وتكەندە وسىندا عالىم بايتۋك دەگەن بلوگەردىڭ ءبىر سۇحباتىن كوزىم شالىپ قالدى. ول جىگىت سول سۇحباتىندا «جەلىدەگى قازاقتىلدى وقىرماندار مەن ءورىستىلدى قاۋىمنىڭ اراسىنداعى ايىرما جەر مەن كوكتەي، قازاقتىلدى جۇرتتى «قانداي ءانشى نە دەدى، نە كيدى، نە جەدى» دەگەن ماسەلەلەر كوپ قىزىقتىرسا، ءورىستىلدى قاۋىم سىرتقى ساياسات، ىشكى ساياسات، تاۋلى قاراباقتا نە بوپ جاتىر دەگەن اۋقىمدى ماسەلەلەرگە باستارىن كوپ قاتىرادى» دەگەن ەكەن عالىم.

مەنىڭشە، بۇل وتىرىك.

قازاقتىلدى قاۋىمدى دا سىرتقى ساياسات، اقش - قىتاي، قاراباق ماسەلەسى قاتتى قىزىقتىرادى. تاياۋدا بولعان ازىربايجانداعى قاراباق جانجالىن قازاقتىلدى بلوگەرلەر جان جاقتى تالقىلاپ، ونى مىڭداعان وقىرماندار وقىپ تاراتىپ جاتتى.

ال اكەسىن تانىتىپ تۇرىپ مىقتى جازىلعان ساراپتامالاردى، جازبالاردى مىڭداعان قازاقتىلدى قاۋىم ءولىپ تۇرىپ وقىپ، سول كەزدە وپىر - توپىر بولدى.

جالپى، مەنىڭ بايقاعانىم، قازاقتىلدى قاۋىم ساۋاتتى ساراپتامالارعا، تەرەڭ جازىلعان دۇنيەلەرگە، اقىل قوزعايتىن ويلارعا، جاڭاشىلدىققا وتە ءزارۋ، اسا مۇقتاج..

قازاقتىلدى قاۋىمنىڭ اراسىندا ونداي دۇنيەلەرگە سۇرانىس وتە جوعارى. سۇمدىق جوعارى.

الايدا، ءبىزدىڭ ۇلكەن وكىنىشىمىزگە وراي بىزدە ونى وتەيتىن وتەۋ جوق. ياعني، ءبىر سوزبەن ايتساق بىزدە قازىر بۇل ورتادا بىلىكتى ماماندار، ينتەللەكتۋالدار، ءبىلىمدى ساياساتتانۋشىلار، ويتۇرتكى بەرەتىن ادامدار جوق نەمەسە وتە از.

ەگەر ءبىزدىڭ قوعامدا ءىرى ينتەللەكتۋالدار كوپ بولعان جاعدايدا، ولاردىڭ ارالارىندا باسەكە پايدا بولۋشى ەدى، ال قوعامدا ءارتۇرلى وي تۋدىرا الاتىن ينتەللەكتۋالداردىڭ اراسىندا باسەكەنىڭ پايدا بولۋى دەگەنىمىز - ول سول قوعامنىڭ جان - جاقتى دامۋىنا اكەلەدى. ياعني، ءارتۇرلى ويمەن قارۋلانعان، وي تۇيگەن وقىرمان حالىق تا وتە ساۋاتتى بولادى.

وكىنىشكە وراي بىزدە ونداي نارسە جوق.

مەن مىندا وقىپ - توقىپ ءوز شامام كەلگەنشە بىردەمەلەر جازعانداي بولامىن، سوسىن كوبىسى «وسى تاۋىرلەۋ بىردەمە جازادى» دەپ تەك مەنى اينالشىقتاپ جۇرگەندەرى... بىراق مەن تاريحشى ەمەسپىن، ساياساتتانۋشى ەمەسپىن، باسقاسى ەمەسپىن، تەك كوپپەن بىرگە جەلىنى پايدالانىپ ءجۇرىپ وسىندا ءوز ويىن ءبىلدىرۋشى قولدانۋشىنىڭ ءبىرىمىن. سوعان دا زار بوپ وتىر جۇرت.

ال بۇنداي تاقىرىپتارعا كادىمگىدەي مۇيىزدەرى قاراعايداي بىلىكتى ماماندار كەرەك. ەگەر بار عويا، ءبىزدىڭ قازىرگى فەيسبۋك جەلى بەتتەرىندە، جالپى قوعامدا جۇرتپەن ويىن ءبولىسىپ اعارتۋشىلىق جۇمىسىمەن اينالىسقان مىقتى قازاقتىلدى بلوگەر- عالىم، قازاقتىلدى بىلگىر بلوگەر - قارجىگەر، قازاقتىلدى بىلگىر بلوگەر - ساياساتتانۋشى تاعى باسقالارى كوپ بولسا ءبىزدىڭ جۇرتتىڭ كوزى اناعۇرلىم اشىق بولار ەدى.

ءسوز وزگەرەر ەدى، وي وزگەرەر ەدى...

ۇزىن ءسوزدىڭ قىسقاسى، قايتالاپ ايتايىن، ءبىزدىڭ قازاقتىلدى ورتادا اقىلدى، بىلىكتى ادامدارعا سۇرانىس زور. ولار قوعامعا ىقپال ەتىپ حالىقتىڭ كوپتەگەن نارسەگە ويلارىن وزگەرتۋ ءۇشىن كەرەك.

ولاردى ينتەللەكتۋالدار دەيسىز بە، ساياساتتانۋشى دەيسىز بە، ليدەر منەنيا دەيسىز بە، ءوزىڭىز بىلەسىز، بىراق مەنىڭ تۇسىنگەنىم ءبىزدىڭ قازىرگى قوعامعا ولار اۋاداي قاجەت.

ءبىزدىڭ قازاقتىلدى قوعام قازىر، «بىلەيىن، وقيىن، كورەيىن» دەگەن ۇلكەن قۇشتارلىقپەن سونداي تانىمدىق دۇنيەلەرگە شولىركەپ وتىر.

مەن بۇ جەردە شاعىن عانا فەيسبۋك، الەۋمەتتىك جەلى تۋرالى اڭگىمە قوزعاپ وتىرمىن. ال اۋقىمدى تەلەۆيدەنيەنىڭ ءجونى ءبىر بولەك... پايدالانا بىلگەن ادامعا تۆ ناعىز تاربيە قۇرالى عوي.

تاپ سونداي حالقىمىز ونەر بىلىمگە، جاڭا تانىمعا، جاڭالىققا، عىلىمعا باسقاسىنا شولىركەپ وتىرعان تۇستا، ميلليوندار كورەتىن ورتاعا شىعىپ الىپ ءدۇيىم حالىققا «پرايم تايم» كەزىندە «اعاسى مەن قارىنداسى توسەكتەس بولدى»، «اتاسى مەن كەلىنى جاقىنداستى» دەگەن تەمالاردى عانا قوزعاپ دەڭگەيلەرى سونداي بوقتىقتان اسپاي قالعان توك شوۋلار جۇرگىزەتىن جۋرناليستەردىكى (جۋرناليست پە؟) ناعىز ۇيات، ۇيات ەمەس ماسقارا پوزور.

كۇللى حالىقتىڭ الدىنا شىعىپ ونىڭ ساۋاتىن اشىپ، كوزقاراسىن وزگەرتەتىن، تاربيەلەيتىن جەرگە شىعىپ مىناداي نارسەلەر كورسەتۋ دەگەنىمىز - راسىندا ول ءبىزدىڭ تەلەۆيدەنيەنى كىلەڭ ورەسى تومەن كولدەنەڭ كوك اتتىلار جايلاپ الىپ ويلارىنا كەلگەنىن ىستەپ جاتقاندىعىن كورسەتەدى.

كىم ءبىلسىن، ەگەر سول تەلەۆيدەنيەنىڭ قۇلاعىن ينتەللەكتۋالدار ۇستاسا، ولار ونى شىر اينالدىرىپ حالىققا مول ساۋابى تيەر ما ەدى دەپ قويامىن....

قور بولعان ەفير، قور بولعان تەلەۆيدەنيە، سايقىمازاق توك شوۋلار، جىرقىل - كۆندەر، بىتپەيتىن توي دۋمان، پارىقسىز انشىلەر - وسىلاردىڭ ءبارى مەنىڭشە، ءبىزدىڭ قازاقتىلدى حالىقتىڭ باسىن قاتىرىپ، دامۋىن تەجەپ ورىستەتپەي وتىر.

ولجاس ءابىلدىڭ جازباسى

Abai.kz