ورتالىق كوممۋنكياتسيالار قىزمەتىندە وتكەن بريفينگتە نۇر-سۇلتان قالاسى قوعامدىق دەنساۋلىقتى ساقتاۋ باسقارماسىنىڭ باسشىسى تيمۋر مۇراتوۆ COVID-19-عا قارسى ۆاكتسيناتسياعا دايىندىق تۋرالى باياندادى.

ونىڭ ايتۋىنشا، نۇر-سۇلتاندا 18-دەن 64 جاسقا دەيىنگى 735 مىڭ ادامعا ەكپە جاسالادى.

«تۇراقتى پروفيلاكتيكالىق ەگۋلەرگە جانە ۋاقىتشا مەديتسينالىق قارسى كورسەتىلىمدەرى بار ادامدارعا كوروناۆيرۋسقا قارسى ەكپە سالىنبايدى. سونداي-اق، كوروناۆيرۋستىڭ اۋىر جاعدايى جانە سيمپتومسىز بەلگىلەرى بار ادامدار ەكپە الۋعا جاتپايدى. جۇقپالى اۋرۋى بار ناۋقاسپەن، ونىڭ ىشىندە كۆي-مەن اۋىرعان ناۋقاسپەن بايلانىستا بولعان ادامدار كارانتين مەرزىمى اياقتالعاننان كەيىن عانا ۆاكتسيناتسيالانادى. ەكپە سالۋ الدىندا COVID-19 قارسى انتيدەنەلەردىڭ بار جوعىن انىقتاۋ ءۇشىن سكرينينگ جاسالمايتىنىن اتاپ وتكىم كەلەدى. كوروناۆيرۋستىق ينفەكتسيانىڭ كەز كەلگەن فورماسىمەن اۋىرعان پاتسيەنت ەمدەلىپ شىققاننان كەيىن دەنساۋلىق جاعدايىنا سايكەس كەمىندە 6 ايدان كەيىن ەكپە العان دۇرىس»، - دەدى باسقارما باسشىسى.

سونىمەن قاتار ول «سپۋتنيك V» ۆاكتسيناسى كەرى اسەر بەرگەن جاعدايدا،  ازاماتتارعا وتەماقى تولەنبەيتىنىن ايتتى.

«وتەماقى تولەۋ جونىندە ايتۋ قيىن. ەشقانداي وتەماقى قاراستىرىلماعان. ەگەر قانداي دا ءبىر قيىن جاعدايلار بولاتىن بولسا، وندا ول ستاتسيونارلىق نەمەسە امبۋلاتورلىق ەم قابىلداۋ نەگىزىندە مىندەتتى مەديتسينالىق كومەك بويىنشا جۇزەگە اسىرىلادى»،- دەدى مۇراتوۆ.

ايتا كەتەيىك، 1 اقپاننان باستاپ، حالىقتى كوروناۆيرۋستىق ينفەكتسياعا قارسى كەزەڭ-كەزەڭمەن ۆاكتسيناتسيالاۋ باستالدى.

Abai.kz