتى قويۋلاتا ءتۇسىپسىز. سولاي دەپ كەلىپ، ناق قىركۇيەكتىڭ 15 كۇنگى، شەشۋشى ءساتتى سۋرەتتەگەندە ورتاعا نەمەرەسىن كوتەرىپ شىعىپ، جاۋلىعىن جەرگە جايعان حاديشا كارىباەۆا اپامىزدىڭ الدىنا ءتۇسىپ، ودان بۇرىن باسىڭىزداعى شالماڭىزدى تەمىرجولدىڭ ۇستىنە تاستاي سالاسىز. مىنە، ءوز ءسوزىڭىز: «باسىمداعى سالدەمدى الىپ، تەمىرجولدىڭ ۇستىنە تاستادىم. بالالى ايەل دە ورامالىن قويدى. مىنە، جاستار تاعى دا وسى جەردە اعارعاندى سىيلايتىنىن، اتا-ءداستۇردى بويلارىنا سىڭىرگەنىن كورسەتتى. تەمىرجولدىڭ ارعى بەتىنە لاپ قويماي، ەرنەۋىنەن اسايىن دەپ تۇرعان سۋداي تۇرىپ قالدى.» ءسىزدىڭ داڭعاراداي سالدەڭىزدىڭ باسىڭىزدان شەشىلمەگەنىنە ەل كۋا، كەرەك دەسەڭىز سول كەزدىڭ بەينەتاسپاسى قولىمىزدا. ال قىسىلتاياڭ شاقتا 4-5 جاسار سابيىمەن ورتاعا شىعاپ، الگىندەي ارەكەتكە بارعان انامىزدىڭ ەرلىگىن قىزعانىپ، ودان بۇرىن مەن باس كيىمىمدى تاستاپ ەدىم، ايەل مەنىڭ ارەكەتىمدى قايتالادى دەۋىڭىز ماسقارا، ۇيات. قارايعان حالىق كۋا بولعان وقيعانى ءوز ابىروي-بەدەلىڭىزىگە بۇرعىڭىز كەلەتىن سياقتى ما، قالاي؟ ويدان شىعارعانىڭىزدى ارمەن قاراي تالدايىق: «بىراق، ولاردىڭ ايتقان اندەرىن ەستىگەن جاستار قانى قايناپ، اقىرى تۇرا المادى، لاپ قويدى. ەكى جاقتا سارت-سۇرت ۇرىس باستالىپ كەتتى. ولاردا قىلىش، ءبىزدىڭ جىگىتتەردە قولدارىنا نە تۇسسە سونىمەن ۇرۋدا. ماشينالار ورتەلۋدە. جاراقاتتانعاندار ەكى جاقتان دا كوپ بولدى. مەنىڭ سول جاق يىعىما تاس ءتيىپ، شاپانىمدى جىرتىپ جىبەردى...» دەپ، سيۋجەتى ەكشن كينوفيلمگە ۇقسايتىن  حيكاياڭىزدى سوزا بەرىپسىز. قايداعى قىلىش، قارۋ بولعان بولسا، ەڭ الدا تۇرعان جالاڭ قول بىزدەر باۋداي تۇسكەن بولار ەدىك قوي. زەينەكە، ءسىزدىڭ شاپانىڭىزدى جىرتىپ، يىعىڭىزدى جارالاپ جۇرگەن نە تاس؟ ورتەنگەن قايداعى ماشينالار؟ «قورقىت دەگەندە، وسىلاي قورقىت دەدىم بە؟» دەگەندى ايتقىزدىڭىز-اۋ.

«زەنيت» سارايىنىڭ ىشىندە كازاكتار، سىرتىندا ءبىز، الاڭداعى ەلدەن بۇرىن بارعان 113 ەركىتى تۇردىق. الاڭنان جەتكەن ءنوپىر حالىقتىڭ الدىنان شىعىپ، ەڭ الدىمەن توقتاتقان سول 113 ادام بولاتىنبىز. ال بەر جاقتا، ءبىزدىڭ الدىمىزدا مۇزداي قارۋلانعان ميليتسيا، ومون جاساقتارى ءتىزىلدى. جۇرتتىڭ جۇدىرىعى ءتۇيىلىپ، قاتتى-قاتتى داۋىستاعانمەن جەڭىنە تىعىپ بىرەۋى دە تاسكەسەك الىپ شىقپادى. سوندا ءسىزدىڭ كورىپ جۇرگەنىڭىز نە كورىنىس، مولدەكە؟ ءسىز شاماسى، تىلشىگە كورگەن ءتۇسىڭىزدى ايتىپ بەرگەنسىز-اۋ.
ەكى جاقتىڭ اراسىندا ساياسي تەكەتىرەستىڭ بولعانى راس، ورىس-كازاكتارى اق پاتشاعا قىزمەتىنىڭ 400 جىلدىعىن تويلاماقشى بولدى، وعان دەر كەزىندە شارا الۋدىڭ ورىنا ءارتۇرلى قيتۇرقى قاۋلىلارىمەن ورال قالاسىنىڭ باسشىسى مەن  وبلىستىق پارتيا كوميتەتىنىڭ ءبىرىنشى حاتشىسى ن. ەسقاليەۆ اشىقتان-اشىق جول بەرىپ قويدى. اقىرى قىركۇيەكتىڭ 13-15 كۇندەرى ارالىعىندا ورالدا ءورت تۇتانىپ كەتە جازدادى. بىراق كازاكتاردىڭ تويىن بولعىزبايمىز دەگەن حالىقتىڭ قانعا بىتكەن ىشكى ءتارتىبى مەن ونى باسقارعان، سول كەزگى بىردەن-ءبىر دەموكراتيالىق ۇيىم «ازات» قوزعالىسى ازاماتتارىنىڭ بەلسەندى ارەكەتىنىڭ ارقاسىندا جانە قارسى جاقتىڭ دا ۇلكەندەرىنىڭ ءوز ادامدارىن سابىرعا شاقىرعانى سەبەپ بولىپ، ءبىر سويقاننىڭ بەتى قايتتى. ەكى ورتاعا وت سالماقشى بولعان استىرتىن ارانداتۋشىلاردىڭ ءىس-ارەكەتىنەن تۇك شىقپادى. ەشكىمنىڭ تۇمسىعى قاناپ، كوزى شىقپادى. بۇعان وقيعادان كەيىن ورالدا جۇمىس جۇرگىزگەن پرەزيدەنتتىك كوميسسيانىڭ ابدەن كوزى جەتىپ، دالەلدەپ، قۇجاتقا ءتۇسىردى. ءبىز بۇل ورال وقيعاسىنىڭ ەش قانتوگىسسىز وتكەندىگىن فەنومەن دەپ كورسەتىپ، قازاق پەن كازاك سول ءبىر ءولىارا شاقتا ءبىر-ءبىرىن وكپەگە قيسا دا ولىمگە قيماعانىن كوبىرەك ايتا تۇسكەن كەزىمىزدە ءسىز، مولدەكە، ورالدان جىراقتا جىپ-جىلى جەردە وتىرىپ الىپ، بولماعاندى بولدى دەپ سوعاسىز. بۇنىڭىز قالاي؟ ونسىز دا ەلىمىزدىڭ باتىس بەتى وقتىن-وقتىن وعاش مىنەز بايقاتۋدا. ءسىزدىڭ سۋرەتتەۋىڭىز كەشەگى جاڭاوزەندەگى كورىنىسكە كەلىڭكىرەيدى. قازىر ۇلت پەن ۇلىس اراسىنا دۇردارازدىق تۋعىزاتىن اڭگىمە قاجەت ەمەس، قايتا ءبىرىن بىرىنە جاقىنداتاتىن، تاۋەلسىز ەلىمىزدى نىعايتا تۇسۋگە قىزمەت قىلاتىن بايىپتى پىكىر كەرەك. ءسىزدىڭ دۋالى اۋزىڭىزدان سونداي ءسوزدىڭ شىققانى ابزالىراق. مىنە، جيىرما جىل ءوتتى، ورالداعى قازاق پەن كازاك قويان-قولتىق ارالاسىپ، ءدام-تۇزى جاراسىپ، ەلباسىنىڭ ساياساتىن قولداپ، تىنىش ەڭبەك ەتۋدە. بۇدان ارتىق نە كەرەك؟ ءتۇبى راببىمىزدىڭ الدىنا باراسىز، سوندا نە دەپ جاۋاپ بەرەسىز؟ قازاق: «مولدانىڭ ايتقانىن ىستە، ىستەگەنىن ىستەمە» دەپ دۇمشەلەرگە نالىپ، ماقالداعان. ال ءسىزدىڭ بۇلاي جاۋاپكەرشىلىكسىز سويلەۋىڭىزدەن سوڭ ايتقانىڭىزدىڭ وزىنەن شوشىپ قالدىق. مۇنى قانشا ادامعا جايدىڭىز ەكەن؟

كەزىندە «ەگەمەن قازاقستان» گازەتىنىڭ باتىس قازاقستان وبلىسىنداعى ءتىلشىسى مارقۇم بورانعالي ىرزاباي اعامىز، ودان كەيىن سول ابزال كىسىنىڭ ورنىن باسقان قازىرگى ءتىلشىسى تەمىر قۇسايىن ورال وقيعاسى جايلى جازدى، «كەشە قازاق پەن كازاك بولىپ تارتىسقانداردى تاۋەلسىزدىك تابىستىردى» دەپ تاقىرىپقا دا ورالىپ  ءوتتى. سونداعى ايتىلعاندار بىلاي قالىپ، «قازاقستان تاۋەلسىزدىگىنە 20 جىل» اتتى مەرەكەلىك بەلگىمەن ايشىقتالىپ، ز.احمەدوۆتىڭ اڭگىمەسىنە قۇرىلعان ماقالانىڭ جاريالانعانى ءبىرتۇرلى وعاش بولدى. بۇل جۇرت كوڭىلىن كۇپتى ەتىپ، گازەت رەداكتسياسىنىڭ جاۋاپسىزدىعىنا  رەنىشىن تۋعىزبايدى ما؟ اتالعان ماقالا تۇسكەندە ونداعىلار نەگە ورالداعى مەنشىكتى تىلشىسىمەن حابارلاسىپ، ماسەلەنىڭ انىق-قانىعىنا بارماعان؟ يمام ايتتى ەكەن دەپ جالاۋلاتىپ باسا بەرۋگە بولادى ما؟ «ەگەمەن قازاقستاندى» ەلگە تاراتىپ وتىرعان «ەگەمەن قازاقستان» رەسپۋبليكالىق گازەتى» اق-نىڭ پرەزيدەنتى ساۋىتبەك ابدراحمانوۆ قول استىندا بولىپ جاتقان جايتتى قايتىپ ەلەمەگەن؟ قاپ، اتتەگەن-اي! وسىعان جانىم اشيدى.

قادىرلى يمام، ەسىڭىزگە سالايىن ءسىزدى الاڭداعى حالىق تولقىپ، «زەنيت» سارايىنا بەت قويعاندا «ازاتتىق» جىگىتتەر الدىردى. ءيا، ءسىز كولىكتىڭ ۇستىنە شىعىپ، قۇران وقىدىڭىز. بىراق جالعىز ءسىز ەمەس، اۋليەاتا مەشىتىنىڭ وكىلى 74 جاستاعى شوقاي الىمقۇلۇلى اتامىز دا قۇران وقىپ، ەرەۋىلدەگەن ەلگە ەداۋىر ىقپال ەتكەن ەدى. جۇرت اللا سوزىنە ۇيىدى، سابىر ساقتادى. ءسىز تەك وسى ارەكەتىڭىزدى عانا تىلشىگە ايتىپ بەرۋىڭىز كەرەك ەدى. جوق، ءسوز اراسىنا كۋا رەتىندە ايسۇلۋ قادىرباەۆا، جاسارال قۋانىشالى، قابيبوللا جاقىپوۆتى قوسىپ قويىپ، ءوزىڭىز كورمەگەن، الدەكىمنەن ەستىگەن، نە ويدان شىعارعانىڭىزدى شاتاسىز. ءسىزدى وسىعان دەيىن وقيعاعا قاتىسقان جىگىتتەر كىتاپتارى مەن ماقالالارىندا قۇرمەتپەن اتايتىن، ەندى بىلمەيمىن. ەلدىڭ باستى باسىلىمى ارقىلى جالعان ءسوزدى جۇرتقا جايدىڭىز. ءسىز بۇل ىسىڭىزبەن بۇگىننىڭ عانا ەمەس، بولاشاقتىڭ ادامىن الداپ وتىرسىز. ءباسپاسوز - تاريحتىڭ ءبىر پاراعى، ول مۇراعات. ەرتەڭ كۇندەردىڭ ءبىر كۇنىندە «ەگەمەن قازاقستاندى» اقتارىپ وتىرعان الدەبىر كەلەشەك تاريحشى ءسىزدىڭ ماقالاڭىزعا تاپ بولىپ، سول كەزدە وبلىستىق ءماسليحاتتىڭ دەپۋتاتى بولعانىڭىزعا، ەڭ باستىسى يمام ەكەنىڭىزگە كوڭىلى بۇلجىماستاي بىردەن قۇلاپ، سوزىڭىزگە يمانداي يلانىپ قالسا جانە تاريحتى سولاي دەپ جازسا، ونىڭ كىناسى مەن كۇناسى كىمنىڭ موينىندا بولعانى؟ وسى اراسىن ويلادىڭىز با؟ سوندىقتان گازەت ارقىلى ەلدەن كەشىرىم سۇراپ، «جازدىم-جاڭىلدىم» دەڭىز، ايتپەسە،   الدا تاعى بىرەۋلەر تاريحتى اۋدارىپ-توڭكەرىپ، «قاھارمانعا» اينالۋدى ادەت قىلىپ الار.

اللا-تاعالانىڭ ءبىر ەسىمى حالىق بولسا، قالىڭ جۇرتشىلىقتىڭ كوزىن باقىرايتىپ قويىپ، جالعان سويلەدىڭىز. مەن ءسىزدى قۇداي ءۇشىن ۇياتتىڭ، كەشىرىمنىڭ، ءتاۋبانىڭ اۋىلىنا شاقىرامىن، ءالى دە كەش ەمەس، مۇمكىندىگىڭىزدى جىبەرىپ الماڭىز، مولدەكە!..

وسىدان شىعاتىن جانە ءبىر ءتۇيىن - 1991 جىلى ورالدا بولعان وقيعاعا كەزىندە پرەزيدەنتتىك كوميسسيا بەرگەن ءادىل باعا جارتىكەش جولدا قالدى، ونى حالىق بىلمەيدى، سونى تاريحي قۇجاتقا، كىتاپقا اينالدىرۋ ماسەلەسى ءپىسىپ جەتتى. بۇعان ۇكىمەت بەي-جاي قاراماۋى ءتيىس. بەي-جايلىقتىڭ سالدارىنان ءوزىنىڭ جەتپىسكە تولعانىنا وراي جەرگىلىكتى گازەتتەرگە شىندىقتى بۇركەپ سۇقبات بەرگەن ناجىمەدەن ەسقاليەۆ، ەندى كەلىپ يمام زەينوللا احمەدوۆ سياقتىلار بۇقاراعا جيىرما جىل بۇرىنعى تاريحتى باسقاشا، ءوڭىن وزگەرتىپ، ءوز قارا باستارىنا پايداسى تيەتىندەي سيپاتتا جەتكىزۋدە. الدىڭعىسى ءوز ورتاسىندا قوعام جانە مەملەكەت قايراتكەرى رەتىندە كورىنىپ، «تاريحتا سۋدان اق، سۇتتەن تازا» ادام كەيپىندە قالعىسى كەلىپ تىرىسسا، كەيىنگىسى كىم بولىپ كورىنگىسى كەلىپ جۇرگەنىن وڭتۇستىكتەگى قايماعى بۇزىلماعان قازاقى جۇرتشىلىق بىلمەسە، ءبىز اۋىل اراسى قاشىق بولعان سوڭ بايىپتاي الماي وتىرمىز. كوزدەن كەتسە دە، كوڭىلىمىزدە جاقسى يمام ەدى دەگەن قىرىمەن تانىلعان باۋىرىمىزدىڭ جيىرما جىلدىڭ ىشىندە بۇلايشا قۇبىلارىن كىم بىلگەن؟ «مال الاسى سىرتىندا، ادام الاسى ىشىندە» دەگەن وسى-اۋ. پايعامبارىمىز ءوز حاديستەرىندە: «ءسوزدىڭ جامانى - وتىرىكشىلىك، جالعان ءازىل مەن شيكى پىكىر. شىنشىل ادامعا - جاقسى باعا، وتىرىكشىگە - جامان باعا بەرىلەدى» دەپ جانە وزىڭە زيانى بولسا دا شىن سويلەۋ ءدىن جولىنداعى كۇرەستىڭ ءبىر ءتۇرى ەكەندىگىن ەسكەرتكەن. وسى ماقالانى جازۋعا ماعان وسى قاسيەتتى ءسوز كۇش بەردى. ايتپەسە، ز.احمەدوۆتىڭ جەكە باسىندا شارۋام شامالى، ءباسپاسوز ارقىلى ەلگە تاراتقان سوزىنە الدىمەن بۇ دۇنيەدە جاۋاپ بەرىپ السىن دەدىم.  
ۇزىن ءسوزدىڭ قىسقا ءتۇيىنى سول، قوعام قايراتكەرلەرى، ساياساتتانۋشىلار مەن بىلىكتى تاريحشىلارىمىز بولىپ ەلدىڭ تاۋەلسىزدىككە دەيىنگى جيىرما جىلعى ءجۇرىپ وتكەن جولىن كىم كورىنگەننىڭ قولجاۋلىعىنا اينالدىرماۋدىڭ قامىنا كىرىسپەسەك، شىندىقسىز ساناعا سىڭگەن ءسوز «ءبىر قۇمالاق ءبىر قارىن مايدى شىرىتەدىنىڭ» كەرىن كەلتىرمەسىنە كىم كەپىل؟
جاڭا قازاقستانمەن بىرگە جاڭارىپ جاتقان جاس ۇرپاقتىڭ كوزىن اقيقاتپەن اشا الساق ۇتىلمايمىز، ال ەگەر كەرسىنشە بولسا، وندا سىرىم داتۇلى بابامىز ايتقانداي «وزىنىكىن سوققان وتىرىكشىدەن كۇندە جەڭىلەمىز»...
مۇنايدار بالمولدا
قازاقستان جۋرناليستەر وداعىنىڭ مۇشەسى،
1991 جىلعى ورال وقيعاسىنا قاتىسۋشى.
«اباي-اقپارات»