جۋىردا قازنەتتە قازاقستانداعى زەينەتاقى جاسى تومەندەيدى دەگەن اقپارات جالعان. بۇل تۋرالى Stopfake.kz مالىمدەدى.

«پوليتيچەسكيە بۋدني» YouTube-ارناسىنداعى ۆيدەودا قازاقستاندا زەينەتاقى جاسىن تومەندەتۋ تۋرالى ايتىلادى. اۆتوردىڭ مالىمدەۋىنشە، 2021 جىلدىڭ 1 ناۋرىزىنان باستاپ ەر ادامدار 60 جاستا، ايەلدەر 55 جاستا، ال بەس جانە ودان كوپ بالاسى بار انالار 52 جاستا زەينەتكەرلىككە شىعادى.

قر پارلامەنتىنىڭ رەسمي سايتىندا مۇنداي زاڭ جوبالارىن بەكىتۋ تۋرالى اقپارات جوق. 

سونىمەن قاتار، ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدە زەينەتكەرلىك جاستىڭ تومەندەۋى تۋرالى اقپاراتتى بىرنەشە رەت تەرىسكە شىعاردى:

–مەسسەندجەرلەر مەن الەۋمەتتىك جەلىلەردە تاراتىلعان قازاقستاندا زەينەتكەرلىك جاستىڭ وزگەرتىلۋى تۋرالى اقپارات شىندىققا جاناسپايدى. قولدانىستاعى زاڭناماعا سايكەس ەرلەر ءۇشىن زەينەتكەرلىك جاس - 63 جاس، ايەلدەر ءۇشىن بۇگىنگى تاڭدا – 60 جاس جانە ودان ءارى 2027 جىلعا قاراي 63 جاسقا دەيىن بىرتىندەپ ارتادى. 

قازاقستاندا بەلگىلەنگەن زەينەتكەرلىك جاس حالىقارالىق جانە وتاندىق ساراپشىلار جۇرگىزگەن زەرتتەۋلەردىڭ ناتيجەلەرى مەن ۇزاق مەرزىمدى اكتۋارلىق بولجامدارعا نەگىزدەلگەن. قر-داعى زەينەتكەرلىك جاس حالىقارالىق تاجىريبەگە جانە الەمدەگى قالىپتاسىپ وتىرعان ەكونوميكالىق جانە دەموگرافيالىق جاعدايعا سايكەس كەلەدى.

سوندىقتان قازاقستاندا زەينەتاقى جاسىن وزگەرتۋ تۋرالى ماسەلە قارالمايدى.

ازاماتتاردان جالعان اقپاراتقا نازار اۋدارماۋدى جانە اقپاراتتى تەك رەسمي كوزدەردەن عانا الۋدى سۇرايمىز،- دەپ حابارلادى مينيسترلىك.

Abai.kz