قازاقستاندا 10 قاڭتار كۇنى بولاتىن پارلامەنت سايلاۋىنا ءار پارتيا وزىنشە ۇگىت ناسيحات جۇرگىزىپ جاتىر. بىرەۋلەرى ەسىم-سويى ەلگە بەلگىلى ازاماتتاردى پارتيا قاتارىنا قوساپ جاتسا، ەندى بىرەۋلەرى ەل الدىندا جۇرگەن ونەرپازداردىڭ كومەگىنە جۇگىنگەن. بيلىكتەگى «Nur Otan» پارتياسى دا قازاقستان ەستراداسىنىڭ وكىلدەرى مەن سپورتشىلاردى وسى ۇگىت-ناسيحات جۇمىستارىنا قوسقان ەكەن. 

ولاردىڭ قاتارىندا قر حالىق ارتىستەرى روزا رىمباەۆا، ماقپال ءجۇنىسوۆا، قر ەڭبەك سىڭىرگەن قايراتكەرى مادينا سادۋاقاسوۆا، «قازاقستان بارىسى» ءتۋرنيرىنىڭ ءۇش مارتە جەڭىمپازى بەيبىت ىستىباەۆ، اقىن، «قۇرمەت» وردەنىنىڭ يەگەرى اقۇشتاپ باقتىگەرەەۆا سىندى بەلگىلى ادامدار بار.

الايدا، پارتيا وكىلدەرى «Nur Otan-دى» قولداعان ارتىستەردىڭ قاتارىنا ديماش قۇدايبەرگەندى دە قوسىپ جىبەرگەن سەكىلدى. سەبەبى، الەۋمەتتىك جەلىدە «10-ءشى قاڭتاردا «Nur Otan-عا» داۋىس بەر! قازاقستاننىڭ بولاشاعى كوشباسشىمىز نۇرسۇلتان ابىشۇلىمەن بىرگە!!!»، دەپ جازىلعان ديماشتىڭ سۋرەتى تارالعان.

بۇعان قاتىستى ءانشىنىڭ اكەسى الەۋمەتتىك جەلىدە ەسكەرتۋ جاريالادى. ونىڭ ايتۋىنشا، ديماش ومىرلىك ۇستانىمى بويىنشا ەشقانداي ساياسي ناۋقانعا قاتىسپايدى.

ايتا كەتەيىك، ديماش قۇدايبەرگەن 17 قاڭتار كۇنى اقش-تىڭ جاڭادان سايلانعان پرەزيدەنتى دجوزەف بايدەننىڭ يناۋگۋراتسياسىن تويلاۋ اپتالىعىنىڭ اشىلۋ سالتاناتىنا قاتىسادى. ال، ودان ءبىر كۇن بۇرىن، 16 قاڭتاردا قازاقستاندىق ءانشىنىڭ «DIMASH DIGITAL SHOW» اتتى العاشقى ونلاين-كونتسەرتى وتەدى دەپ جوسپارلانعان.

Abai.kz