ۇلى قازاق كلاسسيگى، اقىن، فيلوسوف-گۋمانيست اباي قۇنانبايۇلىنىڭ 175 جىلدىعىن مەرەكەلەۋ اياسىندا قر مادەنيەت جانە سپورت مينيسترلىگىنىڭ قولداۋىمەن ۇلتتىق اكادەميالىق كىتاپحانا سانكت-پەتەربۋرگ قالاسىنىڭ رەسەي مەملەكەتتىك كىتاپحاناسىندا «اباي» اقپاراتتىق-مادەني ورتالىعى اشىلدى.

بۇل – اباي قۇنانبايۇلىنىڭ مۇراسىن ناسيحاتتاۋ ماقساتىنداعى شەت ەلدەردە «اباي» اقپاراتتىق-مادەني ورتالىقتارىن اشۋ جوباسىنىڭ جالعاسى.

- وسى ورتالىقتى اشۋ اياسىندا اباي شىعارمالارىنان كىتاپ كورمەلەرىن ۇيىمداستىردىق. ونىڭ ىشىندە ۇلى اقىننىڭ بىرنەشە تىلگە اۋدارىلعان شىعارمالارى دا بار. اتاپ ايتاتىن بولساق، جاقىندا عانا قر پرەزيدەنتى قاسىم-جومارت توقاەۆتىڭ باستاماسىمەن جارىق كورگەن «اباي» اتتى كىتاپتاردى قويدىق. بۇل كىتاپتاردا اقىننىڭ شىعارمالارى دۇنيەجۇزىنىڭ 10 تىلىنە اۋدارىلعان بولاتىن. ولار: اعىلشىن، اراب، قىتاي، يسپان، يتاليان، نەمىس، ورىس، تۇرىك، فرانتسۋز جانە جاپون تىلدەرى. اۋدارما جيناقتارعا اقىننىڭ 145 ولەڭى، 3 پوەماسى مەن 45 قارا ءسوزى كىردى. ودان بولەك ابايتانۋشىلار مەن اقىننىڭ شىعارمالارى بار كىتاپتاردى كورمەگە قويىپ وتىرمىز.ۇلى اباي رۋحى قولداي بەرسىن!، – دەدى ءۇمىتحان مۇڭالباەۆا. 

سونداي-اق، ورتالىققا ەل پرەزيدەنتى قاسىم-جومارت توقاەۆتىڭ «ساباقتاستىق. ادىلدىك. ورلەۋ» 1,2,3,4 تومدارى، «سۆەت ي تەن»، «پرەودولەنيە»، «ون دەلاەت يستوريۋ» اتتى كىتاپتارى بەرىلدى. ۇيىمداستىرۋشىلاردىڭ ايتۋىنا قاراعاندا، ءدال وسى كىتاپتار ورتالىققا كەلۋشىلەردىڭ نازارىن بىردەن اۋداردى. سەبەبى، ەل پرەزيدەنتىنىڭ مەملەكەت باسقارۋداعى ءبىر جىل اتقارعان جۇمىسىنىڭ قورىتىندىسى، قازاقستاننىڭ سىرتقى ساياسي باعىتىنىڭ قالىپتاسۋى مەن دامۋ تاريحىى، الەمدىك ساياساتتانۋ ادەبيەتىندەگى تاۋەلسىز مەملەكەتىمىزدىڭ ديپلوماتيالىق قارىم-قاتىناستارى جايلى جانە ەلباسى ن.نازارباەۆتىڭ ۇلتتىق كوشباسشى رەتىندەگى ەرەكشە تۇلعاسى جايلى باياندالادى. 

اقپاراتتىق-مادەني ورتالىقتا اباي شىعارمالارى مەن ول تۋرالى باسىلىمدار بەرىلگەن. مۇندا ورتالىققا ءاربىر كەلۋشى اقىننىڭ ءومىرى مەن شىعارماشىلىعى تۋرالى ماتەريالداردى، ونىڭ شىعارمالارىنىڭ الەمنىڭ ءتۇرلى تىلدەرىندەگى ەڭبەكتەرى مەن اۋدارمالارىن، بەلگىلى ابايتانۋشىلار، فيلولوگتار مەن جازۋشىلاردىڭ زەرتتەۋلەرىن، ەلەكتروندىق جانە نوتالىق باسىلىمداردى، اباي شىعارمالارىنىڭ جيناقتارىن تابا الادى.

«اباي» ورتالىعىنىڭ اشىلۋ سالتاناتىنا رەسەي ۇلتتىق كىتاپحاناسىنىڭ ديرەكتورى الەكساندر ۆەرشينين، سانكت-پەتەربۋرگ جانە لەنينگراد وبلىسىنىڭ «اتا-مەكەن «قازاق ۇلتتىق-مادەني قوعامى» ايماقارالىق قوعامدىق ۇيىمىنىڭ پرەزيدەنتى قۇسپانوۆ سارسەنعالي اققۋلۇلى، نۇر-سۇلتان قالاسىنداعى قازاقستان رەسپۋبليكاسى ۇلتتىق اكادەميالىق كىتاپحاناسىنىڭ باسشىسى، پروفەسسور، پەداگوگيكا عىلىمدارىنىڭ دوكتورى، پروفەسسور ءۇمىتحان داۋرەنبەكقىزى مۇڭالباەۆا،  سانكت-پەتەربۋرگتەگى قازاقستاندىق دياسپورانىڭ، قازاقستان مەن رەسەيدىڭ عىلىمي جانە شىعارماشىلىق زيالى قاۋىم وكىلدەرى قاتىستى. سونداي-اق، ءىس-شارا بارىسىندا اباي قۇنانبايۇلىنىڭ شىعارمالارىن قازاق جانە ورىس تىلدەرىندە قازاقستان دياسپوراسىنىڭ وكىلدەرى وقىپ، جاس اقىن، «دارىن» مەملەكەتتىك جاستار سىيلىعىنىڭ لاۋرەاتى بەكزات سماعۇلوۆتىڭ ورىنداۋىندا اباي اندەرى شىرقالدى. 

ايتا كەتەيىك، العاش جوبانى ىسكە اسىرۋ 2020 جىلدىڭ 27 قاڭتارىندا قازاقستان رەسپۋبليكاسىنىڭ چەحيا رەسپۋبليكاسىنداعى ەلشىلىگىمەن بىرلەسىپ، ەلشى مارات مۇحامەدقازىۇلى ءتاجيننىڭ قولداۋىمەن چەح رەسپۋبليكاسىنىڭ ۇلتتىق كىتاپحاناسىندا ورتالىق اشىلىپ، سلوۆاكيا، ۆەنگريا جانە گەرمانيا ەلدەرىندە اباي وقۋلارىن وتكىزۋ بويىنشا باستالدى.

Abai.kz