ءوزبەكستاندا كوروناۆيرۋستىڭ بريتانيالىق شتامىن جۇقتىرعان ناۋقاس تىركەلدى. بۇل تۋرالى ەلدىڭ دەنساۋلىق ساقتاۋ مينيسترلىگى حابارلادى.

مينيسترلىكتىڭ مالىمەتىنشە، جاڭا شتامم 10 جاسار قىزدان انىقتالعان. ول 23 قاڭتار كۇنى تۋىستارىمەن بىرگە دۋبايدان ورالعان.

"اۋەجايدا جاسالعان ەكسپرەسس-تەست وڭ ناتيجە كورسەتىپ، ول [قىز] ينفەكتسيالىق اۋرۋحاناعا جىبەرىلدى. سول كۇنى فۋنكتسيونالدى-كلينيكالىق تەكسەرۋ جۇرگىزىلىپ، سيمپتومسىز ءوتىپ جاتقان Covid اۋرۋى دياگنوزى قويىلدى" دەلىنگەن مينيسترلىك حابارلاماسىندا.

حابارلامادا ناۋقاستىڭ تۋىستارىنان كوروناۆيرۋس انىقتالماعانى، ولاردىڭ ءۇي كارانتينىندە جاتقانى ايتىلعان.

مينيسترلىك ناۋقاستىڭ جاعدايى قاناعاتتانارلىق، ەشقانداي شاعىمى جوق دەدى.

وزبەكستان دەنساۋلىق ساقتاۋ مينيسترلىگى سانيتارلىق-گيگيەنالىق ەرەجەلەردى ورىنداۋعا، قوعامدىق ورىنداردا ماسكا تاعىپ، قاشىقتىق ۇستانۋعا شاقىردى.

"قاجەتتىلىك بولماسا، شەتەلگە شىقپاۋعا شاقىرامىز" دەلىنگەن حابارلامادا.

دجونس حوپكينس ۋنيۆەرسيتەتىنىڭ دەرەگىنشە، وزبەكستاندا بارلىعى 78,7 مىڭ Covid ناۋقاسى تىركەلگەن. ونىڭ ىشىندە 621 ناۋقاس قايتىس بولعان.

ورتالىق ازيانىڭ وزگە ەلدەرىندەگىدەي وزبەكستان رەسمي دەرەگىنە كۇمان كەلتىرەتىندەر دە بار.

Abai.kz